شعرلر
چئویرن: طالع حمید
ترجمه: طالع حمید
طالع حمید
00:00
00:00

(۱) من نئجه دیندیریم بو بوز داشلاری

کؤهنه قبریستانلیق… یالقیز بیر تپه…
فیکیرلر باش آلیب اوچورور منی.
بولودلار گؤزوندن قار سپه-سپه
آغلاییر بو قملی، بوز منظره‌نی.

من نئجه دیندیریم بو بوز داشلاری،
نه جوره قوپاریم بو سولغون گولو؟
اوز توتوب باخیرام گؤیلره ساری،
حیات دا اؤلدورور، سوکوت دا اؤلو.

آز-آز داشلار قالیب آیاغی اوستده،
بوردا ییخیلانلار دورانا گولور.
قبری پوزولاندا، قبری ایتنده
اینسانلار تزه‌دن دیریلیر، اؤلور.

قبیر وار جاواندیر، قبیر وار قوجا،
قبیر وار داشی دا سولوب، یانیبدیر.
حیاتلا اؤلومون آراسینداجا
بیر دیلسیز، بیر قورو داش دایانیبدیر.

آغلاییر اوستونده نئچه پاییز، یاز،
زامان دا ایشله‌ییر بیر آز درینه.
قبیر داشلاری دا یومشالیب بیر آز،
اؤزلری دؤشه‌نیر اؤز اوستلرینه.

(۲) ایتیریدیم

اونوتدوم،
عؤمرون اوزاق بیر قاتاریندا
خوشبخت‌لیییمی.
ایتیردیم
طلبه‌لیک ایللرینده
قاتاردا ایتیردیییم
چانتام کیمی…
ایندی قالدیقجا اوزاق-اوزاق
قوطب‌لر
آراسیندا من.
تعجیلی بیر اعلان وئرمک
کئچیر هردن اورییمدن.
آغریلار وار
سینم بویو
یاییلیر.
طالع حمیدین
آدینا وئریلمیش
خوشبختلیک
ایتدیی اوچون
اعتیبارسیز ساییلیر.

(۳) یورغونام، یورغون

یوز ایلین یورغونو یاخشیدی مندن،
باشیمین دومانی باشیما سیغمیر.
منیم بولودلاریم ایچیمله بیردی،
منیم بولودلاریم ایشیمه یاغمیر.

یاغمیر دردین آلیم، یاغمیر بولودوم،
ایچیمده شیمشکلر باش آلیب گئدیر،
بوردا اورییمین سو یانغیسی وار،
اوردا گؤز یاشلاریم بوشالیب گئدیر.

قَمیم الی آچیق، دمیم خسیسدی،
درد وار دؤنوب-دؤنوب الیمی سیخیر
عؤمرومون پاییزی، دوماندی، سیسدی،
عؤمرومون باهاری یادیمدان چیخیر.

بیر اوزوم شاختادی، بیر اوزوم سازاق،
قیلینج-‌قین اولموشوق سییریلانمیریق،
چیچکلی دملریم، دوشدونوز اوزاق،
خزانلی چاغلاریم، آیریلانمیریق.

ایچیم درد ییغناغی، آی دردین آلیم،
بیلیرم گرکدیر سوالین، سورغون.
یوز دفعه دئییرسن نئجه‌دیر حالین؟
نه دئییم، بئله‌جه یورغونام، یورغون.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

شعرلر

طالع حمید
www.ishiq.net

آذربایجان ادبیات و اینجه‌صنعت سایتی