ساختا باهار
ارشد نظری
سيميت دووارلارين سويوق جانيندا
ياشيللى باهارين رسمى چكيليب.
ايتى سونگولرين، تيكانلى تئلين
اوستونده بنؤوشه گولو اكيليب.
سومسو بولبوللرين سرخوش نغمهسى
اؤتهرى قوشلارين عاغلين چاشديرير؛
قيسير بولودلارين آغلاماق سسى
سوسوز تارلالارين كؤكون يانديرير.
سومسو دعوتينه آلدانان قوشلار
بيليرم كئفلرين قان قوساجاقلار.
ماهنىلار ايچى بوش، نوتلار دويغوسوز
صحنه دولانديران كور ياراسالار.
امينم قفسده قالميش بولبوللر
بو كاغيذ گوللره تئز ايناناجاق؛
بوغازلاريندا كى حيات نغمهسى
تيكانلى تئللرده پارچالاناجاق.
ساختا:مصنوعى
سيميت:سيمان
سومسو:.قوش سسى چيخاريب، قوشلارى اوولاماق اوچون بير آلدايجى آلت