الیمده قارا قلم، آغ کاغاذین اوستونده بیر سؤز یازیرام.
ائشیدیگیم بیر سؤز سسیله بئنیمده فیرلانیب، دالغالانیر. دیشلریمی ائله سیخیرام آغریسی باشیمین اوستونه یاییلیر. اؤزومه گلنده گؤرورم قارا قلمی الیمده ائله سیخمیشام، بارماقلاریمین اویناقلاری آغرییا دوشوب. کاغاذدا یازدیغیم سؤزون چئوره‌سینه دوره‌لی جیزیقلار چکیرم. چکدیگیم جیزیقلار کاغاذی ییرتیر. دوشونجه‌م هارا گئدیرسه، بارماقلاریم دا وار گوجویله اورا گئدیر.
یازدیغیمین تانریسییام، سؤزونون چئوره‌سینه دؤنه- دؤنه، آستا- آستا جیزیق چکیرم. ماسانین اوستونده باشیمی قولومون اوستونه قویوب قارا قلمین اوجونا باخیرام. هارا آپاریرام گئدیر، گؤزومو اوندان چکمیرم. درین نفس چکنده، گؤزلریمین قاپاقلاری آغیرلاشیر. بیر ایستیلیک باشیمدان جانیما یایلیر. بیردن قیشقیرتی سسی منی اویالدیر. باشیمی قالدیریرام. قارانلیق، سویوق اوتاقدا بیر ماسانین آرخاسیندایام. اوتوراجاقدا اوتورموشام، گؤزوم هئچ نسنه گؤرمور. قارانلیقدا باتان اوجسوز-بوجاقسیز بیر ماسا. قارا قلمیم ساغ الیمده بارماقلاریمین آراسیندادیر. قلمی اووجومون ایچینه آلیب، برکدن ساخلاییرام. قالخیب گئتمک ایسته‌سم ده بورا هارادیر؟ هارا گئتمه‌لییم؟ بیلمیرم. اوتاغین سویوقلوغوندا جانیما اوشوتمه یاییلیر. دریندن؛ قیریق-قیریق نفس آلیرام. بیردن قارا توکلو بیر اَل، ساغ الیمه ساری اوزانیر. ال یاخینلاشدیقجا قیشقیرتی سسی قولاغیمدا چوخالیر. الیمی اوزومه چکمک ایسته‌دیگیم آن بیر باشقا ال الیمی ساخلاییر. ساغ الیمین بارماقلارینی آچیب، زورلا قارا قلمی ایچیندن چیخاردیر. سونرا گؤزلریمین قاباغیندا قالدیریب، سیخیر. ایکی بارماغیلا سیخاندا چیتیرتیلی سسیندن سونرا قیشقیرتیلار چوخالیر. اوره‌گیمین دؤیونتوسو سانکی بوغازیمدادیر، نفس چکمه‌گیمی چتینلشدیریر. آلنیمین تَری گؤزومون اوستونه آخیر. تؤوشمه سسیم قارانلیق اوتاقدا یاییلیر. الیمی یوموروقلاییب، کؤکسومده قوجاقلاییرام. بیر اَل بیر داها یاخینلاشیر. اؤنجه قولومو، سونرا الیمی زورلا چکیب، کؤکسومدن چیخاردیر. ماسانین اوستونه قویوب برکدن ساخلاییر. باشقا بیر بؤیوک یوموروقلو اَل، یوموروقلو الیمی یوموروقلاییر. الیمی ماسانین اوستونده آچیر. آغری الیمین ایچینده فیرلانیر. اَللرین بیری سول الیمی ماسانین اوستونده آچیب، برکدن ماسایا یاپیشدیریب ساخلاییر.
بیردن باشقا بیر ال ایچینده بؤیوک قالین جؤد دیلی ماسانین اوستونه قویور. سونرا آغ هؤروکلو توکه سورته‌رک ایتیلدیر. اللر چوخالیر، بیری بارماقلاریمی، بیری بیله‌گیمی سیخاراق، ماسانین اوستونده ساخلاییرلار. بؤیوک دیللی الیمین اوستونه تئز-تئز سورتمگه باشلاییرلار. جؤد دیل زونباتا تک الیمین اوستون اؤنجه قیزاردیب، سونرا یارالاییب، قانادیر.
گؤینرتیلی آغری قولوما یاییلیر. قیشقیرماق ایستیرم، آنجاق آغزیم آچیلمیر. اوره‌گیم ماسانین اوستونده‌کی الیم تک اسیر. قیشقیرتیلی سسلر قولاغیمدا سانکی ایستی سو قاینادیر. داشیب قولاغیمدان آخیر. تینی‌سه بئینیمی بوغور. سانکی اللر- اللریمی ماسانین اوستونه میخالیبلار تَرپه‌دنمیرم. گؤز یاشیم بورنومون سویویلا قاریشیب، باغلی دوداغیمین اوستوندن انگیمه آخیر. انگیم اسیر، آنجاق دوداقلاریمی آچانمیرام. بیردن بؤیوک عیبه‌جر اوز، قارانلیق هاوادا منه ساری گلیر، باشسیز، بدنسیز. باشیمین اوستونده فیرلانارکن گؤزونو مندن چکمیر. اللریمین اوستوندن قان آخاندا، بؤیوک دیلی اللریمدن آییریرلار. قورخو؛ آغرینی، گؤینرتینی، جانیمدا دالغالاندیریر. سیزیلتی ایچینده تئز- تئر نفس آلیرام. آغزیم آچیلسین دئیه، گاه دوداغیمی، گاه یاناغیمی دیشله‌ییرم، آنجاق اولمور.
بؤیوک دیل قانیملا قیزاریر. دیل قارادی آنجاق اوستو آغ بویالی‌دیر. ایندی‌سه قانیم اوستونده قایناییر. بؤیوک اۆز منیم اۆزومله اۆزبه-اۆز اولور. اۆزون درین قیریشیقلاری وار. دوداقلاریندان قارا توکلری آسلانیب. آغ بویالی اۆزون گؤزلرینده قارا سورمه یاییلیب. ایری گؤزلرینین آغی قان تک قیرمیزیدی، قاراسی دا قویو تک گؤرونور. اۆزون پیتلاشیق قارا ساچلاری قیراقلاریندان یئرده سورونور. اوجلاری هؤروکلو گؤرونور. بیر اوشاق دیرسگیندن انگینه میخلانیب، آسلاق قالیب. آلنیندا قیریشیق ایچینده باتمیش بیر باغلی گؤز وار.
درین نفس آلیرام باشیمی آرخایا چکیرم. بؤیوک اۆز چاتلی دوداقلارینی آچیر. دوداقلاریندان قارا سو آخیر. آغزیندا دیشلری یئرلریندن چیخیب، اویناییر. اونلارین چیخماقلاریندان آغیزی قانلا دولور. آنجاق آغیز دولو قان ائشیگه تؤکولمور. بؤیوک ال، بؤیوک دیلی آغزین ایچینده یئرلشدیریر. دیل آغزین ایچینده ساغ- سولا اوینایب، دیشلری قیریر. آغزین چیرک ایگی اوره‌گیمی بولاندیریر، آنجاق اؤگومک اوچون دوداقلاریم آچیلمیر.
بؤیوک اۆز وارگوجویله منه ساری قیشقیریر، آغزیندا اولان قانی اوزومه سیچرادیر. بیردن اللرین بیری، گؤستریجی بارماقیمدان یاپیشیب، برکدن سیخیر. سیخیب وارگوجویله چکیب، چیخارتماق ایسته‌ییر. بارماغیمین اتینین ازیلمه‌سی سوموکون چیتیرداما سسین، قیشقیرتی ایچینده اولسام دا ائشیدیرم. نفس چکمگیم سیزیلتیلی سسیمله قاریشیر.
آغری؛ الیمدن قولوما، چیگنیمدن ایلیگیمه یایلیب، اوره‌گیمه چاتیر. آغزیمی زورلا آچماق ایسته‌دیگیم آن، بیر ال آغزیمین قاباغینی برکدن ساخلاییر. نفسیمی زورلا آلیب، وار گوجومله ایچیمده قیشقیریرام. باشیمی ساغ-سولا چکیب، الی آغزیمدان آتماق ایسته‌ییرم، آنجاق اولموردو. گؤینرتیلی آغری جانیما یاییلیر. بارماغیمین اویناغیندان خیرچیلتیلی سسیله قیریلماسینی، دریمین بیر-بیریندن قوپاریلماسینی جانیملا دویورام. آغزیم باغلیدیر، آنجاق قان تَر ایچینده قیشقیریرام.
گؤینرتیدن، آغریدان یوخ، بارماغیمین داها اولماماسیندان آغلاییرام. بوز تک گؤز یاشیملا تَریم، ایستی جانیما اوشوتمه وئریر. سویوق گوجسوز جانیمی بورویور. قیشقیرتیلی گولمک‌لر؛ سسیمی باتیریر.
اوره‌گیمین دؤیونتوسو آستاجا ساییلیر. گؤزوم ماسانین اوستونده قوپاریلمیش بارماقلاریما ساتاشیر، داغینتیلی حالدا قانیمین ایچینده چیرپینیرلار. قیریق-قیریق نفس آلاراق باشیمی چیگنیمه دایاییب، آغلاییرام. گوجوم ساده‌جه گؤز یاشیما چاتیر.
بیر بؤیوک ال بارماقلاریمی ییغیب، اووجونا آلیر، بؤیوک اۆزه ساری آپاریر. اوز آغزینی آچیر، بارماقلاریمی آغزینا دولدورور. اۆز آغزی آچیق اولاراق، بارماقلاریمی چئینه‌مگه باشلاییر. دیشلرین آراسیندا بارماقلاریم سیناراق اَزیلیر. سونرا هؤروکلو ساچلاریمی باشیمدان دَریمله بیرگه قوپاردیر. بؤیوک اۆزون قیراقلارینا قانیملا یاپیشدیریر. باشیمین گؤینرتیلی آغریسی، آغزیمی آچماغا آمان وئرمیر. کوره‌گیمدن آخان ایستی قان، سویوق جانیما ایستیلیک وئریر. جانیم آغرییا اویوشموش گؤینرتیه اؤیرنمیش حالدایام، باشیمی آشاغی سالیب، گوجله نفس آلاراق، قان دامجیلارینا باخیرام. گؤز یاشیم قانیما قاریشیب قارانلیقدا یئره سوزولور. بارماقسیز اللریم ماسانین اوستونده باغلی قالیر. بیردن بؤیوک بارماقلاری ماسانین اوستونه تؤکورلر. وار گوجومله باشیمی قالدیریرام، بارماقلاریمی باشقا قانا باتیریب، الیمه یاپیشدیریرلار. بؤیوک اوز ماسانین او باشیندا قارانلیق ایچینده یوخ اولور. الیمه یاپیشان بارماقلار، دیرناقلاریندان قارالماغا باشلاییرلار. قارالدیقجا آغریلاریم یئنی‌دن باشلانیر. سیزیلتیلاریم آغزیم باغلی اولاراق قیشقیرمایا دؤنور. اللر؛ الیمین قاباغینا آغ کاغاذلا کیچیک قارا قلم قویورلار. گؤستریجی بارماقلاریلا قلم- واراغی گؤستریرلر. آغریلار چوخالیر، گؤینرتیلر گوجلنیر. آنجاق گؤز یاشیم قورویوب. قیرمیزی بؤیوک گؤزلره باخیب، اؤتری گولومسه‌نیرم. اوز بیر داها منه ساری گلیر. بیردن اوره‌گیم بولانیب، قوساق آغزیمدا شیشیر. ندنسه آغزیم آچیلیر، قان دولو دیلیمی ماسانین اوستونه قوسورام. دیلیم ماسانین اوستونده چیرپینیر. قانیم واراغین یاریسینی قیزاردیر. قیشقیرتیلی گولوشلر دایانیر. گولومسه‌نیب، اولمایان گؤستریجی بارماغیمی قانیما باتیریب، واراغین اوستونده وار گوجومله بیر سؤزلر یازیرام. سونرا بؤیوک اۆز آغزینی بؤیوک آچیب، اوجادان قیشقیرماغا باشلاییر. ایکی گؤزو یومولور، آلنینداکی بؤیوک گؤز آچیلیر. ساده‌جه قیرمیزی گؤزو، انگینده‌کی میخلانان اوشاق، ماسانین اوستونه دوشور. قانایان قانیمدا جانلانیب او دا قیشقیریر. گؤزدن قارا قان آخیب، اوشاغین اوستونه تؤکولدوکجه اوشاق ارییر. آغزیمین آچیلماسی اوچون اوجا سسله گولمگه باشلاییرام. قیشقیرتیلار ایچینده اوجادان گولورم. اوشاغی اَرییر‌کن گؤرنده، اوجا گولوشوم آغلاماغا، سونرا دا قیشقیرتیا دؤنور.
باشیمی قوللاریمین اوستوندن قالدیریرام. آچیشقادان ائشیگه باخیرام، بولوتلار گاهدان گونشین اؤنونو توتورلار. آچیشقانین تاخجاسیندا اولان گولوم؛ قیرمیزی گول آچیب. کؤلگه‌سی ماسامین اوستونده آغ واراغیمین اوزرینه دوشوب. قارا قلمیم یازدیغیم سؤزلرین اوستونده اوزانیر. بیر درین نفس آلیب قارا قلمی گؤتورورم. دوشونجه‌م چالیشماغا باشلاییر…
سون
