گونشلی
سیجاقلی هاوادا
گؤتوروب آچاری
آچیرام قفسی
اوچورام
اوچا بیلمیرم قوپاریلمیش قاناد ایله
نه بیلیم بلکه ده چوخ اوزاق یئره گئتمه‌مک اوچون
اوچماماق اوچون قانادیمی قوپاریبلار
گزیرم کیبریت قوطوسو شهری
کوچه‌نی
بازاری
پلمه‌دن باخان خورالی باخیشلار
دومانلی باخیش‌لار
یئییر منی
اوشودور منی
نه بیلیم
بلکه‌ده گیزلیجه باخان زیان‌سیز پیشییی ده یئییر، اوشودور بو باخیشلار!
کئچیر سومویومه بو آغری
چاتلامیش سومویومو
فروغ
فروغ
فروغ دئیه-دئیه بیتیشدیریرم
ساغالدیریرام
اولور گونون‌ یورغون چاغی
قاییدیرام
آچیرام قفسی
ایلشدیریرم سویوق گونش کیمی اوره‌ییمی
یاغیش یاغمیر
اؤزوم یاغیرام
ایسلادیرام
پاسلادیرام قفسین میله‌لرین
ساچلاریمی قیسالدیرام
یازیلاریمی اوزادیرام
باغلییرام قوم- قوم
میصراع- میصراع قفسین میله‌لرینه
بیر بارماق شیققیلتی‌سینا دیکسینیرم
گیزله‌دیرم
یازیلاریمی
پوزولاریمی
آجیرام
آجیرام
آجیرام
چؤره‌ک یئرینه
شعر چیینه‌ییرم
اویورام
اویورام
اویورام
اوچورام
اوچورام
اوچورام