گؤزلرين كيمي
علي جوادپور
بو ياز گليشيندن بللي‌دير،
نئجه يازدير!
بيليرم يئنه اؤلوب ـ ديريله‌جه‌يم
بير جيغيردان ياپيشيب
نئچه داغين باشينا دولاناجاغام
من كي يانار اوجاغام
دئشيله‌جك كؤزوم
داماريمدا قانيم قايناياجاق
اريييب كئچه‌جه‌يم ايينه گؤزوندن
دويماياجاغام بو يازين گؤزلليييندن!
يورولماق بيلمه‌يه‌جه‌يم
اَير يورولسام؛
يورغونلوغومو يوخويا چاتاجاغام
يوخومو سحر يئلينه!
دلي‌ليييم قوشولاجاق بو يازين دلي‌لييينه.
بو دلي ياز ياشيل اولاجاق گؤزلرين كيمي
بو دلي ياز گؤزلليك بيتيره‌جك!
بو دلي من، اؤلوسو اولاجاغام،
اؤلمك ـ ديريلمك بيتيره‌جه‌يم!
بو ياز يئنه اؤلوب ـ ديريله‌جه‌يم
بيليرم.
ياز-1383
یک پاسخ
بو ياز يئنه بنؤوشه درمه‌يه گئده جه ييك… گؤزه‌ل ايدي. اوره‌يينه ساغليق…