سئوگیلیم
سلیمان ثالث

 سیخماسین پاک قلبینی عالمده هجران سئوگیلیم!

قایدادیر آچماز چیچک قیشدا گولوستان سئوگیلیم!

شاختاسی قان دونداریب، جان آلسادا بئش گون قیشین

آمما صولتدن دوشر یازدا زمستان سئوگیلیم!

قار اریر، سو آتلانار، چای‌لار داشار، یاز متصیل

یام- یاشیل پالتار گئیر باغ ایله بوستان سئوگیلیم!

گول آچار باشدان باشا گولشن، گولومسر غونچه‌لر

چئوریلر سئیرانگاها دشت و بیابان سئوگیلیم!

بولبولون اولماز غمی هر باغدا بیر شنلیک قورار

گول گولر، بولبول گولر هر لحظه، هر آن سئوگیلیم!

منده هر بولبول کیمی بیر نوبهار شیداسی‌یام

ایسته‌رم دؤنسون بوتون گولزاره ایران سئوگیلیم!

خسته‌لر تاپسین شفا خوش بیر مرامین عشقینه

درد الیندن اولماسین هئچ کیمسه نالان سئوگیلیم!

اؤز دیلینده خالقیمیز درسین آلیب یازسین سؤزون

قسمت اولسون ائل‌لره بیر بؤیله دؤوران سئوگیلیم!

علم‌له هر اؤلکه‌ده جهلین قازیلسین ریشه‌سی

یئر اوزونده قالماسین جاهل بیر انسان سئوگیلیم!

حاکیم اولسون دونیادا ائل‌لر آرا صلح و صفا

آخماسین ناحق یئره بیر قطره‌ده قان سئوگیلیم!

قوی وطن آباد اولوب آزاد حیات سورسون بشر

ائل سئوینسین، سن سئوین، بیرده “سلیمان” سئوگیلیم!