تیکانلی تئللر
س.داغلی
آه بو تیکانلی تئللر…!
باخارسام
گؤزومده
دینرسم
سؤزومده
خیالیم دا سنه دوغرو اوچاندا
تیکانلی تئللره تاخیلیب قالیر
دویغولاریم منی چاغیراندا دا
باخمامیش بیلیرم
قاپ-باجانی سارمیش
تیکانلی تئللر
او اوزدن گؤزهلیم
سنی گؤرمک دئییل
اوزاقدان دا اولسا
بیر ساده سالام…
اودا قالسین هله
بیر سسسیز گؤروشون بئله
آرزی- خیالی
بئینیمده دوغمامیش
تیکانلارین جایناغیندا گوللنیر
دئ!
ندن دولماسین شعردفتریم
تیکانلی تئللرین ایزلری ایله؟
او منیم بویوران
منیم آمیریم
قوی قورتاریم سنی منیم قلمیم.
دفتریمسه
قلبیم
دویغوم
آرزیم
خیالیم.
باشاریب دئدیگیم بو قدرجیگین
اؤیرنندن سونرا دئسهنه گولوم
جانیم
سئوگیلیم!
یئنه ده مندن گیلئیلی میسن؟
