نازلیم!
محمد کارگر

بو ایلده بایراما سنسیز یامان دئدیم نازلیم!
بو ایلده بیزدن اوزاق گز، دولان دئدیم نازلیم!
نه فایدا کؤهنه سؤزی ایل به ایل دولاندیرماق
او سئوگی‌دن سؤز آچاندا دایان دئدیم نازلیم!
و بوش-یالان دانیشیق‌لار باشیمدا توی دوتدی
اوزاتدی صؤحبتی من ده اوزان دئدیم نازلیم!
دایانمیشام زوپویور هی فلک یومورتا تکین
و سیندیریب قاناداندا بویان دئدیم نازلیم!
سینه‌مده بایرام اودوندان آلوولودور اؤز اؤدوم
و گؤرجه‌یین هر اودو من اوتان دئدیم نازلیم!
سنین قاییتماغینی تانریدان نزول دیله‌دیم
خرابه مسجیدین ایچره اذان دئدیم نازلیم!
سویوخدا قالمیش اتاق‌لار اونوت-اونوت دئدیلر
دئدیم باش اوسته بیلیرسن یالان دئدیم نازلیم!
او قیشدا قارلا یاتان داغ دا پالتارین دییشیب
من آما بایراما سنسیز یامان دئدیم نازلیم!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4