اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

اوههه ühhə
ارشد نظری

داها بو گونکو ائمپئریال تابوت
وال ایستریت فهله‌سیله
ساوالانین اَته‌یینده
لاله ورلی اَته‌یینی
دالغالایان
سوبای قیزین
فرقینده دئییل.
۱۹ نومره‌لی باش داشی
هر کیمسه‌یه یئتر!!
تویوقلارین یاس تویودو
حکیم ده خسته‌دیر
نئچه ۱۹ کئچیر
باغلی قاپیلارین
تورشا شیرین قاش قاباغیندان
هله بیزیم ۱۹ یاشلیلار
غئیرت دوُنوم دونگه‌سینده
قورخوسوز، آرخایین
دینج بیر دوداق دَیمه شعیری
یاپماییبلار…

***

شعرین آچیقلاماسی / سحر خیاوی
هر بیر شعرین آدی بیرآز شعرین نه باره‌ده اولدوغونو بیزه آیدینلاشدیریر. شاعرین اوز دئدیگینه گوره بو شعرین آدی (اوههه) اوسکورکین سسی(صوتو)دیر. همن بو کلمه نیشان وئریر کی شعر بو گونکو دونیا یولوخدوغو کووید۱۹ خسته‌لیگی قونوسوندادیر.
شاعیر دئییر:
(داها بو گونکو ائمپئریال تابوت
وال ایستریت فهله سیله
ساوالانین اَته یینده
لاله ورلی اَته یینی
دالغالایان
سوبای قیزین
فرقینده دئییل.)
یعنی بو امپریالیست توحفه‌سی ویروس، هامینی بیر مقیاسدا هده‌له‌ییر؛ سانکی بو خسته‌لیک سرمایه‌داری‌نین ایشی‌دیر کی بیر سیاست اوزه‌ره دونیا اینسانلارینین آراسینا اپیدمی سالیب (بو سیاست اولا بیلر کی جمعیتی آزالتماق، داوا دوزلدیب ساتماق، ماسک، الکل،‌ ضد‌عفونی‌لر، واکسن و دیگر بو خسته‌لیگین ملزوماتینی ساتماق یوخسا باشقا سیاستلر اولسون). هر حالدا کاسیب، وارلی، جاوان، قوجا فرقینده دئییل هامینی یولوخدورور.
(19 نومره‌لی باش داشی
هر کیمسه‌یه یئتر !!)
(اشاره دیر کووید ۱۹)ه. یعنی بو خسته‌لیک هامینی یولوخدورا بیلر.
(تویوقلارین یاس تویودو)
تویوقلارین یاس تویودو(داها تویوقلار توی اوچون کسیلمیرلر یاس اوچون کسیلیرلر). البته هئچ بو خسته لیک قویمور یاس مجلیسی ده توتولسون!!
(حکیم ده خسته‌دیر)
حکیم‌لر اؤزلری ده خسته‌لشیب‌لر. هم یورولوبلار و هم ویروسا یولوخوبلار.
(نئچه ۱۹ کئچیر
باغلی قاپیلارین
تورشا شیرین قاش قاباغیندان)
قاش- قاباقلی باغلی قاپیلاردان نئچه اون دوققوز کئچیر. یعنی اینسانلار ائوده دوستاق اولارکن کرونا ائشیکده جولان وئریر و هردن بیر جنازه ایله قاپیلاردان سووشور.
(هله بیزیم ۱۹ یاشلیلار
غئیرت دوُنوم دونگه‌سینده
قورخوسوز، آرخایین
دینج بیر دوداق دَیمه شعیری
یاپماییبلار…)
آمما هله ده بیزیم اون دوققوز یاشلیلار قورخوسوز و آرخایینجا بیر دوداق دَیمه(اوپوش و سئوگی شعری) یاپماییبلار‌. چونکو بیزیم یئرده اؤلوم و اؤلومه باخماق عادی بیر ایشدیر. آمما ایکی سئوگیلی‌نین اوپوشونو گورمک غئیرت دامارلاری ترپَدیر و اونو عادیجه گوره بیلمیرلر.
سایین اوستاد نظری کووید ۱۹ خسته‌لیگیندن فایدالاناراق دونیادا و توپلومدا نوقصانلاری، سوء استفاده‌لری، امپریالیسمین سیاستلرینی کی تکی اوز جیبینه و منفعتینه چالیشیر آیدینلاتیر. یعنی اوزون اوزادی دا یوخ، بیر نئچه سطیرلیک شعرده بونلارین هامیسینی دئییر. البته منجه بو شعر بوندان داها و داها گوجلو ادبیاتلا یازیلا بیلردی. بو آچیقلامانی اوستادین اوز ایسته‌گینه یازدیم.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *