شعرلر
کریم قربانزاده
(۱)
منی ساچلارینا هؤر
گؤزلرینه دولدور
کؤینه‌یینه دویمه‌له
من سنده یاشاماق
سنده اؤلمک ایسته‌ییرم.
(۲)
پاییز قلینجینی اوینادیر مئشه‌ده
اوره‌ییم قیریلیر، دوشور
یارپاق بهانه‌دیر
اوچوش‌دا کؤچور
ماهنی‌دا بوردان.
(۳)
گؤز دئییل دنیزدیر باخار
دوداقلاریندان بال آخار
و اللریندن گؤیلره گؤیرچین قالخار
یاشیل گئیسن اگر.
(۴)
دونیادا
قوی جنت ده سنین اولسون
تکی منه
اسیمده سوورولان ساچلارینی
یاغیشدا ایسلانان گولوشلرینی
بوراندا آلوولانان اور‌ه‌یینی گتیر.
(۵)
قارانلیق سحری بوغار
و سنسیزلیک منی
بیر آز یوبانسا گونش.
(۶)
دالغالار
یئل‌لر
گونش
و اؤلوم بئله
دایانار
گؤزوم گؤزلرینه ساتاشاندا
(۷)
یارپاقلار پاییزدان
و من
سنسیزلیکدن سارالیرام.
(۸)
گونه باخانلار گونشسیز
قوشلار دنسیز
و من سنسیز
یاشایا بیلمه‌رم.
(۹)
خوشبختلرین بیریسی‌یم:
بیر جوت قوش
بیر خوروز
نئچه پیشیک
و بیر شاعیر دوستوم وار.
(۱۰)
ده‌ییرمان کیمی دارتما گونلری
یاشام بیر دؤنه‌دیر
اؤلوم ابدی.
یک پاسخ
چوخ گؤزل شعرلر حورمتلی کامران آذری.مین یاشایین.