گؤرمه‌ديگيم دوست
جعفر تانيش
خياليملا يئنه سئيره چيخيرام،
زماني، مکاني ووروب ييخيرام،
اليني سئوينجک برک- برک سيخيرام،
سني هئچ زامان‌دا گؤرمه‌ديگيم دوست!
سنينله بير عؤمور سورمه‌سمده هئچ،
قولومو بوينونا هؤرمه‌سمده هئچ،
اؤلونجه دوستونام، گؤرمه‌سمده هئچ،
سني هئچ زامان‌دا گؤرمه‌ديگيم دوست!
درديمه دردلرين ياناشي اولوب،
گؤزومه گؤزونون ياشلاري دولوب،
بير خزان اليله باغيميز سولوب،
سني هئچ زامان‌دا گؤرمه‌ديگيم دوست!
باريش سئوينجيله داشارام سنله،
هوندورلو داغ اولسا آشارام سنله،
نه‌قده‌ر زامان وار ياشارام سنله،
سني هئچ زامان‌دا گؤرمه‌ديگيم دوست!
باشقا دانيشسادا ديلين ديليمدن،
آيري ساييلسادا ائلين ائليمدن،
آيريلماز نيسگيلين اؤز نيسگيليمدن،
سني هئچ زامان‌دا گؤرمه‌ديگيم دوست!
هارداسان؟ آن ياخين گؤزلريمده سن،
قابار اياغيم‌تک ايزلريمده سن،
دئييب دئييلمه‌ميش سؤزلريمده‌سن،
سني هئچ زامان‌دا گؤرمه‌ديگيم دوست!
چيرپينير اوره‌يين اوره‌ييم کيمي،
تميزدير ديله‌يين ديله‌ييم کيمي،
سئويرم گؤزومون ببه‌يي کيمي،
سني هئچ زامان‌دا گؤرمه‌ديگيم دوست!
قارالار يا آغلار اؤلکه‌سينده‌سن،
تيکانلي سيملرين بؤلگه‌سينده‌سن،
“تانيش”ام فيکريمين کؤلگه‌سينده‌سن،
سني هئچ زامان‌دا گؤرمه‌ديگيم دوست!