چال منی سازدا !
عباس بزرگ امین ( ۱۳۷۷- ۱۳۱۵)
عؤمرومو، گونومو سازا باغلادیم،
اوغول هر مجلیسده چال منی سازدا!
کؤنلومون تئللرین یازا باغلادیم،
گل قیشین قهریندن آل منی سازدا!
باهارین عاشیقین قارا تاپشیرما،
آزادلیق عاشیقین دارا تاپشیرما،
قیزیل گول عاشیقین خارا تاپشیرما،
هر مجلیسده یادا سال منی سازدا!
قوجامان اوزانام یازا عاشیغام،
ائلیمین شؤهرتی سازا عاشیغام،
بیر کاتیب دردیمی یازا عاشیغام،
جوشدورور آغ، یاشیل، آل منی سازدا!
اونوتما، هر زامان چال منی سازدا!
فروردین ۱۳۷۷
چالارام سنی!
اکبر بزرگ امین (جنون)
سازیمی آلارام سینه‌م اوستونه،
یانیق کرمی‌ده چالارام سنی!
گئرچکده چاتماسا الیم دستینه،
دویغولار قوینوندا بولارام سنی!
کاتیب تک دردینین یازانی اوللام،
حسرتین، مؤحنتین پوزانی اوللام،
ائلیمین شوهرتلی اوزانی اوللام،
نغمه‌دن نغمه‌یه سالارام سنی!
آغیر هیجرانیندان قلبیمدی شان-شان،
چالارام سازیمی بیر آن دورمادان،
«جنون»ام آی آتا هر یئرده هر آن-
ائللرین یادینا سالارام سنی!
اونوتمام، سازیمدا چالارام سنی!
یک پاسخ
اورمونون بوغاناق، دومانلی،آجیلی گونلرینده اگر دئسه م تورکچولوک و ساز ،سوز یوکونو بو عایله تک باشینا چیگین’لرینده داشییبلار اینانیرام سوزوم یئرسیز اولماز….قاپیسی هر آن ائل عاشیقلرینین اومود قاپیسی اولدو….هر زامان بو اینسانین دوستلوغونا گووه نه بیله جک بیر داغ کیمی دایاق اولدو….آز یاشادی ، اوز یاشادی….