من صلحه سس وئریرم،-
میلیونلاردان بیری تک-
قوی بیر داها اوردولار
اوز- اوزه دایانماسین.
من صلحه سس وئریرم،-
بومبالارین سسیندن
بئشیکده‌کی کؤرپه‌له
هیچقیریب اویانماسین.

من صلحه سس وئریرم،-
بؤیوک کندلر، شهرلر
ویران اولوب قالماسین
توستو- دومان ایچینده.
من صلحه سس وئریرم،-
قدیم عابده‌لری
یئرله یئکسان ائتمه‌سین
توپ‌لار بیر آن ایچینده.

من صلحه سس وئریرم،-
آغ ساچلی آنالارین
گؤزلری یاش‌لا دولوب
قلبی داردا قالماسین.
من صلحه سس وئریرم،-
جاوان قیزلار، گلین‌لر
باخیب-باخیب یوللارا
انتظاردا قالماسین.