بیچیلیر بوغدا
یویولور سامبول چاییندا؛
آنانین قارنی ده‌ییر بورنونون اوجونا
توتور سانجیسی،
دوغولورسان
گتیریر خبر آتان
اؤلور بیر قوچ قویونونوز
اولور باش صاداغاسی جئیران باخیشلارینا.
دوشور گؤزللییین دیللره ، آغیزلارا
گنجلشیرسن
بزه‌ییب- بتته‌ییب آنالارین قیزلارین
یوخ دئییب چکینیرسن
دوشورسن آتانین یانینا
هر عنعنه‌ده،
هر آغیچیلیق‌دا…
قورورسان عایله
اولور ایکی جئیران کیمین
دوشورسن قوشونوندان
ائلیندن آیری؛
بیر پارا اوچون
یاشام اوچون
چؤهره‌له‌نیرسن
وورور دوه اوستونده بویو سنی
توتونورسان علاجسیز ناخوشلوغا؛
نه بیلیم ایکی جئیرانین ائولرینین دیره‌یینین سؤکولمه‌سینی
سؤکولمه‌مه‌سینی بیلسئیدیلر بو دونیایا گلردیلرمی؟!
گلمزدیلرمی؟
ال اوزولور دوکتوردن
یاپیشیرام دوعاچی اته‌ییندن،
گؤرورم یوخو:
باخیب گولورسن آتا اوجاغیندا منه
قارا چادرالی قادینلار کیمدی گؤره‌سن-
ایلشیب‌لر دیره‌یینیزین یانیندا؟!
اولمایا قیزلارین بزه‌ییب بتته‌ین آنالاردی؟! طلسماتا سالدیلار؟!
ایشیق ساچان پنجره‌یه قارشی دوروب گئدیرسن
بیر اومود یولو قالمیر
ال اوزولور دوعاچی‌دان
آغلاییر آغ گونلو آنان
آغلاییر سینه‌سی داغلی باجیلارین
آغلاییر گئتمه،گئتمه! دئدییین قارداشلارین
آغلاییر یاد، قوهوم…
مونجوق – مونجوق «جان» دئییب تؤکورسن گؤز یاشی
پلمه ایله گتیریرلر اؤز دیارینا،
داشییر
داشییر کوره‌یینده
بیر اوزو قیز
بیر اوزو گلین قادینین،
باخیرسان سامبول چایینا
گؤره‌سن سامبول چاییندا دوغولماغین یاخچی ایمیش؟!
یاخچی دئییلمیش؟
باخیرسان قیزیل تورپاغینا
باتیر دن- دن
اوخ- اوخ
کیپریکلرین اوره‌ییمه
گؤره‌سن کیتاب اولموش کیپریکلرینین قیرخ واراغین-
بو قیزیل توپراغیندا یاشاییبسانمی؟!
یاشاماییبسان‌می؟!
باخیرسان قانلی یوردونا
ساغ اولایدی گؤره‌یدی بو گونلری آتان
بیر تانسیق* اولایدی
چیخایدین قانلی یوردونا
قالدیرایدین سسینی
بولبول سسینی…!
*تانسیق: معجزه
