چرشنبه‌نین آلاووندا / دومان بختیاری
چئویرن: ایشیق
ترجمه: ایشیق
ایشیق
00:00
00:00

چرشنبه‌نین آلاووندا
دومان بختیاری

غم کدری اوتا آتدیم
چرشنبه‌نین آلاووندا.
سئوینجیمی ائله قاتدیم
چرشنبه‌نین آلاووندا.

آلاوودا بیر ائلی گؤردوم
کؤز ایچینده گولو گؤردوم
قیوریم قیوریم تئلی گؤردوم
چرشنبه‌نین آلاووندا.

گؤزلریمده دنیز ایتدی
سعادتیم اوتدا بیتدی
آجی حسرت سونا یئتدی
چرشنبه‌نین آلاووندا.

دنیزلره جومان کیمی
سحر داغدا دومان کیمی
دولدوم شعره اومان کیمی
چرشنبه‌نین آلاووندا.

اومود ایلا اوتدان کئچدیم
چرشنبه‌نین سویون ایچدیم
قارانلیقدا قارا سئچدیم
چرشنبه‌نین آلاووندا.

یانا یانا چیخدیم باشا
آرزولاریم داشا داشا
«دومان» دئدیم آزاد یاشا
چرشنبه‌نین آلاووندا.

یئر گۆنو
ایلین سونونجو اود گۆنو(چرشنبه گونو) اینانجا گؤره یئر اویانیر، تورپاق نفس آلیر. بۇ گۆن خالق آراسین‌دا «یئر گونو»، «ایلین آخیر چرشنبه» و یا «تورپاق چرشنبه‌سی» آدلانیر.
دئمه‌لی تورپاق آرتیق اکینه حاضر اولور وَ اونا توخوم سپمک اولار.
ایندییه قدر سۇ، اود، یئل گون‌لری آرخادا قالیب وَ بو گون (یئر گونو)، آخشامی سئوینجله کئچیریله‌جک.
بۇ بایرام آذربایجان خالقینین تاریخی کؤکۆ ایله باغلی اولدغوندان عادت-عنعنه‌لرله زنگین‌دیر وَ بو موناسیبتله آچیلان سۆفره ده فرق‌لی‌دیر.
• بالیق پلوو ، پاخلاوا، شکر چؤریی ، کیشمیش، پۆسته، بادام، بویانمیش یۇمورتالار سوۆفره‌لری بزه‌مه‌لی‌دیر.
• چرشنبه‌لرده اۇلدوغو کیمی، آخشامین‌دا دا تونقال(اود) قالانیر، ائوین اوتاقلاریندا عائله عضولرینین هر بیرینین آدینا شام یاندیریلیر.
• بۇ گۆنۆن ان گؤزل عنعنه‌لریندن بیری پای آپارماق وَ آهیل‌لارا٬یوخسۇل‌لارا دردلی‌لره، یاسلی‌لارا باش وۇرماقدیر
• آداخلی پایی (قیزلار کی آداخلانیب وَ توی اولمامیشدیر بَی اونا پای آپارار.
• ️گلین پایی (قیزلارکی ائولنیب لر اونچۇن آتا لار ٬آنالار٬ قارداشلار و بؤیۆک باجیلار پای آپارار)
• یوخسول پایی(وارلی‌لار یوخسۇل لارا پای وئرلر)
• یاسلی پایی(یاخینلارین دان بیریسی اؤلن اولسا تانیشلاری پای آپاریب اونلاری یاسدان چیخاردار)
• آنا پایی – آتا پایی(اۇغول قیزلار قوجا آتا٬ آنلارینا پای آپارارلار)
• بو گئجه نییت ائدیب قۇلاق فالینا دۇرارلار.
• پاپاق آتما دا شال آسلامالادا قدیم عادتلرین‌ده‌دیر.
• ائو ییه‌سی پاپاغا بایرام سووقاتی ییغاراق اونو قاپییا قویور.
• بو گۆنلر دؤرد چرشنبه‌لر عنعنه‌سی بیر یئره گلمیش و بۆتون چرشنبه‌لر دب‌لری (سۇ٬اود٬یئل وَ تورپاق) هامیسی یئر گۆنۆنه توپلانمیشدیر.

یئر گۆنۆمۆز وَ چرشنبه بایرامیمیز مۆبارک اولسون

اشتراک گذاری در print
چاپ
اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

چرشنبه‌نین آلاووندا / دومان بختیاری

ایشیق
www.ishiq.net

آذربایجان ادبیات و اینجه‌صنعت سایتی