چئویرن: ایشیق
ترجمه: ایشیق
ایشیق

kiyan xiyavi
…و بؤیله بیر قوشوقچولوق
کیان خیاو

 گئجه‌نین آی ایشیغیندا بیر دالغین
گوندوزون گون ایشیغیندا،
داها بیر دالغین؛
باشیمی آغری داخماسینا سوخموش، دورموشام
هر گون آجیقلی چیرپینان یئل اؤنونده،
ساچلاریمی داغیدیر کن اوزومه.

واز کئچن‌ده دئییلم بو قوشوقچولوقدان
گؤزلریمدن یئددی چایین سولاری آخسا بئله.
اینانماسان
گل گؤزومون چیچه‌یینی
اوره‌ییمین اؤزه‌یینی یئ قورتار
گولدن آغیر سنه بیر سؤز دئمه‌ره‌م
آند ایچیرم!
و بؤیله بیر قوشوقچولوق
یوزده یوز اؤلدورمک دئمکدیر اؤزونو!…

آختارما، آنام! سئوگیلیم!
قورخاق بیر کرتنکه‌له تک
هورکک یاشاماق یاشامی چتیندیر.
الی وار آغزی یوخ اینسانلار اورتاسیندا،
یاشاماق بؤیله اولور.
اوسته‌لیک آلدانیریق‌دا جومهور باشقانلارینا
و آلدانماق اَن کسگین بیر گئرچکدیر
گونئیلی یوخسوللار اوچون…

ایندی منه بیر چیخیش یولو گؤسته‌رین
یوخسا بوتون اؤلوم دادی وئره‌ن دیزه لریمده،
اؤزوم باشیم آغریسینا باخارام.
دیزه لر کی یئر چکیمیندن قورتاریر آدامی
گؤیلرین‌ده یئرلی-دیبلی چکیمی یوخ
قالدیقجا قالیرام دئمک
وارلیقلا یوخلوق ال-اله دایانان  یئرده.
بعلی،بعلی، بؤیله بیر قوشوقچولوق
یوزده یوز اؤلدورمک دئمکدیر اؤزونو!…

آختارما، آنام، سئوگیلیم!
تکجه اینسانلارین وارلیغینا دئییل
بیر آغلاییش، بیر گولوش سسینه بئله دؤزوموم یوخ.
دیشی وار دیلی یوخ اینسانلار اورتاسیندا،
اینجیمک بؤیله اولور.
اوسته‌لیک آلدانیریق‌دا مجلیس دئپوتاتلارینا
و آلدانماق اَن کسگین بیر گئرچکدیر
یوخسول گونئیلیلر اوچون…

یالنیز قوشوق،
دیزه،
سؤزجوک!
یالنیز اؤلوم اؤز سونسوز خزینه‌سینی،
اؤنومه سردییی زامان ،
آنلاییرام یاشاماغی.
و بؤیله بیر قوشوقچولوق
یوزده یوز اؤلدورمک دئمکدیر اؤزونو.
اؤلمکسه یاشاماق کیمی قولای بیر شئی
ائهئئئئی، ائهئئئئئی، اﺋﻬﺋئئئی، ائهئی!
اردیبهشت آیی ۱۳۸۵

چاپ

یک پاسخ

  1. داییم شئعیرلریندن داد آلدیغیم اوستاد کیان خیاو، شئعرین باشا – باشینی دویا بیلمه سمده، دویب سئودیییم بؤلوملری ده واریدی. او، سیرادان: آختارما، آنام! سئوگیلیم!
    قورخاق بیر کرتنکه‌له تک
    هورکک یاشاماق یاشامی چتیندیر.
    الی وار آغزی یوخ اینسانلار اورتاسیندا،
    یاشاماق بؤیله اولور. آنجاق، بو شئعرده چئشیتلی دویغولار یاشاماق اولور. بلکه شئعیر بیر باشا یازیلمامیش میش.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

…و بؤیله بیر قوشوقچولوق / کیان خیاو

ایشیق
www.ishiq.net

آذربایجان ادبیات و اینجه‌صنعت سایتی

…و بؤیله بیر قوشوقچولوق / کیان خیاو

ایشیق
www.ishiq.net

آذربایجان ادبیات و اینجه‌صنعت سایتی

…و بؤیله بیر قوشوقچولوق / کیان خیاو

ایشیق
www.ishiq.net

آذربایجان ادبیات و اینجه‌صنعت سایتی