گؤز – گؤزه ساتاشدیق بیر آخشام چاغی
او ناماز اوستونـده من پیان – پیان.
رئکلام‌سیز ال‌لری، قونوت ال‌لری
شیرین دانیشیردی گؤی تانریسی‌لان.
من هئچ آیریلیغا راضیلاشمادیم
چاتدی هاراییما بیر دلی شئیطان!
ال‌لری قونوت‌دان آسیلی قالدی
سوزدو ایختیاری چادیراسیندان.
گاهـدان یول آیریجی چتین اولارمیش
بیر تانری اویاندی، بیر تانری بویان.
یؤنلتدی یولونو ساری سجده‌دن
سئوگیسین صراط-المستقیم دئین.
اوزون آیریلیقدان ووصالا چاتدی
قونوتون نییته چئویرن گؤزل.
بیر ثاواب ایچینده گوناها باتدی
من بیر ساری یاپراق، او بیر ان گؤزل.
او اؤزون بیر نذیر دئمیشدی منه
اونون‌لا دونیانی سئویردیم آنجاق.
ایندی ده دئیه‌رم توپراق آلتیندان
بیر جوت ال قووزانیب قونوت توتاجاق.
کیمسه تانریسی‌لا پیچیلداشاندا
قونوت ال‌لرینه حسرت یئیه‌رم .
قیامت گونونه اینانماسام دا
سئوگی دوعالارا آمین دئیه‌رم.
