چاتما قاش بیر بولودون عشقینه تووْلاندی بو چؤل
آختاریب لاپ قارا گؤز بیر «سارا»نی سئچدی او سئل …
توتئیین قلبینه دَیمه هاوالار دیل کسری
هانسی سازلارلا اوغونسون «کرمی» اودلو بو ائل؟!
سن گؤتور توی چیراغین پنجره‌یه یاسلی قوپوز
سحر آوالی باخیشلار، چکه کیپریکلره میل …
یاشلی دَم، اسکی قمیشدیر «آراز»ین هر نفسی
دولاشیب پرده‌لره مصری داغیلمیش قارا «نیل» …
«ساوالان»، ساغ «دده قورقود»؛ سازینین دشتی، «موغان»
هاوالار سونبوله دوشموش، داراییر تئل‌لری یئل …
«آران»ین چؤل- دره سینده سورو جئیرانلار آییق
باغلانیب قوردلارین آغزی، جان آلان دیش‌لری کیل …
نالی آلتیندا اینیلدیر جاناوارلار بوز آتین
«نبی»‌نین بیغلاری ائشمه، «هجر» اوندان دا اصیل …
ذیروه‌لرده اود آچیب قیرمیزی بایراق کیشی‌لر
هر اودون شعله‌سی سؤنمز، هر اوجاغین جانی کول …
دور باخ «انصار قاراداغلی» او دا «بابک» بابادیر
قول‌لاری قانلی قیلینجلار سوراغیندا، هله، بیل!
«شئیور»ین – «سئحرآما»نین سیرّینی «ستارخان»ا آچ
قؤی «صمدخان»لاری اولسون او «سهند»ین ده خجیل …
زنجانین ییرتیجی «محمودخان»ی، «شمر» عایله‌سی
«ذولفقار» اولدو «یزید» سلطان الینده او رزیل …
یوردومون آغ یاخاسی آل سا، «فدایی» قانیدیر
هر شهیدیم بو آذرنامه ده بیر داهی «خلیل»! …