دونه‌نیم، بوگونوم، صاباحیم منیم
چئویرن: بالاش آذراوغلو
ترجمه: بالاش آذراوغلو
بالاش آذراوغلو
00:00
00:00

باشی «سهند» چالمالی
اته‌یی «آجی‌چای»‌لی
قورئیی قار عطیرلی
گونئیی چوبان هارایلی
یایی فیروزه کؤینکلی
قیشی بولود اؤرپکلی
یازی لیسان یاغیشلی
پاییزی آی یاناقلی
اولدوز باخیشلی
سینه‌سی آینا گوللو
بولاق زمزمه‌لی
دوپ دورو کهریزیم منیم،
تبریزیم منیم!

بیر زامان قالا دیواری تک
کرپیج- کرپیج هؤرولن
سونرا کوچه- کوچه
محله- محله بؤلونن
«باغمئشه»، «حسنو»لو
«قاراغاج» تراوتلی
«امیرخیز» وقارلی
«سرخاب» صنعتلی
«ارک» عظمتلی
«شمس‌العماره» سارایلی؛
گئجه‌لری ساکیت
گوندوزلری هارایلی
آی سئلیم، عمانیم، دنیزیم منیم،
تبریزیم منیم!

نئچه اؤلکه، نئچه شه‌هر دولاشان
بیر اوجو هیجرتدن اوتایا آشان
تاریخه قوووشان،
توزلو، داشلی یوللارین گؤروشدویو شه‌هر
کاروان- کاروان
قیمرو سسیله اوسانیب هر سحر
آخشاملار آیپارا ایشیغیندا یاتان
سینه‌سینی گولله قاباغینا وئریب
تاریخ یارادان
مشروطه نیتلیم
آزادلیق سوراقلیم
گونشیم گوندوزوم منیم،
تبریزیم منیم!

بابامین باباسی‌نین یادگاری
قارا گؤزلو، شیرین سؤزلو گؤزل‌لرین،
قهرمان اوغول‌لارین دیاری؛
کئچمیشی عظمتلی
بوگونو حسرتلی
گله‌جک اومیدلی،
بیر الی یاراقدا
بیر الی تورپاقدا
دؤیوشه- دؤیوشه یاشایان
حیاتینی نعمتینی قورویان
شرفینی شؤهرتینی قورویان
ایکی گؤزوم منیم،
تبریزیم منیم!

نه واختدیر
«گولوستان باغ»یندا اولمامیشام
«ارک»ین تاماشاسینا دالمامیشام
گؤزلریمین اؤنونده‌دیر «امیر بازاری»
«شیشه‌گرخانا»
«گجیل قاپیسی»
یادیمدادیر گؤردوکلریمین هامیسی،
گئجه‌لر خیالیمدا
گوندوزلر فیکریمده‌سن،
هر دقیقه، هر آن
یقین سن ده منی اونوتمامیسان؛
نئچه خیابانیندا
نئچه میدانیندا
هله ده قالیر ایزیم منیم
تبریزیم منیم!

ناعیل‌لار ناغیلی
حقیقت‌لر حقیقتی
عؤمرومون آجیسی، شیرینی
کدری، سئوینجی
شادلیغی، محبتی،
گؤز یاشیما شریک
گولوشومه اورتاق
گنجلیگیمی
دینجلیگیمی
امانت قویدوغوم
هر زامان نفه‌سینی دویدوغوم
آرخام، کؤمه‌ییم، دایاغیم
دونه‌نیم، بوگونوم، صاباحیم
هامیدان دوغمام
هامیدان یاخینیم
عزیزیم منیم،
تبریزیم منیم!

دونن دؤیوشدوم سنین اوچون
جبهه – جبهه سنگر- سنگر،
صاباحدا دؤیوشه‌رم
امر ائتسن اگر،
دؤزمه‌رم اوره‌یی نیسگیللی
آلنی کؤلگه‌لی اولاسان
آخی سن آرخامدا بیر قالاسان،
سنسیز من کیمم
من نه‌یم
نه آدیم وار نه سانیم،
اوزوگو قاشییلا تانییارلار
سنسن دونیایا تانیدان منی
ائلیمین، دیلیمین وطنی
هاراییم، سسیم، سؤزوم منیم
تبریزیم منیم!
تیریزبیم منیم!

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد.

اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

دونه‌نیم، بوگونوم، صاباحیم منیم

بالاش آذراوغلو
www.ishiq.net

آذربایجان ادبیات و اینجه‌صنعت سایتی

دونه‌نیم، بوگونوم، صاباحیم منیم

بالاش آذراوغلو
www.ishiq.net

آذربایجان ادبیات و اینجه‌صنعت سایتی