ایکی شعر
ساحیل آذر
(1)
بو بولواردا؛
بیر قادین یاتیر آخشام باشی!
نه واردیسا دونیادا
آتیر آخشام باشی!
بو بولواردا؛
آغاج لار آدام کیمی آج دیرلار!
آدام لار آغاجدیلار!
یئل لر،
قانادسیز قوش لار،
آغاج لاری ساردیلار …
ائندی گئجه قوینوندان
نئچه قارالتی باشی،
آغاج لاری یاردیلار!
دورمادان سؤکولدو دان،
گونشی بوغوردو قان …
بو بولواردا
بیر قادین یاتاردی آخشام باشی!!!
(2)
بو شهرده اوچ کوچه وار
بیرینده ماوی دوغار قادین‌لار
ایشیلدایار گؤزلریندن شهر.
بیری
گوندوزلر ایشیق
گئجه‌لر قارانلیق اوست اؤرتوک‌لری‌دی.
بیرینده وطن دوغولار
قیز- اوغلان
کاغیذ دوغولارلار، قلم دوغولارلار، سؤز دوغولارلار
ایلک میصراع‌نین ایلکینده
اورتادا
سون میصراع‌نین سونوندا،
بو کوچه‌ده آرخادان اویولار قلم
وصیعت دامار باش بارماغیندان
کاغیذ سؤز اولونجا ،کاغیذ بویانینجا.
بو کوچه‌ده آرتیق اون اوچ- اون دؤرد یاشار قیز- اوغلان.
29/03/1393
یک پاسخ
چوخ گؤزلدیلر ساحیل بی. اللرینه ساغلیق.