تورپاق، قوزو قیل قوردلاری، قارداشدی بو داشلار
قوردلار گؤزو آج ؛ گؤزدو، قلمقاشدی بو داشلار
قوردلار قارا وئرمکده، گؤز اول قاشلارا نقّاش!
قاش غربی قارالدیقدا، سایاق باشدی بو داشلار
اورکموش یئنه اولدوز سوروسو قوچلو – قویونلو
گؤی بویدا قارا قورد گؤزونه داشدی بو داشلار
بیر گون قارا قیشلاردان اوجاق اییسی گلردی
ایندی اوجاق عیاشلارینا قیشدی بو داشلار!
بیر ناله قوپوپ کؤهنه اوجاغین یاراسیندان
اولسون، تپهدن دیرناغا آتشدی بو داشلار
یوخدور نفسینده اوجاغین آغری، آغیرلیق
آل قیهالی گؤیلرله قانادلاشدی بو داشلار
ماتملی چوبان نئیلری، سازلار بوغازیندا
تویدور؛ آلا گؤز قیز سسی، قان- یاشدی بو داشلار
داش قیبلهسینی اود دهلیسی دوغما آنارکن
آغ توستولره قارلی یاخیش قوشدو بو داشلار
زیل تورکودو، باش تاپ ننه قارقیشلی عؤمور- گون
چوخ شاختا چکیب، یای- یازینا داشدی بو داشلار
شش داش حاجیسی مکهده بئشداش اویونوندا …
شیطانلا مقابل دورا داشلاشدی بو داشلار !…
۱۴۰۵/۰۱/۰۳
انصار قاراداغلی
چئویرن: انصار قاراداغلی
ترجمه: انصار قاراداغلی
سسلندیرن: انصار قاراداغلی
- شعر
- اوخوماق زامانی: < 1 دقیقه
- https://ishiq.net/?p=37955
چاپ
