پاییزییدی
تک
یالنیز اوتاق‌دا
یاتاق‌دا
قادین قارنیندا
قیوریلیب قالمیش اوشاق کیمی ایدیم؛
گلسن
دوغولار
کسیلر گؤبه‌ییم
حؤجیره تداویسی اولار
سنسیزلیک‌دن توتوندوغوم ام‌اس ناخوشلوغو؛
سورونور پنجره‌ اؤنونه
آلیرام الیمه قلم، ورق
باخیرام گوزگویه
ساریلیق توتموش اوشاق کیمی‌ام،
گلیشینله ساری کلآیاغینی سوده هوپوزدورموش اولورام
آرتیق آغلادیغیم
آرتیق اتی گؤرورم گؤزلریمده
سیرغاسیز قالمیش قولاغیم کیمی؛
بیتیشیر اوره‌ییم سنسیز
باخیرام سئوگیلی‌لره
باخیرام
باخیرام
کؤوره‌لیرم
آخیر بئینیمین دوزلو سویو گؤزلریمه
آخیر اوزومه
دولور غمزه‌مه،
بلکه ده اولسایدین
کدر یاشی‌نین یئرینه
سئوینج یاشی تؤکولردی غمزه‌مه
سوزولور میصراع- میصراع یازیلاریما آخیر
جؤهر من‌له یالنیزلیغیما آغلاییر؛
هاوا دولوب
یاغیر یاغیش
چیخیرام خیابانا
دولاشیر آیاغیم
باخیر زیان‌سیز
یالنیز اولان پیشیگه
باخیرام یاشلی سئوگیلی‌لره
بلکه ده بونلاری قیزیل تشت‌ده ایلشدیرسه‌لر
بو سئوگی‌دن ال چکمزلر؛
آرخامجا گلیر آیاق سسی
یارپاقلارین خیشیلتی سسی
کئشکه یاریم اولا
کئشکه بیله اونسوز
بو هاوا کیمی
گورشاد اولوب دولویا چئوریلیرم
یوغورت اولا یوللاریمین اوستونده
یاشیللیغیمی یاندیرمایا
آدیمی بیری سسله‌ییر
یاریمدی
یاری جانیمدی
سن منسیز
من سنسیز
سنسیز من
منسیز سن
حیاتدا کئچمیرمیش
آغلاما
آغلاما
بیر چای ایچک
بئینیمیز سووا گلسین…