روشوت
ع. یالچین
یاغیش گؤز آچماغا امان وئرمیردی. قاپینی آچار_آچماز اؤزومو تپدیم چؤره‌کخانایا. زولاق-زولاق یاغمور دنه‌لری سیر -صیفاتیمدان اوزو آشاغی دیغیرلانیردی. اوستو باشیم جوم-جولوق سوایدی. ایکی نفر نؤبه‌ده آیدی.
– قارداش سیزدن ساوایی کیمسه نؤبه‌ده وارمی؟- دئیه سوردوم.
– یوخ
– امما خمیرین ده آخیری‌دیر چاتا چاتمایا!- شاطیر سسلندی.
اوست- باشیمی سهمانلاییب یئمکدن اومید یاخشی دئییب، گؤزله‌دیم.
گؤیون گورولتوسی شیمشکین شاققیلتیسی خیاوانداکی اداملاری دا توز- تورپاق کیمی تمیزله‌میشدی؛ قیی وورسایدین قولاق توتولاردی. نؤبه منه چاتمیشدی.
ایچری بیرنفر ده گیردی. شه‌وه ساققالینی تومارلاییب، گؤز-قاش آتیب ایهاملا نسه شاطیرا آنلاتدی. منسه هله شیدیرغی یاغان یاغیشی دوشونوردوم. چؤره‌ک حاضیر اولدوقدا شاطیر چوره‌گی گؤز- قاش آتان اوغلانا اوزاتدی. سسلندیم:
– شاطیر قارداش! نؤبه منیمدیر.
شاطیر سایمازیانا: او سندن قاباق نؤبه توتموشدی- دئیه پئشخاندان اوزاقلاشدی. بیر آن قان کلله‌مه
ووردو. حیرصیم نفسیمی کسمه‌ده ایدی. چؤره‌کخانانین کونجینده‌کی دمیر پارچاسی سانکی هیر-هیر اوزومه هیریلداماقدا ایدی. بیردن سحرچاغی عدلیه ده کی قولو قانداللی گنج یادیما دوشدو. یاناشی اگله‌شن کیشی‌دن گوناهینی سوروشدوم شیکایتلندی:
– قارداش میللت هارینلاییب، قودوز ایت کیمی‌دیر. بیلینمیر کیم کیمی توتور.
بیرآز نفسینی دردی:
– تاکسی شوفیری‌دیر. هانسی‌سا حالال سوت اممیشی بونون نؤبه‌سینه گیریب موسافیرینی چالماق ایسته‌ییب.
سونرا سؤزونه بیرآز ایستهزا قاتدی، خیسین خیسین گولومسه دی:
– بودا نه قویوب نه ده گؤتوروب؛ همن حالال سوت اممیشی عمللی باشلی ازیشدیریب. کوپک اوغلو ائله بیل ایکی موسافیرین اؤلوسو ایمیش… بیرآز سویوق سو ایچر، آغلی باشینا گلر.
سانکی یوخودا ایدیم اوستومه سو چیله‌دیلر. هوشوم باشیما گلدی. دیلیمی دیشیمه توتوب، یاغیشی سایمادان ائوه یوللاندیم.
ائوده‌کیلر منی چؤره‌کسیز گؤرنده میزیلدادیلار. من ده الله‌دان اه‌یری گؤز ایسته‌ین کور آدام کیمی بوتون حیرصمیی اونلارین اوستونه بوشالتدیم. بیرآز کئچدی. داها آتش‌بس باشلامیشدی. هره بیریاندا میسیب، اؤزویله مشغول ایدی. گوشیمی اله آلیب، سانال دونیادا بوگون گلن مئساژلاری اوخوماغا باشلادیم. گئجه تانینمیش بیر یازاردان پایلاشدیغیم یازی‌یا گوروپداشلارین فیکرینی بیلمک ایسته‌دیم. اصلینه بو یوللا اؤزومو اووتماق ایسته‌ییردیم مئساژلارین یاریدان چوخونو آلت- اوست ائله‌دیم؛ بیرشئی چیخمادی. بیرآز اؤزومه گلدیکده دوشوندوم: -نه کی یازمالیدیلار. من کی یازاری دئییلدیم؛ نه گؤزله‌مه‌لیدیم کی! – دئییب اؤزومه تسکینلیک وئردیم. داها یاواش یاواش راحاتلانیردیم. مئساژلاری اوخوماغا داوام ائتدیم. بیر نئچه مئساژ اوخوموشدوم کی منیم مئساژیمی تانینمیش بیر گورپداش فوروارد ائتمیشدی. گولله‌سی هدفه ده‌ین آدام کیمی بیرآز هوسلندیم. مئساژلاری یئنی‌دن اوخوماغا باشلادیم. چیچک‌لر قوجاق- قوجاق دوزولموشدو بو پایلاشمانین آلتیندا. تعریف‌لر یاغیش کیمی یاغیردی. هامی یاشا، لایک، نه گؤزل پایلاشما-دئیه باغیریردی. سحر تئزدن راست گلدیگیم اولایلار بیر- بیر گؤزومون اؤنونده رئژه گئتمه‌یه باشلادیلار. باشیما سانکی بیر قازان قاینار سو تؤکولدو. گوشینی بیر طرفه توللاییب، یاتاغیما گیردیم. دوشوندوم: بلکه یاتسام احوالیم بیرآز دوزه‌له؛ آنجاق ایلان ووران یاتار من یاتمارام. یاتاقدا نه قده‌ر او اوز- بو اوزه چویدومسا، گؤزومه یوخو گلمه‌دی. سانکی یوخودا روشوت ایسته‌ییردی…
