وطن نغمه‌سی
حسین چوبان

 یئتیم بیر گول کیمی، بیر لاله کیمی

آیریلیغدان سولموش یاناغیندا من.

موشتولوق گتیرن تبسوم کیمی

پار- پار پاریلدایام دوداغیندا من.

×

سنین آل سحرین دوغانا کیمی

گونشین ظولمتی بوغانا کیمی

شادلیق اوره‌کلره یاغانا کیمی

اری‌ییب یاغ اولام چیراغیندا من.

×

سنینله چاغلایام آخار چای کیمی

سئوینجین پایلایام شیرین پای کیمی

ایشیق ساچام اولدوز کیمی، آی کیمی

ابدی یاشایان بایراغیندا من.

×

وطن نغمه‌سینی خوش آوازیندا

چوبان نئی‌ده دئیه، عاشیق سازیندا

فرح‌دن دیل آچان لال آرازیندا

بوروننم نغمه‌یه قوجاغیندا من.