آنامین دؤره‌سی…
آیدین باخیش
بو نئجه دوران دیر بو نئجه عصیر؟!!!
دمیر محبتین قولاغین کسیر
اوره‌ییم جان آتیر آیاق تله‌سیر
محبت ائوینه بیر قاریش قالیب
آنامین دؤره‌سی یامان بوش قالیب!!!
***
محبت یوکودور قورو نفسی
بیر سلام کئف- احوال آنامین بسی
الینده خاک‌انداز, ائو سوپورگه‌سی
قاپییا گؤز تیکن جوت باخیش قالیب
آنامین دؤره‌سی یامان بوش قالیب!!!
***
بیر گون کوچه‌میزین تام یاراشیغی
ایندی قوناقسیزدیر قابی, قاشیغی
چکیلیب گؤزوندن گؤرن ایشیغی
تؤکولوب آغزیندا نئچه دیش قالیب
آنامین دؤره‌سی یامان بوش قالیب!!!
***
اوزونده بیر ذره شادلیق گؤروشمور
یورولوب دونیادان الی قیزیشمیر
سوفرهسی سویوق‌دور، غذاسی پیشمیر
آخشامدان ائوینده بیر آز آش قالیب
آنامین دؤره‌سی یامان بوش قالیب!!!
***
آنامین دانیشیر انتظار گؤزو
گؤز آغری باش آغری قوجاقدا دیزی
عؤمور قلبیریندن یای، یازی، گوزو
اله‌نیب قورتولوب اوزه قیش قالیب
آنامین دؤره‌سی یامان بوش قالیب!!!
***
داغ اولسا آغناییب یاماجی گئدیب
قوشا قاریماییب باش تاجی گئدیب
قیریلیب بویلاری آرغاجی گئدیب
جاهاز خالچاسیندان تک اریش قالیب
آنامین دؤره‌سی یامان بوش قالیب !!!
***
سویوق بو عصیرلی زامانلییام هئی
گرکدیر اؤزومو یامانلییام هئی
هاوام قاریشیبدیر دومانلییام هئی
بولوتام گؤزومده تر یاغیش قالیب
آنامین دؤره‌سی یامان بوش قالیب!!!
***
یامان داریخیبدیر بو گونلر آنام
من گرک آنامین دردینی قانام
گئدیرم آنامین یانیندا قالام
دونیا قفسینده آنام قوش قالیب
آنامین دؤره‌سی یامان بوش قالیب !!!
یک پاسخ
دؤغرودان به به .بؤیوک آنام یادیما توشدی گؤزلریم ایسلاندی.یاشایاسیز