کؤنلومه تبریز دوشدو
سلیمان روستم(1906-1989)
حسن ایلدیریم
سلیمان روستم 20-نجي عصر آذربايجانين يئني شعری‌نين بايراقداري كيمي تانينير. اونون و صمد وورغون، رسول رضا، عثمان ساري‌وللي، محمد راحيم و… فعاليت و ياراديجيليقلاري سايه‌سينده آذربايجان شعری بؤيوك بير مرحله‌يه كئچميش و دونيا قاباقجيل شعری سويه‌سينه يوكسلميشدير.
سلیمان روستمين شعری‌نين ماياسي، جوهري اينساني آمال‌‌لاري منيمسه‌ميش و بؤيوك آرزولارلا ياشاييب، قوران و يارادان اينسان‌لارين آرزو و ايستكلريندن يوغرولموشدور. سلیمان‌ين ساده، صميمي و دولغون شعرلري: اونون دوغما خالقي‌نين حياتيندان، آنا وطني‌نين طبيعتيندن، ياشاديغي دؤورون، موحيطين احوال- روحيه‌سيندن سو ايچير. بو شعرلر سؤزون حقيقي معناسيندا خلقي شعرلردير؛ معاصير موندرجه‌لي يوكسك بديعي سويه‌لي اثرلرديرلر.
سلیمان شعرینده كي ساده‌ليك داهيانه ساده‌ليك‌دير. درين دوشونجه‌نين، آلوولو سئوگي‌نين، دؤنمز ايراده‌نين، موباريزه عزمی‌نین تؤره‌تدييي ساده‌ليك‌دير.
بؤيوك شاعرين اثرلري خالق آراسيندا گئنيش ياييلميش، داها دوغروسو خالقين مالي اولموشدور. اونلار ايندي خالقين ديلينده ماهنيلاشميش تصنيف‌لرده، موغام گوشه‌لرينده ياشايير!
اولو شاعرين خاطیره‌سینی عزیزله‌یرک، بیر نئچه شعرینی بیرلیکده اوخویاق:
خيانت اولماز
هر کس اؤز خئيريني گودسه دونيادا
آرادا، البته، محبت اولماز.
اوره‌کلر ديل تاپسا، بيرگه دؤيونسه
اورتادا کين اولماز، کدورت اولماز.
يئرسيز بر-بزه‌يه بورونن کسده
آغ گونده ان باشدا گؤرونن کسده
دار گونده خلوتده سورونن کسده
ذره غئيرت اولماز، صداقت اولماز.
بيزيم دونياميزين جلالينا باخ
ايگيدلر بسله‌يير هر ائو، هر اوجاق
اونلار گؤزل بيلير دؤيوشدن قاباق
دؤشونه دؤينده جسارت اولماز.
ياييلسين دونيايا بو سس، بو خبر
سارسيتسين دوشمنين قلبيني کدر
بيزيم نسيل‌لرده تا قبره قده‌ر
وطنه، ميللته خيانت اولماز.
آذربايجاندان آيريلماز
گؤزلليک، اينجه‌ليک، سئوگي، وفا اينساندان آيريلماز
جوشان سئللر، آخان چايلار نئجه عماندان آيريلماز.
اوزاق دوشسه گؤزومدن ديلبريم، کؤنلوم دؤز‌ر، چون کي،
سئونلر بيلمه‌ميش اولماز، ووصال هيجراندان آيريلماز.
وفاسيزدان وفا اومما، وفادان يوغرولوب عشقيم
جانيندان آيريلار عاشيق، فقط جاناندان آيريلماز.
بوتون دونيا يئريندن، محوريندن قوپسا آيريلسا،
“سلیمان روستم”ين قلبي آذربايجاندان آيريلماز.
باخديم
من اؤزومدن اوول يول گئدنلرين
جيغيرينا باخديم، ايزينه باخديم.
وطنين، ميللتين دار گونلرينده
جرعتله اؤلومون گؤزونه باخديم.
سئير ائديب، يوردومون گولزاريني من
خزانسيز، ابدي باهاريني من
خوشبخت نسيل‌لرين ووقاريني من
سانديم کي، بختيمين اوزونه باخديم.
يانيندان کئچمه‌ديم مئيخانه‌لرين
معماري آدلانديم کاشانه‌لرين
باخماديم سؤزونه بيگانه‌لرين
اؤز شاعر قلبيمين سؤزونه باخديم.
سني ايستر
کؤنلوم يئنه مين شووقيله جانان، سني ايستر
آند اولسون عزيز جانينا کي، جان سني ايستر
چکمز اته‌ييندن اليني، چکسه‌ده هيجران
ائيلر جانيني جانينا قوربان، سني ايستر
ايلهام آليرام اينجه سسيندن، نفسيندن
تک من دئييلم، شانلي بو دؤوران سني ايستر
سن قلبي تميز، آلني آچيق، شوخ گوزه‌ليم سن
ائللرده اولوب حوسنونه حئيران سني ايستر
ايش‌دير، منه اوز وئرسه فراغيندا کدر، غم
کؤنلوم يئنه‌ده دردينه درمان سني ايستر
گون کئچسه زامان کئچسه وفاسيز بئله اولسام
اوول کي محبتله “سلیمان” سني ايستر!
کؤنلومه تبريز دوشدو
گلدي مين ديللي باهار کؤنلومه تبريز دوشدو
گوللو بولبوللو باهار کؤنلومه تبريز دوشدو
تبريزين دردي منيم درديم اولوب ايللردير,
اوردادير, نازلي نيگار, کؤنلومه تبريز دوشدو
چوخدا دونيادا گوزهل, آدلي شههر مين- مين‌دير
هر يئرين اؤز يئري وار, کؤنلومه تبريز دوشدو
باجيمي- قارداشيمي, سئوگيليمي گؤرمهلييم
يوخ, دهييشمز بو قرار, کؤنلومه تبريز دوشدو
من “سليمان” کور, آراز نغمهلي شاعر بابايام-
چکيرم عالمه جار, کؤنلومه تبريز دوشدو.