سالخیم سؤیودلرین ساچی اولموش ایپک-ایپک،
صوبحون نسیمی اسدی، اویان ای قارا چیچک!
رؤیالارین دَرین دنیزی بوغدو بیزلری،
شعریمده بللیدیر گئجه‌نین غملی ایزلری.
ظولمت توتوبدو گؤزلرینی، قورخورام گؤزل
سن آچماسان دا گؤزلرینی، باغلاسین اَجل!
سن اولماسان قیزیل چیراغین قورتولور یاغی،
سن اولماسان گول آچماز اولور شعریمین باغی.
سنسن خیالیمین باهاری، گوللو باغچاسی،
سنسیز جهاندا نئیله‌ییرم من سعادتی؟!
آی گون بوتون جاهانی یئنه ائیله‌سه فلک
من ده قارا گولو سئچه‌رم، ای قارا چیچک!
