آدام یئیه‌ن
عمران صلاحي
دونیادا یئمه‌یه بير بئله شئی وار، آمما بعضي‌لري گؤرورسن کي، آدام یئیيرلر. بيز ائشيتمیشديک کي، بعضي‌لري شوشه و ميخ یئیيرلر و بوللور و مفتيل تحويل وئريرلر. یئنه ده ائشيتميشديک کي، بعضي قبيله‌لرده آدامي بيشيرير و ايستي اوْت قاتير و دوز سپيب یئیيرلر.
بير آدام یئیه‌ن، بيرينين آتاسيني یئميشدي و اونا هئی دئیيردي کي، آتاني …جه‌یم. اؤز- اؤزوموزه دئديک کي، بو ايش‌لر کؤهنه‌ليب، بو مدني دونیادا بئله ايش‌لر باش وئرمز. ايندي گؤروروک کي، باش وئرير. اؤزو ده نئجه. آدامجيل قبيله‌لر بو ايش‌ده قالميش‌لار. بو دؤنه اؤنجول‌لر روس‌لار و آمريکالي‌لاردير. روسيه‌ده بو ايش عمومون مصرفي اوچون اوز وئريب و آمريکادا ايسه شخصي مصرف اوچون. ماجرا بئله‌دير کي:
خبر وئرميشديلر کي، روسیه‌ده بير ار و آرواد اؤز قوناق‌لاريني کونسئرو ائديب ساتيرديلار و اونون پولو ايله ايچکي آليب ايچيرديلر. آمريکادا ايسه بير کيشي اونون- بونون داليسيجا دوشوب دئیرميش: اوزونو یئیيم یوخسا «جيیه‌ريني‌یئیيم» سونرا اوْنلاري آپاريب بيشيريب و مئیل ائديرميش. بيلميرم روسیه‌ده پوليس اوْ اؤلو یئیه‌ن‌لري نئیله‌دي. آمما آمريکادا جيیه‌ر یئیه‌ن کيشي‌ني توتوب زيندانا سالديلار. بو دوستاق باشقالاريني یئمه‌سين دئیه اونو «تک نفرليک» سيللولا سالديلار. زيندانين گودوکچولري اونا یاخين‌لاشماقدان قورخوردولار. چونکي او آدامجيل دوستاق اونلاري گؤرن کيمي اؤز آغيز- بورنونو یالایـيردي. بير گون گليرلر گؤرورلر کي، او آدام اؤزونو ده یئیيب. خالق دئميشکن اؤزو اؤزونو یئیيب و اوندان اثر- اتر یوخدور.
یک پاسخ
سلاملار ايجازه نيزله عمران صلاحي نين يازيلاري سيرا ايله راديو ViVa دا ياييلاجاق…
بو سيز بودا توركجه راديو ويوا…
http://radioviva.mihanblog.com