کامیون چارپدی. موتورسیکلئتیم و من هاوادا اوچوروق. شوفئر، بیر وحشی حیوانا چارپدیغینی دوشوندو بلکه ده.
من تسللی توپراق… اوتوز ایکی یاشیندایام. کیملیییمده تسللی‌کار توپراق یازیلیب. آتام اؤیله قویموش… دئییل افندیم. منی آتام هئچ گؤرمه‌ییبدیر. آناممی، آه افندیم آنام دا هئچ گؤرمه‌ییب منی. نئجه؟ آنامی وورموشلار. بیر اضطراری سئرویسده بیر اؤلودن دوغولموشام.
بیر یئتیم یوردوندا ایکی گنج باخیجی قادین آدیمی قویموشلار. باخیجی قادینلار ایچمکده‌یمیشلر. اورهان گنجه‌بَیین «بیر تسللی وئر» ماهنیسینی دینلرکن منی یوردا گتیرمیشلر. تسللی اولموشام ایکی خانیما. اویناتمیشلار منی. هاوایا آتیب توتموشلار فیلان -دوشورموش ده اولا بیلرلر. – ایمَکلرکن آرخادان بیر توسباغا کیمی چیرپینیشیما باخیب تسللی تاپمیشلار. ایچین ایچین آغلاییشیما باخیب حوزونلنمیشلر، ایچمیشلر. هاردان بیلیرم بونلاری؟ بیلمیرم افندیم. من کیمسه‌سیز بؤیوموش بیرییم. خوشبخت بیر کپچمیش اویدوراجاق دئییلم! فقط باخیجی ایکی قادین گرچک. بوندان دا امین دئییلم، بیریلری منی خوشبختلییه گؤتورموش اولمالی.
اوخولا باشلادیغیمدا منی اوخولا یولا سالان بیری اولمادیغی اوچون دؤنوب هئچ آرخاما باخمامیشام. قارشیلایان دا اولماییب اوخول دؤنوشو. یوردون او بؤیوک قاپیسینی زورلا آچیب یورد باغچاسینین جیغیر یولوندان کئچیب چارشافلاری هفته‌لرجه یویولمایان یاتاغیما اوزانیب تاوانا باخدیغیمدا اؤزومون گؤرونمز اینسان اولدوغوما قرار وئرمیشدیم. یورددا و یا اوخولدا اوشاقلار منیمله اوینامازدیلار. باخیجیلار منی یومازدیلار. معلم تکلیفلریمی کونترول ائتمزدی. نوتلاریم آچیقلانمازدی، اما درسیمی کئچردیم. گؤرونمز اوشاق ایدیم. بونو چوخ زامان تجروبه ائتمیشدیم.
مئیوه توکانیندان بیر شئیلر گؤتوروب اورداجا یئییردیم توکانچی دؤنوب هئچ باخمیردی دا. پشمک‌ساتان کیشییه ده عئینی ایشی گؤردوم. من یوخ ایدیم. وار ایدیم اما هئچ کیمسه منی گؤرموردو. ماساداکی کول قابی یا دا پانچ… قاریشدیریلان زیبیل قوتوسوندا بوروشوق کاغیذ پارچاسی. اورادایدیم، اما یوخ ایدیم. سانکی تانری قوللانما تاریخی کئچمیش بیر حیاتی منه وئرمیشدی. کیمسه دؤنوب اوزومه باخمیردی. دیلنچیلر بئله بایاتیمیش قیدالاری توکتمز. من نه‌یی توکتیرم؟
درینلردن گلن بیر دوشمنلییم ده یوخدو. هر شئیه رغمن منی یوخ سایانلاری سئوه بیلیردیم.
بیر دؤنرچی‌نین اؤنونده یئمه‌ییمی یئییرکن توکانیندا چالیشان قیزینین منه عاشیق اولماسی اوچون دوعا ائدردیم. تانریم منی گؤرورسنسه یاغیش یاغدیر. هئچ چتیریم ده یوخ ایدی.
اینسان اؤزویله اؤزو اولمایانین آراسیندا بیر سینیر چیزرک اؤزونو باشقاسیندان آییریر. من یئته‌نکدن یوخسون ایدیم سانیرام. آشیریلیقلاریم اولسایدی، اؤزوم اولاجاق ایدیم بلکه ده. آما همیشه بیر عادی یولچو ایدیم، دوزلویومه ساریلیب کوچه‌یه چیخسایدیم منی گؤره‌جک ایدیلر… سانمیرام… کوچه‌ده یورویوردوم. وار ایدیم. یورویوردوم. گؤرونمه‌دن یورویوردوم. یاخاما یاپیشان، اته‌ییمدن چکن بیر شئی یوخ ایدی. من یوخ ایدیم؟ بیر دین خادیمی بئله دئمیشدی – او زامانلار تانرینین گؤزونه گؤرونمه‌یه چالیشیردیم. تانرینین گؤزو ده یوخ ایمیش- «سنی آللاه یارادیب، وار اولماق ایسه سنین اؤز ایشیندی». ایندی ایندی آنلاییرام. بو قده‌ر یوخ اولماق، ساده‌جه تانرینین باجاریغی اولمالی منیم دئییل.
ایییرمی یاشیما کئچدییمده بو اوچ شئی آراسیندا بیری اولماغا قرار وئره‌جکدیم. یا تانری اولاجاق ایدیم یا شئیطان یا دا… مؤحتشم بیر دئپرسیونا گیرمیشدیم. بیر شئیلره بویون ایمه‌یه ده هئچ نیتیم یوخ ایدی. یازار اولماغا قرار وئردیم. بو تانریدان و شئیطاندان گوجلو اولماق دئمکدیر. هر ایکیسینی بیر کیتابا سیغیشدیریب اونلاری کلمه‌لرین مکانینا حبس ائده بیلردیم. بیر آرا شئیطانلیقلا یازارلیغین عئینی شئی اولدوغونو دوشوندوم. نئجه اولسا هر ایکیسی ده تانرییا باش قالدیرمانین فرقلی وئرسیونلاری اولسا بئله یازارلار، تانرییا چوخ عاغیللیجا باش قالدیریرلار. ریاضیاتلا باشلامیشدیم یازارلیغا.
آه بیر شئی اونوتدوم. بیریلری منی گؤرموشدولر. اصلینده گؤزه‌ل بیر حیکایه چیخار بورادان…
ایکی مین دؤردونجو ایل ایدی، نئچه ایدی؟ آرخاداشیم Z ایله – Z، بیر اوروسپو اوشاغی ایدی – آنتالیایا قاچماغا قرار وئردیک. Z آناسیندان ایذینسیز قاچا بیلمه‌یه‌جه‌یینی دئمیشدی. آناسینین ایش یئرینه گئتدیک. آناسینی بازارلایان A اونا بیر میقدار پارا وئردی. آنتالیایا گئتدیک.
تانینمیش بیر پارتیانین باشقانی‌نین ائوینین اؤنونده بیر پارکدا یاتارکن بیر گئجه، ساپیغین بیرینین آرخامی اللمه‌سینه اویاندیم. قورخدوق، قاچدیق اورادان. «تانریم دئدیم، منی بیر قولون گؤردو سونوندا.»
سحریسی، آرخاسییلا وار اولان اینسانلارین اؤیکوسو سئریسینین ایلک اؤیکوسونو یازدیم. اؤیکو سئریسینین فلسفه‌سی، صیفیر ایله بیر رقملری اوزه‌رینه قورولو ایدی. یوخ ایله وار آراسیندا گئدیب گلن اینسانلارین پورتره‌سینی چکیردیم. یوخلوغو گؤسترن رقمین، صیفیرین وارلیغینا حئیران قالمیشدیم. یوخلوغو ایشارت ائده بیلمک… بو سیزی هیجانلاندیرمیرمی؟ یا وارلیغی سایان «بیر» رقمی. بیر، یوخلوغو بئله سایا بیلیر. نئچه صیفیر وار؟ بیر! قورخونج بو یعقوب! یعقوب دا کیم، بیلمیرم اما هیجانلانینجا یعقوب دئیه باغیرماغیم گلیر. بیلمیرم، بلکه ده ایتن یوسف منم!
او صاباح قوجا بیر فاحیشه بیزه صاحیب چیخدی. ائلویرا… ائوی چوخ گؤزه‌ل ایدی. پورتاقال باغچالارینین آراسیندان کئچیب گئدن جیغیرلا چاتیردیق گئجه‌قوندو سایاق ائوینه. اوتورما اوتاغینی ایلیق و تمیز آغ دنیز اسینتیسینین گیردییی ایکی پنجره‌یله آیدینلادیردی. پنجره‌نین اؤنونده‌کی ماسادا ایکی ماسا اوستو چیراق وار ایدی. بعضی گئجه‌لر چیراقلاری یاندیرار، بیزه، کؤلگه‌لی اوزلریمیزه باخاراق حیکایه‌لر آنلاداردی. ائلویرا بیزه آخشاملاری یئمک بیشیرردی. گنجلیینده گؤزه‌ل بیر قادین اولدوغو اللریندن و گؤزلرینده بللی اولوردو. یئمکلیک اوچون ساحیلدن توپلادیغیمیز قابیقلی دنیز بؤجکلرین قابیقلارینی قیران اللرینه دیققتله باخاردیم. هه او گؤزه‌ل بیر قیز ایمیش اوولدن. چالیشدیغی باردا، بیر گئجه اونا ساتاشان بلدییه باشقانینی اؤلدورونجه ایتالیادان قاچیب سولوغونو بورادا آلمیشدی. سونراسی معلوم. بو حیکایه‌نی ائلویرادان ائشیتمه‌میشم. من اویدوردوم، ایندی!
ائلویرا دا بیزیم کیمی گؤرونمه‌ینلردن ایدی. بعضن موشتریلری ائوینه گلیردی. اونو کیمسه ائلویرا اولاراق گؤرمزدی. او بیر قادین ایدی. ساده‌جه بدنی اولان بیر قادین. ائلویرانی کیمسه گؤرموردو. تانری ائلویرانی یاراتمیشدی فقط، اونلار ساده‌جه بیر قادین گؤروردولر.
Z، بیراوروسپو اوشاغی اولدوغو اوچون ائلویرانی بازارلاماغا باشلادی. Z تانیندیغینین عکسینه تام بیر اوروسپو اوشاغی دئییلدی. قازانجینین اوچده ایکیسینی ائلویرایا وئریردی، ائلویرانی هر یکشنبه کلیسایا گؤتوروردو.
من ده بیر پورتاقال باغچاسیندا ایشه باشلادیم. بیلیرسیز کی، پورتاقال آغاجلاریندا بیر اوشاق گولومسه‌مه‌سی واردیر. بو بول گولومسه‌مه‌لی هاوالاردا گؤزه‌ل پارا قازانماغیما رغمن من آدیمی… منیم آدیم؟ تسللی. کیمسه بیلمیردی. هر کس هئی، هوو، لان چاغیریردی. بیر آغاج قده‌ر وار اولموردوم. اولسون. یاخشی پارا قازانیردیم.
بیر گون، پاراملا گؤزه‌ل و گنج بیر فاحیشه یانینا گئتدیم. بیرلیکده اولمادان اؤنجه اوندان آدینی سوروشدوم. «نه اؤنمی وار کی؟» دئدی. سویونماغا باشلادی. «ایشینی گؤر سن.» ایکی یوخون توپلامیندان بیر زینا اورتایا چیخاجاقدی. کومیک بو، یوسوف! و جینسل ایچریکلی بیر یالنیزلیق… قورخونجدور!.. یوسوف دا کیم؟ قادینین قویوسوندان چیخدیم، ائوه گئتدیم…
ائلویرا و Z گئتمیشدیلر. بوللوجا پارا بوراخمیشدیلار منه. بیر نئچه آی سونرا Z منه ایتالیادان ایمئیل آتمیشدی. ائلویرانین قارداشی قیزییلا ائولنمیشدی، اسکی بیر قصبه‌ده یاشادیغیندان بحث ائتمیشدی –بئله بیر شئی اصلا اولمامیش. Z-یه موتلو بیر اؤیکو اویدورمالی ایدیم- من پارالاری آلیب آنکارایا دؤندوم. دؤزه بیلمه‌ییب ایستانبولا چیخدیم. بئله دوروملارا آلیشمیشدیم. ذاتن او قده‌ر آلیشمیشدیم کی بونون تام ترسی اولسا ایشلرین ترس گئتدییینی دوشونردیم. من هئچ ایشین دیبینه گئتمه‌دیم. ذاتن همیشه دیبده‌یدیم، او دیبلرده نفسیمی بیر جسددن داها فازلا توتوردوم.
ایستانبولدا، «آرخاسییلا وار اولان اینسانلار» کیتابینی باسدیرماق اوچون اوردا بوردا بوشونا گزینیب دوردوم. بیری منه سنی ایشه آلمیریق، باش وورون ردد ائدیلدی دئمه‌سینه او قده‌ر آلیشمیشام کی، بو منده بیر اؤزگوون پارتلاماسینا، حتی بیر غرورا ندن اولموشدو. کیتابیمی باسدیرا بیلمه‌مه‌ییمین وئردییی غرورلا ایستانبولون کوچه‌لرینده گئجه‌لریمی کئچیریردیم. تک بیر سورونوم وار ایدی؛ نه آجلیق نه سوسوزلوق. ساده‌جه وار اولا بیلمیردیم. تانرینین اوزونه نئجه باخاجاق ایدیم؟ وار اولا بیلمیردیم. آرخامین اللنمه‌سیندن سونرا بیر آز وارلیق سطحینه گیرمیشدیم لاکین ایستانبولا گلدیییمدن بری، ساده‌جه دال دنده‌سی چالیشان بیر ماشین کیمی ایدیم. دیگر بیر شئی ایسه –جانیمی ان چوخ سیخان بو ایدی- یوخلوغون یاراتدیغی چکیم گوجو ایدی. نه زامان «بیره» دوغرو حرکت ائتسم یوخلوق منی اؤزونه چکیب اؤیوتمه‌یه باشلاییردی. وار اولما سطحینه توللانسام، منی گؤره‌جک ایدیلر. او صیفیرلا بیر آراسینداکی بولانیق کومه‌ده بوغولوب قالمیشدیم.
بیز گؤرونمز اینسانلار بیربیریمیزی راحاتلیقلا گؤره بیلیردیک. یاشلی و یوخسول اینسانلار، ترک ائدیلمیش اوشاقلار، محو اولموش گنجلر… یاشیل چیراغی گؤزلرکن یان یانا دوردوغوموزدا سسیزجه حیکایه‌لریمیزی دینله‌ییردیک. سونرا یاشیل یانیردی، هر حیکایه اؤز ایستیقامتینده ایتیب گئدیردی.
بیر تیکینتی فهله‌سی اولاراق ایشه باشلادیم. بیر نئچه سوریه‌لی و افغانلا چالیشیردیم. بو گزگین گؤرونمه‌ین اینسانلارلا دووار هؤروردوک. لوکس بینانین دووارلارینی… هر کرپیجده بو اوتاقلارین ایچینده یاشایاجاق اولان اینسانلار هئچ بیر زامان منیمکیمی‌لرینی گؤرمه‌یه‌جکلرینی دوشونوردوم. –بو آرادا، بیر اؤیکو کیتابینی دا بیتیرمیشدیم؛ هئنری فورد٬ون دوزه‌لکه‌لری-
باسیلمامیش ایکی کیتابین ال یازمالارینی بیرینه ساتدیم. الدن دوشموش اسکی بیر موتورسیکلئت آلدیم. چاتالجا یولوندا ایلیق و یاغمورلو بیر گئجه یولچولوغونا چیخدیم…
تورپاق یئره سرت بیر شکیلده چارپدیم. موتوروم اؤز چیوره‌سینده فیرلانیب دوردو. اؤلدوممو بیلمیرم. کامیونون آرخاسینداکی قیرمیزی ایشیقلار قارانلیغین ایچینده غئیب اولدو. بیر تولکو گلدی، موتورو قوخلادی، گئتدی.
حیکایه‌نی آذربایجان تورکجه‌سینه اویغونلاشدیران: زامان پاشازاده
