بیر گون گلسن یوخام
سنه
منه
حتی آناملا تانرییا باغلی اولمایان بیر یوخلوق
عدم، دوغما یوردو کیمی قوناجاق اوستومه
قوش یومورتاسینا قونار کیمی
بیر گون گلسن
متینلرده دئییل
حتی حاشیه‌لرده
حتی اتک یازیلاردا
حتی کیتابلارین آراسیندا دوشوب قالان جیریق کاغیذلاردا
قوروموش چیچکلرده
حتی پنجره‌دن جالانان ایشیقدا
آراما منی
بیر گون گلسن یوخام
اما سن
یوخلوغو یاخشی تانیرسان
گؤزلرینی یومدوغون یئردن باشلانیر
گؤزلرینین باخمادیغی یئردن
ووجودون یوخ بؤلومو
*
بیر گون گلمه‌سن
گلمه ده
پاییز اوره‌ییندن شراب چک یوخلوغومو ایچمه‌یه
خزللرین انجمادیندا دوندور آنیلاریمی
تاپشیر قافقاز داغلارینین هره‌زلرینه
کؤچریلرین یولدا اؤلن جنازه‌لری کیمی
قار آلتیندا قویلانسین آنیلاریم
گونشین بصیرتیندن اوزاق
*
گؤرورسن
یوخ اولسام دا بیر یئرلرده قالیرام
سنین آنیلاریندا
سن وارکن من وارام
و آجی بودور