آنالاردان یادگار قالمیش گؤز مونجوغو
دلیکلی مونجوق یئرده قالار-قالماز
تئز-تله‌سیک زنجیره تاخیب آسدیلار
یولدان اؤته‌نین بوینونا
هده‌له‌دیلر
قاپی دالیندا کیلکه‌لی قیز ایله
قالدی پارا- پیرتیغ قلم کیتابی
یولدان اؤتن پلمه‌یه باخیب
چکدی هیچقیریق ایچیندن.

اولور توی گونو
گلیر خینا یاخدی گونو
قاتین بو خینایا گیرده‌کان زَیلی سولوغونو کسسین
قاتین بو خینایا ازوایی یاغی
آغریسینی، آجیسینی کسسین
قاتین بو خینایا یومورتا ساریسی
برکیمه‌میش سومویونو برکیتسین.

اولور گلین کؤچن گون
آغلاییر
سیزلاییر
قوشما دئییر
زنجیرله‌نیب
زنجیرینی قیریب قاچان آنالار دا
آغلاییر نیسگیللی آتا
دوغولور ایکی گؤز مونجوغو
بادانیر قالیر
سسی چیخمیر
اوز گتیریر
کیتابا
اوخویور…
اوخویور…
دوندوروب کائناتی بیر گون
قیریب زنجیرلری
بیراخیلاجاقلار بو گؤز مونجوقلاری…