ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

hamidیاغیشلی تصویر
حمید آرغیش

اوتاغين ايشيغي يالنيز ماسا اوستونده اولان مطالعه لامپاسيندان ايدي. لامپادان سوز‌ن ايشيقدا، ‌اوتاغين اوچ طرفينده قفسه‌لنميش نازيك ـ قالين كيتابلارين يالنيزجا قارالتي لاري گؤرونوردو. ماسا آرديندا، بير صندل اوسته اؤتورموش و اللرينه سؤيكنميش «آنار»ين اوزو چيراقدان قالخان آلتون ساچاقلار قارشيسيندا، ساريليق توتموش آداملار كيمي نظره گليردي … گؤزلرين اوتاغين ايكي تايلي پنجره‌سينه زيلله‌ميشدي. چوخدان ايدي ماسا اوستونده كي چاي ايستيكانيندان بوغ حلقه‌لنميردي. مطالعه لامپانين يانيندا نئچه بير درجه‌لي مكتب اوچون درسليك كيتاب گؤرنوردو اوتاغين سوكوتون ائشكيده قالخان بولودلارين شاققيلتي سي پوزدو. آنار دريندن نفس چكيب، باشينين توكلرين أللرينه سورتدو « شام يئيه جك مي‌سن ؟»
او سس اوتاغين ائشيگيندن قالخدي … آغيزين آچيب بير زاد دئمك ايسته‌دي لاكين اوتاغين سوكوتو پوزولمادي … باشين بولادي … ائشيكده ياغيش شيره بوران ياغيردي اوتاغين چيراغين يانديراندا قارانليق مطالعه لامپاسينين دؤوره سينده بوغولدو آغير – آغير پنجره ساري دوغرو گئتدي. ائشيگي گؤرمه يه زيلله ندي … ياغيشين ايري دومورجوقلاري شوشه اوستونده آشاغييا ساري آخيرديلار. اوتاغين يانيق چيراغي شوشه ده عكس ائديليردي … عكيزين شوشه‌ده گؤردو. ..
قيافه‌سين اؤيله پوزغون گؤرمه‌ميشدي … پنجره‌يه ده‌ين ياغمور دومورجوقلاري، شوشه يه منعكس اولموش آنارين عكيزده گؤزلريندن ياناقلارينان آخيردي و اورادان أنگينه …
گؤزلرين سيلدي، لاكين شوشه‌ده هله گؤزلريندن سو آخيردي. اوتاغين وسايط‌لري شوشه‌ده آيدين گؤرونوردو … كيتاب قفسه‌لري، 1325 – ینجي ايلي تداعي ا‌ئده‌‌ن ارك قالاسي اوسته سواشلاردان چكديگي تابلو، اوتاغين تاوانيندان آسيلي اولان كؤزمه لامپا و… ايندي داها ياغيشين شوشه‌يه ده‌يمه‌سين گؤرموردو. گؤزلري شوشه‌ده منعكس اولموش چيراغا زيللنميشدي.
***
نئچه لحظه سالوندا، قاپي آرخاسيندا سوسقون داياندي. كيلاسدان گلن اوشاقلارين گولوب – دانيشماق سسلرين دينله‌دي. هر زاددان آرتيق او سسلري سئوريدي. سينه‌سين قاباغا وئريب، قاپيني تيققيلداداندان سونرا، ايچري گيردي. كيلاسين سس – كويو كسيلدي. شاگيردلرين هاميسي آياغا قالخديلار. پنجره‌نين اؤنونده قرار تاپان ماسايا طرف آغير – آغير آدديملاركن، شاگيردلري ده گؤزدن سوزدوروردو. هله آياق اوسته دورموشدولار شاگيردلر. .. بيردن نئچه لحظه يئرينده دوردو. سانكي ايلديريم ووردو اونو … بئييني قيزيشدي … كيلاسين سول طرفينده، آخير صندل ده هئيكللی بير اوغلان اياغا دورماميش، اؤيله ساكيت اوتورموشدو … اونا
زيللندي. قيافه‌سي‌ سرت و زارافاتسيزايدي – اوتورون اوشاقلار!. .. دئييب، ماساسي آخارسينا كئچدي… نئچه لحظه بويوندا، مين بير فيكير بئيينينه ووردو، نه اوچون او اوغلان آياغا دورمادي؟!
هئيكلي اوچون ايميش ؟ … بلكه‌ده كيلاسين قولدورودور … بلكه ده تزه گلديگيم اوچون مني سيناماق ايسته‌ييرلر. . اوشاقلار پيچيلداشيرديلار… نئچه لحظه اونا ساري باخدي قيافه‌سي هله ده زارافاتسيز ايدي …
ـ ياخشي دير اونلارا بير آز بؤيوك‌لره احترام قويماق حاققيندا دانيشام … اوندا او اوغلان ايشين آنلار … ياخشي دئييل ايلك گونده و كيلاسين ايلك ساعاتيندا اونا ال قووزايام. اوندا منيم يانيمدا آچيليشانمازلار …
و او ساعاتي اؤزوده بيلمه‌دي نه جور سوردو.
***
پنچره‌ده منعكس اولان اوتاغين لامپاسي تار گؤرونوردو ايندي. پنجره‌نين شوشه‌‌سي سسلنميردي. هاوا هله چيله‌ييردي. .. ائشيك داها آيدين گؤرونموردو.
گئري دؤندو … ماسانين اوستونده كي ايستيكانا گؤزو ساتاشاركن اوره‌يي‌نين يانماسين دويدو. سورعتله ماسايا آدديملادي. الي ايستيكانين گؤوده‌سينه توخوناندا، ‌اونون نئچه مدت اؤنجه قاديني گتيرديگيني خاطيرلادي. نئچه لحظه ساكيت دوردو. بير زاد آردينجا ايدي سانكي. .. پنچره‌يه بير ايشيق دوشدو. گؤي گورولتوسو قالخاركن ديكسينيب اؤزونه گلدي. الين قولاقلارينا باسدي … “آغا ايجازه”…. بير سس قولاقلاريندا جينگيلددي.
“يوخ يوخ من تلسديم… باغيشلا مني. ..” اوجادان باغيردي. اوتاغين آغير سوكوتو قولاقلارينا دولاندا پنجره‌يه ساري يئريدي…دريندن تؤوشه‌ييردي. سانكي كيمسه بوغازين سيخيردي. ..پنجره‌نين سيسلي شوشه‌سين الي ايله سيلديكجه اوتاغين وسايط‌لري بير تابلو كيمي جانلانيرديلار…
***
يئنه آياغا دورماياجاق مي؟ بو دفعه قالخمازسا دؤردونجو دفعه‌دير …! كيلاسين سون ساعاتي‌دير. آللاه ائله‌سين دورسون بو فيكيرلرله كيلاسا داخيل اولدو. ايچري گيرركن، كيلاسين سون رديفينه ـ او اوغلانين صندلينه ـ زيللندي. اطرافينداكيلار آياغا دورموشدولار … آمما يئنه سرت قيافه‌سي ايله اؤيله اوتورموشدو.
اوغلانين اوزونه گؤز تيكدي. لاكين اونو اعتناسيز گؤردو … بئله نظرينه گلدي كي بونا گولور. . گؤزلري قان چاناغينا چؤندو. بير پينار بئينينده قاينادي. .. هله شاگيردلر آياق اوسته دورموشدولار. اونلار معليم‌لری‌نين نئچه لحظه‌ده قياقه‌سي ده‌ييشمه‌سين سئچميشديلر. سورعتله اوغلانا ساري آدديملادي. اوغلانين اوزونه ده‌ين قولاقلارينا دولاندا پنجره‌يه ساري يئريدي…دريندن تؤوشه‌ييردي. سانكي كيمسه بوغازين سيخيردي. ..پنجره‌نين سيسلي شوشه ‌سين الي ايله سيلديكجه اوتاغين وسايط‌لري بير تابلو كيمي جانلانيرديلار…
سيلله‌نين سسي فيكيرلري آيري يئرده اولان شاگيردلري ده او طرفه جلب ائتدي.
سنين دوشونجن يوخدورمو هئچ ؟ سنه دئمه‌ييبلر تكجه معليم يوخ، بلكه اؤزوندن بؤيوك هر كيمسه بير يئره داخيل اولاندا اونون آياغينا دوراسان؟ آدام گرك او قدر يئمسك اولاكي معليمي‌نين آياغينا دورمايا … يوخسا هئيكل‌لي بدنووه گؤوه‌نيرسن؟ معليم اوجادان باغيردي … ايندي‌يه‌دك هئچ زامان بؤيله بير شاگيردله داورانماميشدي. قان چاناغينا دؤنموش گؤزلرين اونون اوزندن چكميردي. ايلان تك اؤز اووون اووسونلاماق ايسته‌ييردي … آغا ايجازه! بيزيم ايكي قيچميزدا چولاق‌دير، آخي … احتراملا دولو بير سسله اوغلان ياواش دئدي….
ايلد يريم شدتله شاخدي. گؤي گورولدادي. ياغشين شيديرغي ياغيردي. ‌سانكي آنارين گؤز ياشي ايله ايسلانميش بير تصويري يوماق ايسته‌ييردي.
قایناق: ایشیق نشریه‌سی – نومره 4

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *