بو گونلر هامی اوغرو اولوب
رامین جهانگیرزاده

بو گونلر هامی اوغرو اولوب
بیری گؤزلریمی اوغورلاییر
سونرا یاری یولدا قویوب قاچیر
گؤزلریم یولدا قالیر

بیری آیاقلاریمی اوغورلاییر
بوتون شهرین کوچه‌لرینی سومسونور
آیاقلاریم ایشدن دوشور
باشماقلاریم آیاقسیز قالیر
داها شهره آیاق باسا بیلمیرم

بیری بورنومو اوغورلاییر
هر یئره بورنومو سوخوب اییله‌ییر
داها هئچ یئره بورنومو سوخا بیلمیرم

بیری دوداقلاریمی اوغورلاییر
دوداقلاریم زویویور
دوشور چایین ایچینه
دوداقلاریم قیرمیزی بالیق اولور
ایلیشیر بالیق توتانلارین قیرماغینا

بیری اوره‌ییمی اوغورلاییر
آتیر آلکوللا دولو شیشه‌نین ایچینه
اوتاغینداکی تاخچایا قویوب
هردن گؤتوروب
شیشه‌نی اویان بویان ائدرکن
باخیر اوره‌ییمه
بیر آز گولومسه‌ییر
بیر آز دا اوخویور اؤز- اؤزونه

هر نه‌ییمی اوغورلادیلار
هئچ نه ائده بیلمه‌دیم
تکی منه قالان
بو کئیبوردون اوستونده
چاک-ها- چوک سالان
بارماقلاریمدیر
هم بو بارماقلاریملا گؤرورم
هم آددیملاییرام
هم اییله‌ییرم
هم تامسینیرام
هم ده کی اوره‌ییمین دؤیونتوسونو
ائشیدیرم اوندان
قورخورام
او قدر قورخورام کی
بارماقلاریمی باسیرام باغریما
قورخورام بلکه بیری
من یوخویا گئدرکن
بارماقلاریمی کسیب آپاردی…