ایکی شعر
یعقوب نامی
(۱): اؤتور زامان
اتک آچمیر سوسوزلارینا بولود
آغاج
اسیرگه‌ییر گونشی اته‌یینده‌کیلره
دیرچه‌لمه‌دن
تاپدالانیر چمن
گول
غضبله غونچه‌لنیر
و
اؤزونو
دخ-دووارا سانجماغلا گؤزه سوخور
طبیعت ده‌ییشیر دونون
اوخومادان
قورقوشوملو بئیینلری
یئنه ده
اؤتمه‌ده زامان
ساکیت… آغیر… دورغون…!
(۲): قیسقانیرام
اولسون کی
سنین باخیشین
قارانلیق‌لارین سونونو
گؤره بیلسین
بلکه منه ائله گلیر
بلکه ده هئچ
یوخ وارلیغی قارانلیغین…!
سنین بو آغ -آپباق دونیانا
قیسقانیرام
کاش
بیرآنلیق دا اولسایدی
سنی یاشایا بیلسه‌ی‌دیم.
