سئودا / علی صمدی
بیزیم عهدیمیزی قیرماق نه لازیم
بیز قیریلماق بیلمز سئودا سئچیریک.
بیزه آرخ نه لازیم، ایرماق نه لازیم
بیز اوزمگیمیزه دریا سئچیریک.
عشق اودویلا دولموش قورو دریییک
سئوگی میدانینین هنروریییک
درد مجنونلارینین وارثلریییک
غم قبیلهسیندن لیلا سئچیریک.
درین یارالارین مرهمیییک بیز
اورهک دؤیونتوسو، گؤز نمیییک بیز
سرخوش، لنگری یوخ بیر گمیییک بیز
توفاندا لاپ بؤیوک دالغا سئچیریک.
قلینج توکانینا تییه گتیرمه
سرخوشلوق لافینی مئیه گتیرمه
سئچدیگیمیز یولدا نییه گتیرمه
بیز اول سئویریک سونرا سئچیریک.
