سنسیزلیک‌لر(۸)
مجتبی نهانی

 (۱)

ائوی تیکیلسین
جانی اود توتسون
داریخماغین
باشین باغلاماق گَرَک
بو سنسیز گونلرین.

(۲)

نیسگیل چایی سویویوب
سسین هاوادا دونوب
شاختا اوره‌ییمی چالیب
سنسیزلیک بیله تانیمیر منی…
سسسیزلیک؛
-اؤگئی قارداشیم-
آنام… باغری بوش آنام،
الیم یوخ، توتام الینی.

(۳)

دووارلار اکمیشدین
بیر سؤز قالمامیشدی آرامیزدا
سنسیزلییی باشیمدان آتمالی یام
اولار می، اولماز می…
بو سورو منی اؤلدوره جک.

(۴)

باغیراجاق گونلریم-
سنسیزلیک آخشامیندا
شور گؤزلر آراسیندا،
گزیرم
بیر شئی اولماز؛
دئییرسن
ائله اولسون!

(۵)

قار رنگی باخیشیندا-
گونلریمی ایتیرمیشم
گونشی چک باشیما
سنسیز آییلماقدان یورولموشام.

(۶)

باغریما دوشن-
ایلدیریملاردان
نه فرقین وار؟
شاققالاندیم، ایکی یه بؤلوندوم
بیر یاریما، سن دولدون
او بیریسینه، یوخلوغون.

(۷)

سنه باغلاندیم ایپ‌سیز
اوجون ایتیرمیشم
بلکه سنده‌دیر.