ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

سارا
قاسیم تورکان
qasim turkan

اوبادان اؤلکه‌دن آرالی سارا،
نامردین جوروندان یارالی سارا،
داغلارین بزه‌یی، مارالی سارا،
هارداسان اولوبسان هارالی سارا؟

سئودالی رؤیالی شیرین دیل سارا،
سئللره قوشولوب گئدیردین هارا،
دستانین کؤنلومه وروبدور یارا،
دریالار گلینی بورلا بوی سارا!

باغلاریم حسرتدی آلمایا، نارا،
هئیوا یوخ چولقانا ایپَک تک بارا،
ازلدن دردینه یوخوموش چارا،
عشقین آتشینه آلیشان سارا!

گؤی گئییب اینینه بولوددان قارا،
چای گلیب غصه‌دن زینهارا، زارا،
گول سولوب بولبولی چکیب‌لر دارا،
عشقینی سئل‌لره پای وئره‌ن سارا!

اولدوزلی گئجه‌لر غملی آییندا،
حسرتی قالالی آرپا چاییندا،
نه بیلیم فلکین زَهَر پاییندا
نه لر وار، نه لر یوخ، نیسگیللی سارا!

تازادیر تئل گولون سولماییب هله،
یئریدیر ماتملی کَپَنَک گله،
گؤز یاشین سئل یویان تئل ایله سیله،
کَپَنَک‌دن دوشن آرالی سارا!

باشیندا داراغین تخته‌دیر تخته،
ظالم خان اَیله‌شیب سارایدا تخته،
ائل اوبا آغلاییر سن قارا بخته،
بیرده آچ گؤزلرین سونرا یات سارا!

سرولر اَییلیب کامانا دؤنوب،
آغاج‌لار ساری‌یا، آلا بورونوب،
هم عؤمور سوووشوب، دؤنرگه دؤنوب،
هم یازیم پاییزا دؤنوبدور سارا!

داغلارین، داشلارین اوره‌یی قاندی،
کؤنول‌لر غصّه‌دن آلیشیب یاندی،
آغاج‌لار آغاج یوخ سانکی انسان‌دی،
بویلانیب باخیرلار جانانا سارا!

باغرینا آلدیغین، آخ داشدان اولدو،
گؤرندن حالینی، هوش باشدان اؤلدو،
باغریما سانجیلان اوخ، قاشدان اولدی،
قاشلارین قوربانی آلا گؤز سارا!

قول‌لارین قوربانی قوجاقلا داشی،
قوی سئله قوشولا، گؤزلرین یاشی،
سن کیمی سئوگیلی ناز قلم قاشی
اودلارا یاخانی یاخیلسین سارا!
۲۸/۷/۱۳۶۷

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *