تبریز/ بالاش آذراوغلو
چئویرن: ایشیق
ترجمه: ایشیق
ایشیق
00:00
00:00


تبریز
بالاش آذراوغلو

 چوخ زامان کدرلی گؤرموشم سنی،

یادیندا وارمی‌دیر او حالین تبریز؟

ایندی او گونلردن اوزاقسان داها،

آرتیبدیر شوکتین جلالین تبریز!

×××

بیر قدرت دویورام دوغما سسیندن،

سینه‌می قیزدیران گور نفسیندن،

حیات کتابینین صحیفه‌سیندن

سیلینیب حسرتین ملالین تبریز!

×××

او گون‌کی سینه‌نی سپر ائیله‌دین،

قارانلیق گئجه‌نی سحر ائیله‌دین،

بیزه آزادلیغی خبر ائیله‌دین،

سسینه سس وئردی ماحالین تبریز!

×××

من چوخدان وئرمیشم سنه قلبیمی،

ایسته‌سن آل بیرده سینا قلبیمی،

قویما یاد اللرده سینا قلبیمی،

داها قاییتماسین زاوالین تبریز!

×××

بیزده مقدسدیر آنانین آدی،

شاهلار حکمدارلار بونو قانمادی،

هر ایل اردو چکدی سنی اودلادی،

آرتدی دردین غمین خیالین تبریز!

×××

اگر آتیلدیسا اودلارا یوردوم،

فقط اَییلمه‌دی یادلارا یوردوم،

دؤزدو هر چتینه هر دارا یوردوم،

یاردی قارانلیغی هلالین تبریز!

×××

اوشاقیدیم دئدیلر آذر آناندیر،

اودلاردان دوغدوغوم ائله عیاندیر،

منه بهتان دئین یاغینی قاندیر،

جوابسیز قالمامیش سووالین تبریز!

×××

بو ائللر اؤنونده آند ایچیرم من،

خلقین آرزوسودور قلبیمدن کئچن،

من الهام آلمیشام هر زامان سندن،

دونیالار قده‌ردیر کمالین تبریز!

     ۱۹۴۶ – تبریز

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

تبریز/ بالاش آذراوغلو

ایشیق
www.ishiq.net

آذربایجان ادبیات و اینجه‌صنعت سایتی