توی – وای
ک. پوراکبر
سیسقا یاغیش یاغاری بشینجی گئجه‌یه قووشور، گونوزو اوستونده، یورولمادان. هردن بیر قیساجا آرا وئریب تؤشکون دریر قاچارلار تک، یورغا قاچیر. سانکی قیش دئییل، باهار و یا پاییز آیلاری‌نین ایلکی‌دیر، آمما ایچینده هردن بیر قار گیله‌سی قیش آیی‌نین اولماسینا بلگه‌دیر، سویوق، چیله سویوغو تکجه یاندیریجی دئییل. بولودلار آی ایشیغینین یئره یئتمه‌سینی نه قدر اؤنله‌سده، او اؤز شفق‌لرین آغ بولودلارین آراسینا سوخاراق بَیاز پانبیغ‌لی بیر سما یارادیر.
بو بیاز سمانین آلتیندا گئنیش گؤزه‌ل خیاوانلاریلا، پالچیغلی کوچه‌لریله، عرشه قوزانمیش بینالاریلا، چیی کرپیجدن تیکیلمیش دام‌لاریلا، صفالی پارک‌لاریلا، کرخانالارین توستوسو دولو محلله‌لریله، روشوته غارته دایانان خائین اللرین آوروپا یاغماکار اللرنن بیرلییی ایله، چوخونلوقدا اولان یارادیجی و امک صاحیب‌لریله، بؤیوک بیر شهر دایانیب.
بوراسی شهرین آشاغاسینین قیراغیدیر .
بوراسی اؤز هاواسیلا، داشیلا، تورپاغیلا، ائولریله، پالچیغلی دار کوچه‌لری ایله، آداملاریلا… شهرین آشاغی‌سی‌دیر. آشاغی‌سینین آشاغی‌سی. چیی کرپیجدن هؤرولموش داملار، بیر بیری‌نین قارنینا گیررک نیظاملی نیظامسیز اَیری مویری کوچه‌لرین کنارینده رنگلی- رنگسیز قاپیلارینی دوزمکده‌دیرلر. سوبا برولاری دامین، دوارلارین ده‌لییندن بوغازلارین گؤیه آچاراق توستولرین هاوایا هووخوروب جانلاریندان چیخان ایستی‌له ائوده‌کیلره شیرین یوخو اورتامی یاراتماقدادیرلار. بوراسی اوزاقدان باخان گؤزلر اوچون، بوخارلاشماقدا اولان تیترک بیر گؤرونتو سرگیلییر. بوردا یاشایان اینسانلار شهرین یوخاری باشیندا یاشایان آغالاردان بام باشقا بیر یاشام سورورلر. بورادا آخشام سحره دک طمطراقلی قوناقلیقلاردان، دانس مجلیسلریندن بیر اثر یوخ. اونلار شهرین یوخاریسیندا اولان کابارالاردا، رستوران‌لاردا، زرق- برقلی آپارتمانلاریندا یئییب ایچیب اوینایاراق گئجه‌نی صبحه قووشدوروب، گونوزلر شیرین یوخو قوینونا گیررلر، بونلار ایسه کرخانالارین جان آلیجی قییناغیندان رخصت اَلده ائدرک، ائرته‌دن کَپرَم آلتیندا یورقونلوقلارین دَره رَک سَحَر تئزدن کرخانانین امانتین یئنی‌دن الینه تاپشیرارلار.
آمما نه ایسه بیر نئچه آیدان بَری شهرین یوخاریسی اومودسوزلوغا اوغرامیش، آشاغیداکی‌لارین ایسه اوره‌ک‌لرینده اومود چیراغی یانیب، اوجاقلاری قالانیب.
– سیرفانی گؤتوردون اوردان؟ اونودارسان سَحره کیمی دامجی چوره‌یین هامیسین پایمال ائدر ها…اولماسا بیر قاب قویایدین دامجینین التینا…پولاد یورقانین آلتیندان باشین چیخاردیب فریده‌یه دئدی.
فریده بیر آنلیغا سیرفانی خاطیرلاییب بیر از شوبهه ائدرک یادینا چؤره‌ک سیرفاسی‌نین یئرینی سهمانلادیغی دوشوب، یورقانی چنه‌سینین آلتینا قده‌ر ائندیریب دئدی:
– آرخایین اول… قاب قالیب کی…
پولاد یاتدیغی یئرده ائوین قارانلیغیندا باشین توولایب
– تاری‌نین کرمینه شوکور …آخی قیشدادا بو قده‌ر یاغیش اولار؟ دئدی.
اوچ گوندو هاوالار یاغشلی کئچدیییندن داملار یئترینجه ایسلانیب، دامین دیره‌ک‌لری آراسیندان دامجیلاماغا باشلامیشدی. فریده تکجه اوتاغلاریندا هر دامجینین آلتینا بیر کاسا، بوشقاب قویاراق ائوده‌کی دؤشه‌نه‌جیین ایسلانماسینین قاباغین آلیردی.
پولاد ائوین قارانلیغی سکوتونده فیکره دالمیشدی. بو سکوت محض بیر سکوت دئییلدی، چونکی هر دامجینین نوبت‌له اؤز قابینا دوشمه‌سی ائوه حاکیم اولان سکوتو هارمونیک بیر شکیلده پوزوردو. بونا باخمیاراق کوچه‌دن کئچن آوارا ایتلرینده هر دَن بیر هوروشو بو پوزقونلوغو داها دا آرتیریردی.
– گرک فرهادا دئییم صاباح …
– صاباح فرهادا تاپشیر دامی یاخشیجاسینا آیاقلاسین. فریده‌نی خیطاب ائدرک دئدی.
فریده دن بیر جاواب چیخمادی.
– بلکه ده یوخلامیش، اؤزونه دئدی.
گؤزلرین یومدو، یورقوندو، یوخلاماق ایستیردی. بو یورقونلوق فابریکا ایشیندَن دولائی دئییل، بلکه ده اعتصابلاردان، شعارلار وئرمه‌دن، اوزون موددت خیاوانلاردا یول یئریمکدن دولایی ایدی. کئچن گونون ماجرالاری، اعتصاب‌لار سوره‌جینده ائشیدیب اؤیرندیکلری، بئینی‌نی فیرتینالار عالمینه چئویررک یوخویا میدان سولاییردیلار. پولاد دؤرد آیدی فابریکا اَمکداشلاریلا ایشدن اَل چکرک اعتصابلارا، گؤستری‌لره قوشولموشلار. بو موددت ده او چوخ شئی‌لر اؤیرنمیشدی. هر گئجه یاتارکن یئرین ایچینده اؤیرندیکلری، گؤردوکلری بارده دَرینجه‌سینه فیکیرلشیب، اونلاری اؤزو اؤزونه قاوراییردی، قاورارکن یوخلاییردی. آمما بو گئجه بام باشقا، سانکی بو ایشین سونونا وارماقدا ایدی. اونا گوره، بعضاً زامان آنلامین ایتیریب حادیثه‌لر زامانا اییلمییه‌رک بیربیری‌نین آردیندان اوز وئریب، بعضاً ده دامجیلارین هر آهنگی بیر حادیثه‌نی تمثیل ائدیردی…
– دوستلار داها او زامان کئچیب…هر ایشچی اَن آزی آلتی یئددی کیلاس ساوادا مالیک‌دیر، گؤردویو شئیی اؤزونه گوره یاخشی درک ائدیر، بیزیم خیال‌نان زادنان ایشیمیز یوخدو. “مَمی‌موتور” دئدی. هامی اَل چالدی.
حسن مَرَددی دئدی:
– اون بئش ایلدی جان وئریرم هله بیر دام صاحیبی اولمامیشام، یئنه ده ایجاره‌نیشینم، اودا هاردا؟ شهرین خارابالاریندا، “آقای میلانی” همشه قول وئریب! آقای میلانی، بیر ساعات ایشه بئواخت گلسم قیرانینا کیمی حقوقومدان چیخیرسان، چوخدا دانیشسام قولاغیمدان توتوب ائشییه آتیرسان…
ایشچی لر هر طرفدن – اؤز تخصیریمیزدی … باییث اؤزوموزو…مرگ بر میلانی… دئدیلر
صمد سیبیل:
– دوستلار فیکریمیزی ساپتیرماییب تقصیرلری بوینوموزا یغمایاق، نه “میلانی” ده تقصیر وار نه بیزده، میلانی‌لر اربابلارین یالنیز بیر عامیلی، قولدورلاری‌دیرلار، بو شاه رژیمی‌دیر کی بیزی هر شئی‌دن محروم ائدیب، نییه تاجیرلر “اتحادیه‌ی بازاریان”، ” انجمن بازاریان” آ مالیک‌دیرلر، آمما بیزلردن دؤرد نفر بیر یئره توپلاشاندا اولوروق “خرابکار”، یوخ قارداشلار اصیل دوشمانی تانییاق، او شاه رژیمی و اونون خاریجی ارباب‌لاری‌دیر…
هامی بیرلیک ده:
مرگ بر شاه…مرگ بر شاه….
دامجیلار بیر عسگری موزیک دسته‌سینین طبلی تک پولادین بئینین‌دن قالخان شعارلاری موشایعت ائدیردیلر. پولاد بیر آنلیغا اؤزون دامجیلار عالمینه تاپشیردی. دام… دووم…چاک..چوک. هر بیریندن آیری آیری سسلر یاییلیردی، آمما سسلرینه باخمیاراق اونلارین هر بیری بیر قییق تک جانینا باتیردی. تکجه اوغلو، فرهاد یادینا دوشدو.
– اوستونه دامیب یورقانین ایسلاتمییا…صاباح یولداشلاریندان یاردیم آلاراق دامی یاخشی آیاقلاماسی لازیم….وضع گئتدیکجه خارابلاشیر…گاردلاردا وحشیجه‌سینه گولله یاغدیریرلار، فرهاد خیاوانا چیخماسا یاخشیدی…
بیر آن جانین قورخو بورودو، دامجیلاردان بیری یوغون بیر سسله …دارامب، اوتاغین قارانلیغیندا بیر توفنگ گولله‌سینین آچیلدیغینی ساندی…
– یوخ آلله ائله‌مسین… دئییب اوره‌یین آرام ائتدی. “وحدت عمی” نین سؤزلری یادینا دوشدو:
– هر بیر اجتماعی حرکت ده هرکس هر اجتماعی صینیف اؤز صینیف‌سال چیخارینا گوره حرکتین سَهمانلار، بوندان باشقا، اورتاق بیر چیخار دا سؤز موضوسو اولابیلر، آمما بیز ایشچیلرین ایسته‌یی اَن تمل ایستک‌دیر کی بوتون اجتماعی زومره‌لرین ایستیین ده تمثیل ائدیر، صاباح اللاهین کؤمکلیگی‌له شهرین مرکزینه ساری بوتون جاماعاتلا بیرلیکده…سعادتلی گلجک بیزیمدی…
پولاد، – صاباح میدانا ساری… دئییب اؤزون یوخویا تاپشیردی.
***
نودان‌لاردان سو کوچه‌یه سوزور، کوچه‌دکی داشین اوستونه ده‌یرک پارچا پارچا اولوب هر بیر طرفه سیچراییردی. بلکه ده سیسقا یاغیشین داملار اوستونه یاغدیغینین یارسیندان دا آز قیسمی‌ایدی بو. کوچه‌دن گئدن‌لر پالچیغ‌لارین آراسیندان بیر جیغیر تاپاراق اوزی یوخاری ساری ایره‌لی‌له‌ییرلر. هر کسین الینده بیر شمسییه، آمما شمسییه‌سیزلر ده وار. قارا شمسییه، آغ شمسییه، قیرمزی، یاشیل …رنگ به رنگ شمسییه‌لر. شمسییه‌لر چشیدلی اولسالار دا گئدریسی عینی‌دیر. بو آخیش هرکسی اؤزونه ساری چکرک یول یولداشی ائدیردی. فرهاد دا ائوین ایچینده‌کی دامجیلاری اونوداراق بو یورویوشه قوشولدو.
فریده، دامجیلار، قابلار. او قابلارداکی چیرک‌لی سولاری توپلایاراق دامجیلارین آلتین سهمانلادی. بیلمیردی بئله بیر وضعیت نه زامانا قده‌ر دوام ائده‌جک، آمما هر حالدا سیسقا یاخیش کئچن گئجه‌دن بیر آز سه‌یریمه‌یه ساری گئدیردی.
– فرهاد یاخشی آیاقلاسا بلکه ده بو سووخا تئز کسیله، دییه‌رک ائوین دامجیسی اولمایان بیر سمتینده اوتوردو. اصلینده اونو اوتوردان قارنینداکی اوشاق ایدی. اوشاق هله اوچ – دورد آیلیق‌ایدی، بونا گوره گئییمینین آلتیندان او قده‌ر ده بَللی اولموردو. بلکه ده پولاد دا بیلمیردی حامیله اولدوغون. سحر پولاد ائودن آیریلارکن داریخماماسینی تاپشیریب و «اینشالله بو گون گورَی نینیریک» دییه آیریلمیشدی. فریده ایسه اونا اؤزیندن موغایات اولماسینی ایسته‌میشدی. فریده کندده ایکن آلتینجی کیلاسا قده‌ر اوخوموشدو، آمما کندده اوخوماسینین دوام ائتمه‌سینه ایمکان اولمادیغیندان، تحصیلین یاریدا قویموشدو. او پولادی چوخ سئویردی، هر زامان اونونلا خوشبخت بیر حیات آرزوسوندا ایدی. پولاد دا اَلیندن گلنی بو مقصد اوچون خرج ائدیردی. آمما اونون حیات‌دا قولونون قودرتیندن باشقا بیر شئیی یوخ‌ایدی، اونودا اربابلار چوخ اوجوز آلیردیلار. وحدت عمی سؤز ویریردی کی “انقلاب بیز ایشچی‌لره اوغورلو اولاجاق.” پولاد وحدت عمی‌یه اینانیر، اونون سؤزلرینه گؤوه‌نیردی. او فریده‌یه بئله دئییردی: “فریده، دونیا بئله قالماز، بیر گون اولار بیزیم ده آتیمیزین دوشونه گون شاخار.” فریده گولومسونوب دئییردی: “بیزیم گونوموز فرهاد.”
فریده ائوده داریخمیردی، چونکی او یالنیز دئییلدی. یئنی بیر حیاتین انتظاری اونو هئچ داریخمیردی. او بیر آنا اولاراق چوخ اوزاقلارا گؤزون تیکمیشدی. اَلین قارنینا قویوب ببه‌یین نازلاندیریردی:
– داریخمارام … ببه‌ییم، هر انتظار آجی دا اولسا بو انتظار شیریندیر… ساغلام اولومون اؤنَملی، ساغلام اولسا اوغلوم- قیزیم، طبیعتی ده، حیاتی دا ساغلام اولوب اینسانلاری دا ساغلام گؤرر. داریخمارام … ببه‌ییم، داریخماسام دوغماسان، داریخمایان حیات‌سان، داریخدیرمایان حیات‌سان، گله‌جه‌یه اومود- ایشیق، کئچه‌جه‌یین سون اوجوسان، حیات اوجاغینا یئنی شعله وئریب سماسینی یئنی شفق‌لرله سوسلویاجاقسان، داریخمارام … ببه‌ییم، فرهادین گؤزلری یولدا…..
«فرهاد»دئدیینده درحال حیطه سیچرایب دامین اوستونه باخماق ایسته‌دی. اوره‌یی سخیلیردی، ببه‌یینَن خوسونلاشدیغی موددتده بو دونیادان خبرسیز ایدی، سانکی باشقا بیر عالمده. اوتاغین خیرداجا حیطه آچیلان قاپیسینا یاووقلاماق ایستییردی، آمما یاخینلاشامیردی. قاپی دئییردی “منی آچ” او آچا بیلمیردی. بیر آن آیاق ساخلاییب قولاغین قاپینین آرخاسیندان گلن سسلره تاپیشیردی. توفنگین، مسلسل‌ین گولله سسی بیر آن آرا وئرمیردی. فریده نئچه آی ایدی گولله سسی ائشیدیردی، آمما بو گونکو بام باشقا بیر شئی ایدی، گولله قوورقا کیمی اَلَنیر، بیر آن آراسی کسیلمیردی. قاپییا دوموخاراق قالمیشدی. قوللاری قاپینی آچماغا گلمیردی. بیردن قاپی آچیلدی. “گول‌جهان خالا” تله‌سیی ائوه گیردی. فریده قورخاراق ایکی- اوچ قدم گئری چکیلدی. گول‌جهان خالا هم قورخور، هم سئوینیر و هم فیکیرلره دالمیش بیریسینه بنزه‌ییردی. فریده گول‌جهان خالانی بو وضعیت‌ده گؤروب:
– نه اولوب !؟ دئدی
– بس ائشیتمیرسن؟ شهرده قیامتدی… گول‌جهان خال دئدی.
فریده بو سؤزو ائشیدیر – ائشیدمز قاپییا ساری یورودو، گول‌جهان خالا اونو بوحالدا گؤروب قولوندان توتوب سوروشدو:
– هارا؟ هاوایی گولله ده‌یَر. عصبی وضعیت‌ده سسین یوکسلدرک دئدی.
فریده اوزون چئوریب گؤزون گول‌جهان خالانین گؤزونه زیلله‌یرک اضطرابلی بیر سسله
– فرهاد!؟
بارماغینان دامی گؤستره‌رک دئدی.
– اوست ده، دامدادی…
– دامدا کیمسه یوخدو، بوتون جاوانلار شهره ساری یورویوبلر. گول‌جهان خالا گولومسییرک دئدی.
فریده بونو ائشیدیب اؤزون چاره‌سیز گؤروب، قوللاری یانینا دوشدو. گول‌جهان خالا اونون بو حالینی گؤروب قولوندان توتاراق دئدی:
– هَله گل اوتور، اؤزوی سیخما، اینشالله بیر شئی اولماز، بوتون قوجا – جاوان هامی شهرده‌دیر، اینشالله دییه‌سن ایش بیر ته‌هَر اولور…آمما بیلمیرم! گؤره سن واختی‌دیر؟
فریده بئله کدرگین سؤزو گول‌جهان خالانین آغزیندان ائشیدیب اؤزونه گلدی.
– نجه یانی “گؤره سن واختی‌دیر” آی خالا، نه دئمک ایستیرسن!؟
گول‌جهان خالا بو سَفَر گؤزلرینی یئره زیلله‌ییب فیکره دالدی. سول قولو قوینوندا ساغ اَلینین ایشاره بارماغین اوتوردوغو پالازین گولو اوزه‌رینده اویناداراق خیال قانادیلا کئچمیش‌لره اوچموشدو. خیسین – خیسین زومزومه‌سین باشلادی:
– هه قیزیم، هر ایشین بیر واختی وار، آلما یئتیشمه‌ینه قدر یئره دوشمز، یئتیشسه بیر ایشاره ایله اووجوندا اوتورار، همده دادلی، طاملی، سولو اولار، یئتیشمه‌ین آلما کال‌دی، کال آلمانین دا فایداسی اولماز…
فریده گول‌جهان خالانین سؤزلرینی کسه‌رک
– آی خالا پولادا دا دئییرم دونیا نئجه اولور اولسون بیزه ایشچی‌لیکدن سوائی بیر شئی چاتماز. دئدی.
گول‌جهان خالا دریندن بیر آه چکدی، شهردن گلن گولله‌لرین سسی کچمیش خاطیره‌لری سینما پرده‌سی کیمی گؤزلری‌نین اؤنونده جانلاندیریردی. “حسن”له ائولنمه‌سی بیر ایله یاخین ایدی، – حسن فیرقه قوشونونون چالیشقان عضولریندن ایدی. فیرقه، یئرلری مالیک‌لردن آلاراق کندلی‌لر آراسیندا بؤلموشدو. حسن ده باشقا کندلی‌لر تک ایسته‌ییردی ایللر بویو اکیب بئجَردییی یئرین بهره‌سینه اؤزو مالیک اولسون. بیر پارچا تورپاغین اوستونده اؤزو دورسون، اؤزو اکسین، اؤزو بیچسین، حسن رحمتلی آرزوسونا چاتمیشدی، آمما خان‌لار، اونون قولدورلاری، قولاغی توکلولر شاه رژیمی ایله بیرلشه‌رک، فیرقه‌چی‌لره تهمت‌لر یاغذیراراق بو آرزولاری قان ایچینده بوغدو…
او یاخاسین چتین‌لیک‌له خاطیره‌لرین اَلیندن قورتاریب
– قیزیم هله ده دؤز! یاخشی دئییب‌لر «سن توخودوغوو توخو، گؤر فلک نه لر توخور»، دونیا حسابسیز- کیتابسیز دئییل. فریده‌یه دئدی.
گون اییلمیشدی، آمما هر بیر گولله‌نین سسی گول‌جهان خالایا یئنی بیر خاطیره آندیریردی. بعضاً گولوردو، بعضاً باهار بولودو تک دولوردو، سونرا گؤزلریندن یاشلار سوزولوردو. فریده سوساراق گؤزلرین گول‌جهان خالانین آغیزنا دیکمیش هر بیر خاطیره‌سین ائشیدیب اؤز حیاتی‌نین گئدیشی و گله‌جه‌یی ایله اویقولاییب موقاییسه ائدیردی. شهردن گلن گولله سسلری، آمبولانس آژیرلری گول‌جهان خالانی فدائی اَری حسن‌ه و اونون فیرقه‌سینه قووشدورموشدو، فریده ایسه اؤز عالمینده پولادین، فرهادین و قارنیندا کی ببه‌یین اضطرابی ایله یاشاییردی.
بو دار، قارانلیق، دامجیلی ائوده سانکی دونیا آیری بیر دونیا ایدی، آمما بو ائوین حال و هاواسی یئنه ده شهرده کئچن پراسس‌دن آسیلی ایدی.
فریده داریخاراق آیاغا قالخماق ایسته‌دی، بو ایشی باجارماییب اوتوردوغو یئرده قالیب، اللرین قارنینا قویدو. گول‌جهان خالا اونون بو حالینی گؤروب ماراقلاندی.
– قیزیم نه اولوب، حالون او قده‌ر ده خوش گؤرونمور!؟ سوروشدو.
– هه گول‌جهان خالا، آخی…دئدی
گول‌جهان خالا فریده‌نین قارنی اوزه‌رینده‌کی اللرینه ماراقلا باخاراق
– قیزیم اولمییا بویلوسان؟ اَلی‌له فریده‌نین باشین طومارلیاراق سوروشدو.
– هه خالا ائله‌دی، فریده اوتاناراق دئدی.
– اَلونده اووجوندا گؤرَسَن بالام، سالاماتلیق اولسون…
غفلتا حیط قاپیسی آچیلدی، چیرپیلاراق آچیلدی، هَنیرتی‌لر گلدی. گول‌جهان خالانین طومارلایان اَلی بیر نقطه ده قورویوب قالدی.
– بلکه ده گاردلاردی، هر بیری بیر بوجاغی آختارماغا باشلاییرلار، اللرینده توفنگ، گؤزلر کلله‌ده،- کدوم سوراخ قایم شدی؟ پدر سگ… ، حیطده اولمایان شئی‌لری داغیدیب ویران ائدیرلر، فریده گول‌جهان خالانین قوجاغینا سیغینیر، اوره‌یی آز قالا یئریندن چیخاجاق…ساکیتلیک هر طرفی بورویور، داها گولله سسی گلمیر، گول‌جهان خالا دا قورخوب، او هئچ زامان بئله قورخمامیشدی، حسن‌ی بیله شاهین قولدورلاری آپاراندا. ایکی‌سینین ده گؤزو ائو قاپیسینا دیره‌نیب، آمما قاپی ندنسه آچیلمیر.
اورتاما حاکیم اولان سوکوتو قاپینین آرخاسیندان باشلانان بیر اینیلتی پوزور، چوخ حزین بیر اینیلتی، سانکی اوتانیر و یا جرأت ائتمیر ناله‌سین اوجالدسین. آمما دردین نه قده‌ر آغیر اولدوغو اونو زورلاییر، اینیلتی، اینیلتی‌لره چئوریلیر، اینیلتی‌لر ناله‌لره… قاپی آچیلیر، یاواش یاواش، بلکه ده اوتانیر آچیلماغیندان، اوتانسادا، اوتانماسادا آچیلماسی گرک، قارا سمانین بوز ایشیغی، ناله لرین فغانی، فریده‌نین قورخولو اوزونه چیرپیلیر. بوز ایشیغین اورتاسیندا «آیدین»، فرهادین دوستو، دوستلاری‌نین اورتاسیندا…
– بس فرهاد!؟ بو فریده‌نین وحشت دولو سئوالی ایدی.
ناله‌لر فغانه دؤنوب اوجالدی…
– جانیم اؤلسون، ووردولار…؟ دئمک ووردولار…! گول‌جهان خالا دییرک یومروقلارین دویونله‌دی…
فریده‌نین گؤزلری‌نین گیله‌لری یاش ایچینده اوزوردو. گؤزلرین قاپیدان گؤرسه‌نن قارا بولودلارا زیلله‌میشدی. گؤزلری‌نین یاشی آخمیردی، اولدوغو یئرده دونوب قالمیشدی. اونون گؤزلری سانکی قارا بولودلار آرخاسیندا بیر شئی آختاریر بو عالمده دئییلدی. چارشابی باشیندان دوشموش چیین‌لریندن ساللانمیشدی. گنج اوغلو اؤلموش‌لر تک آغلاییب ناله ائتمیردی، ناله ائدن‌لره ده قوشولموردو. اوتوردوغو یئرده قامتین دوز توتموشدو.
فریده‌نین بو حالی ناله ایله آغلایانلاری ساکیت‌لشدیریب، شاشیرتماغا ساری سوروکله‌دی.
– قیزیم! فریده؟ گول‌جهان خالا اونون قولوندان توتاراق دئدی.
فریده هئچ نَیین فرقینده دئییلدی، آمما ایچینده بؤیوک بیر فیرتینا باشلنمیشدی. او اَللرین قارنینا قویوب اوزون بیر فغانلا فریاد ائتدی… سانکی دونیانی طبیعتی ایله، اینسانلاریلا ایچینده کئچن فیرتینا سئیرینه چاغیریردی. فریده ببه‌یینی ده ایتیرمیشدی…
گول‌جهان خالا فریده‌نی قوجاقلایاراق
– “فلک” یوخ ، اؤزوموز توخومالییق… اؤزو اؤزونه دئدی.
پولاد کیچیک حیطتین بیر گوشه‌سینده اوتوروب وحدت عمی‌نین، صمد سیبیل‌ین سؤزون تیکرار ائدیردی.
***
قیشین دوندوروجو بیر گونو ایدی. سویوق قیلینج کیمی کسیردی. گؤیلر ماتملی‌لر کیمی، قارا چارشابا بورونموش، داغلار، چؤللر آغ کفن‌له اؤرتولموشدو. کوچه‌لرده کومه – کومه دوران قارلار اوزه‌رینده قارغالار قورخمایاراق راحتجاسینا گزیردیلر. قالین قیسا، اوزون، مینجیغلی مئداللی پالتو گئیینمیش آداملار، بزه‌کلی و ایستی آپارتمان‌لاردان چیخیب، پییادا یا دا آرابالار ایچینده راحات – راحات خیاوانلاردان کئچیردیلر. بو دوندوروجو قیش، بو بَرک سویوق، اونلار اوچون اَیلنجه‌دن باشقا بیر شئی دئییلدی. شهرین آشاغی‌سیندا فابریکالار خورطوم‌لارین ماتملی گؤیه توتاراق توستوسون اونا فیسقیردیردی…
۲۱/۱۲/۱۳۹۶
