مای بایرامی نیویورکدا
ارشد نظری
بو گئجه‌ده
سیلدی هله گؤزلریمین یوُخوسونو
بیر کدرلی آتلی پولیس
نه ایسته‌دی او فهله‌لر خییاواندا
کؤرپه‌لره سوتدن غئیری؟
نه دئدیلر،
باهالیقدان، ایش سیزلیکدن
درددن غئیری؟
باری
باری
شاهید اولسون ایددیالی میکروبفونلار
شاهید اولسون نیویورکون
رنگی قاچمیش گیلاسلاری
باتوم باتوم دئموکراسی یازیلاندا
فهله‌لرین کوره‌یینه،
شاهید اولسون می‌سی‌سی‌پی
منیم شرقی یوُخومودا،
آغ سارایدا یوُخلادیلار
یئنه پیس پیس
بو گئجه‌ده سیلدی هله
گؤزلریمین یوُخوسونو
بیر کدرلی آتلی پولیس
