ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

ترلانين طالعي
اسماعيل ممدلي

ساوالان اته‎يينده‎کي يارپيزلي کندينده آنادان اولموشدو، آناسي لاچين اونو يالاديقجا توک‎لري قورويوب جاني قيزيردي، سحره ياخين گؤزلري آچيليب آياغا دورا بيلدي، بودورويه- بودوريه آغزيني آناسي‎نين امجه‎يينه يئتيردي. شيرين ايليق سودو امديکجه بدني گوجله‎نيب توره‎ليردي، نئچه آي سونرا اوتلارين يوموشاق يارپاق‌لاريندان يئمه‎يي‌ده اويره‎نميشدي، اوتلاق‌دا آناسي‌نين يانيندا او ياندان بو يانا، بو ياندان او يانا قاچيب اوينايـيب سئوينجين‎دن يئر- گويه سيغميردي. اينجه بئلي، نازيک توپوق‌لاري، بسته بويو اونون «قاراباغ» آت‌لاري توره‎مه‎سيندن اولدوغونو بيلينديريردي، گونو- گون‎دن بويويوب آز قالا آناسي بويدا اولاندا ايکي ياشلي «ترلان»ين مينيک واختي گليب چاتميشدي. آمما ارکؤيون دايچاني هئچ کيم مينه بيلميردي. يالنيز بير گون آخشام ايلخي اوتلاق‌دان کنده قايـيداندا «ائيواز» اونا ياخين‌لاشيب اليني ساغري‌لاينا چکيب يال‎لاريني تومارلاميشدي. بو ايش‎دن خوشو گلن ترلان او واخت‌دان بري ائيوازدان قاچمازدي.

نشريه‎لرين يازديغينا گوره، دورد آي سونرا خرمن بايراميندا قاراداغ‌دا، قاراباغ آت‌لاري توره‎مه‎سيندن اولان قولان‎لارين چاپماق ياريش‌لاري کئچيريله‎جک ايدي، ائيواز بو ياريش‌لاردا ترلان‎لا بيرليکده اشتراک ائتمک قرارينا گليب، صاباح‎دان اونا مينيک اويره‎تمه‎يه  باشلادي. مشق‎لر اوّل‎ده بير آز چتين اولسا دا سونرالار ايش‎لر ياخشي‎ قاباغا گئديردي. ائيواز ترلانين کوره‎يينده اوتوروب قيچ‌لاريني اونون سينه‎سي آلتـيندا داراق‌لاياندا ترلان قولاق‌لاريني باشينا ياتـيرديب، اوخ کيمي سيچرايـيب بير گؤز قيرپيميندا اوزون بير يول گئديردي. ايش بئله گئتسه‌يدي، ترلانين ياريش‌لار دا بيرينجي اولاجاغينا سؤز يوخودو.

تاسف کي، بئله اولمادي، بير گئجه تلويزيون‌دا، هميشه گولر اوزلو مهربان دانيشان «سارا» هيجانلي بير حالدا محاربه‎نين باشلانديغيني خبر وئردي. اوردونون ايسته‎يينه گؤره، بوتون آت‌لار جبهه‎يه گونده‎‎ريلمه‎لي‌ ايديلر. ايکي گون سونرا گليب ترلاني دا ايلخي‎دان آيـيريب آپارديلار. اوزون- اوزاق يو‎ل‎لار گئده‌ندن سونرا آج- سوسؤز اوستو آچيق بير تويله‎يه سالديلار. اوردا ايکي يوزه قده‎ر آت وار ايدي. محتلف يئرلردن گتيريلن آت‌لار چوخ تئز بيري- بيري‎له دوست‌لاشيب، هره اوز طالعيندن دانيشيردي. بيري دئييردي: اون گون قاباق نرگيزين تويوندا بوتون آت‌لاري کئچيب، گليني اوزوک قاشي کيمي بئلينده ساخلايـيب، قونشو کنده آپارميشدي. او بيريسي دئييردي: بو ايل يوز هکتار يئر شوملايـيب، کند اهلينه تاپشيرميشدي. باشقاسي دئييردي: ييرمي گونده آرابا ايله اوچ يوز تون بوغداني کؤوشن‎دن خرمنه داشيميشدي. بو آرادا تکي بيزيم جاوان ترلانين هله دئمه‎يه سؤزو يوخ ايدي.

آت‌لار باش‌لارينا نه‎لر گله‎جه‌ييني بيلميرديلر… مشق‎لر باشلانميشدي. ال‌لرينده اوزون آغير دمير پارچاسي اولان سرباز هر گون آت‌لاري وورا- وورا تويله‎دن چيخارديب، نئچه يوز كيلو داش تورپاغي کوره‌ک‎لرينه قويوب، بويوک بير ميدانين بو باشيندان او باشينا، سونرا دا او باشيندان بو باشينا گتيريرديلر. سربازلارين بو جور آغيل‎سيز ايش‎لريني باشا دوشمه‎ين آت‌لار داها آجيقلانيرديلار. يايلاقداکي تزه عطيرلي اوت‌لارين عوضينه بوردا قورو سامان‌دان باشقا بير زاد يئمه‎ين آت‌لار گونو- گون‎دن آريق‌لايـيب بير دري، بير سوموک اولموشدولار.

بير گئجه، قارانليقدا، ايکي سرباز ترلانين باشينا نوختا ووروب تويله‎دن چيخاريب آپارديلار. بئلينه يهر عوضينه پالان قويوب، اوستونه اوزون لوله کيمي آغير دميرلر چاتيب، ايپ‎له باغلايـيب داغين داشليق يول‎لاريندا اوزو يوخاري سوردولر. يولداش‌لاريندان آيريلان ترلانين يورغونلوغو بير ياندا قالسين، تک‎ليک‎دن يامان داريخيردي. بيلميردي نئيله‎سين، يولو باشينا آليب گئديردي. سيلديريم بير قايانين باشينا چاتاندا هاوا ايشيق‌لانميشدي، داغين هر ايکي طرفينده ياشيل اوتلاق‌لار، ياراشيقلي کندلر، کندلرين کوچه‎لرينده گليب گئده‌ن‎لر گورونمه‎يه باشلاميشدي. ترلانين دوغما کندي يادينا دوشدو… بير آن اوزونو کندده سؤيودلرين آلتيـندا ايلخي‎نين آراسيندا ائيوازلا بيرليکده گوردو. ائيواز اونون قويروغونو گول‌دسته‎سي کيمي يـيغيب باغلايـيب، يال‎لاريني هورموشدو، تزه‎جه آنادان اولموش دايچالارين اويناماغيني گوره‌ن ترلان، هارادا اولدوغونو اونوتموشدو. ائله بو آندا سينه‎سينده آري سانجان کيمي بير آغري حيس ائتدي. سونرادا آغرييان يئردن قان آخماغا باشلادي. گئتديکجه گؤزلري قارالدي، آياق اوستده دورا بيلمه‎ييب، قايالارين اوستونه يـيخيلدي. اوزاق‎لاردان گلن شاققا-شاق سسي ياواشيديقجا قوزقون‎لار باشي‌نين اوستونده دولانيرديلار. نه يازيق کي، ترلان بير داها دوغما کندينه قايـيديب قاراباغ آت‌لاري توره‎مه‎سيندن اولان قولان‎لارين ياريشيندا اشتراک ائتمه‎يه‎جکدي.

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *