سنسیزلیک
یالچین سهند
(1)
سنسیز یاشاماقدان قورخوتما منی،
اؤلمه‌یی اؤیرنمیشم!
سن یاشامین نه‌ده‌نی
و من سن‌ده یاشایان
نه‌دن‌سیز بیری.
وارلیغی اویناتمیرام
عاغلیمی اویاتمیرام
سن‌سیزلییه فیکیرلشنده…
وارلیق،
سینیق بیر گوزگو دایانیب اؤنومده
منیم سنسیز پورتره‌می گوزگویه چکیر.
(2)
دؤشلریمده آددیم آتیر تانری،
دانیشیریق
و آرتیق تانیشیریق
دئییر:
مین آی‌دان اوستوندور او گئجه،
و من سنی دوشونورم آیلی بیر گئجه؛
ایندی، یئددینجی گؤیده وارلیغیمی گزیرم
سن یوخسان
و یوخلوغا ساری وارلیق آزالیر
اؤپورم قرآنی
آما بیلمیرم نییه یارانماییبسان…
(3)
بئله یاشاماقدان ساری
یوخلوغو سئچدیلر
دوغولمایان وارلیقدان اؤنجه یاشایان آلین‌سیزلار بلکه…
هئی آلین داشلار!
وارلیغا عوصیان گره‌ک
یاشامین بو گرگین دؤنمینده
یاشاییشدان گئده‌ک
اؤلوم باهاسی‌دیر حیات
سئوگی جزاسی
مجبورلوق‌دا سئچیلمیش بیر یئردیر بوراسی
و سونرا سئوگی…
سئویرم سنی
زاماندان اوزاق
وارلیغین گؤزوندن ایراق؛
آرامیزدا
وارلیقدان تؤرنمیش قودوز گؤزتچیلی گؤرونمز ائنلی بیر دووار
سن ده وارلیقدا، من ده
آما آیریلیق‌دا
آرالیقدایام
آرالیق‌دا…
و بو منیم سنسیز نئجه‌لیییم
من یالنیزام
ائله بونا گؤره ده وارام.
