کؤنلومو وئردیم غمه دونیاده یوخ بیر همنفس
مسکنیم کوه و بیاباندیر انیسیم خار و خس
چوخ دولاشدیم کی، ندیر بو عالم ایچره سئودیگیم؟
تاپمادیم آختاردیغیم، هئچ بیر شئیه یوخدور هوس
بیلمه‌دیم هاردان گلیب هاردان گئدیر بو کاروان
تا کی بیرزاد آنلادیم، اوندان گلیردی بو جرس:
های دورون ای غافل انسانلار بودور حقدن ندا
کاروان گئتدی یاتیبسیز، وارمی بیر فریادرس؟!
دونیانی دؤرد اللی توتما هر گلن بیر گون گئده‌ر
هایلادیم هی قیلادیم سالدیم بوتون عالمده سس
دیشله‌میش حسرت الین کام آلمامیش بوردان گئده‌ن
باغلاماق بئل فانی دونیایه عبث‌دیر بیل عبث
زندگی خوش کئچسه یئتمز عمر خضر و عمر نوح
گر تنوع اولماسا دونیاده چوخدور بیر نفس
گؤرمه‌دیم بو فانی عالمده منه لذت وئرن
هر یئره اوچدوم، هارا گئتدیم منه اولدو قفس
هنچ سئونلردن وصاله یئتمه‌میش میندن بیری
وصل دلداره یئتیشمک بللی اولدو، بوش هوس
بیر تنوع اولمادان یئل تک کئچیر ایامی‌میز
نه اومورسان فانی دونیادن؟ لباس فقر بس!
بار الها فتنه‌دن، دریای غمدن وئر نجات
تک اومیدیم بیرجه سنسن، یوخدو سندن باشقا کس
«جعفر»ین شعری بوتون سئوگی، محبت، گولشنی
بیتمز اوردا بیر تیکان، اصلا گؤرونمز خار و خس
جعفر بؤیوک‌وند
چئویرن: جعفر بؤیوک‌وند
ترجمه: جعفر بؤیوک‌وند
سسلندیرن: جعفر بؤیوک‌وند
- شعر
- اوخوماق زامانی: < 1 دقیقه
- https://ishiq.net/?p=33488
چاپ
