ترلانین طالعی
اسماعیل ممدلی
ساوالان اتهییندهکی یارپیزلی کندینده آنادان اولموشدو، آناسی لاچین اونو یالادیقجا توکلری قورویوب جانی قیزیردی، سحره یاخین گؤزلری آچیلیب آیاغا دورا بیلدی، بودورویه- بودوریه آغزینی آناسی‌نین امجهیینه یئتیردی. شیرین ایلیق سودو امدیکجه بدنی گوجلهنیب تورهلیردی، نئچه آی سونرا اوتلارین یوموشاق یارپاق‌لاریندان یئمهییده اویرهنمیشدی، اوتلاق‌دا آناسی‌نین یانیندا او یاندان بو یانا، بو یاندان او یانا قاچیب اوینایـیب سئوینجیندن یئر- گویه سیغمیردی. اینجه بئلی، نازیک توپوق‌لاری، بسته بویو اونون «قاراباغ» آت‌لاری تورهمهسیندن اولدوغونو بیلیندیریردی، گونو- گوندن بویویوب آز قالا آناسی بویدا اولاندا ایکی یاشلی «ترلان»ین مینیک واختی گلیب چاتمیشدی. آمما ارکؤیون دایچانی هئچ کیم مینه بیلمیردی. یالنیز بیر گون آخشام ایلخی اوتلاق‌دان کنده قایـیداندا «ائیواز» اونا یاخین‌لاشیب الینی ساغری‌لاینا چکیب یاللارینی تومارلامیشدی. بو ایشدن خوشو گلن ترلان او واخت‌دان بری ائیوازدان قاچمازدی.
نشریهلرین یازدیغینا گوره، دورد آی سونرا خرمن بایرامیندا قاراداغ‌دا، قاراباغ آت‌لاری تورهمهسیندن اولان قولانلارین چاپماق یاریش‌لاری کئچیریلهجک ایدی، ائیواز بو یاریش‌لاردا ترلانلا بیرلیکده اشتراک ائتمک قرارینا گلیب، صاباحدان اونا مینیک اویرهتمهیه باشلادی. مشقلر اوّلده بیر آز چتین اولسا دا سونرالار ایشلر یاخشی قاباغا گئدیردی. ائیواز ترلانین کورهیینده اوتوروب قیچ‌لارینی اونون سینهسی آلتـیندا داراق‌لایاندا ترلان قولاق‌لارینی باشینا یاتـیردیب، اوخ کیمی سیچرایـیب بیر گؤز قیرپیمیندا اوزون بیر یول گئدیردی. ایش بئله گئتسه‌یدی، ترلانین یاریش‌لار دا بیرینجی اولاجاغینا سؤز یوخودو.
تاسف کی، بئله اولمادی، بیر گئجه تلویزیون‌دا، همیشه گولر اوزلو مهربان دانیشان «سارا» هیجانلی بیر حالدا محاربهنین باشلاندیغینی خبر وئردی. اوردونون ایستهیینه گؤره، بوتون آت‌لار جبههیه گوندهریلمهلی ایدیلر. ایکی گون سونرا گلیب ترلانی دا ایلخیدان آیـیریب آپاردیلار. اوزون- اوزاق یوللار گئده‌ندن سونرا آج- سوسؤز اوستو آچیق بیر تویلهیه سالدیلار. اوردا ایکی یوزه قدهر آت وار ایدی. محتلف یئرلردن گتیریلن آت‌لار چوخ تئز بیری- بیریله دوست‌لاشیب، هره اوز طالعیندن دانیشیردی. بیری دئییردی: اون گون قاباق نرگیزین تویوندا بوتون آت‌لاری کئچیب، گلینی اوزوک قاشی کیمی بئلینده ساخلایـیب، قونشو کنده آپارمیشدی. او بیریسی دئییردی: بو ایل یوز هکتار یئر شوملایـیب، کند اهلینه تاپشیرمیشدی. باشقاسی دئییردی: ییرمی گونده آرابا ایله اوچ یوز تون بوغدانی کؤوشندن خرمنه داشیمیشدی. بو آرادا تکی بیزیم جاوان ترلانین هله دئمهیه سؤزو یوخ ایدی.
آت‌لار باش‌لارینا نهلر گلهجهیینی بیلمیردیلر… مشقلر باشلانمیشدی. ال‌لرینده اوزون آغیر دمیر پارچاسی اولان سرباز هر گون آت‌لاری وورا- وورا تویلهدن چیخاردیب، نئچه یوز کیلو داش تورپاغی کورهکلرینه قویوب، بویوک بیر میدانین بو باشیندان او باشینا، سونرا دا او باشیندان بو باشینا گتیریردیلر. سربازلارین بو جور آغیلسیز ایشلرینی باشا دوشمهین آت‌لار داها آجیقلانیردیلار. یایلاقداکی تزه عطیرلی اوتلارین عوضینه بوردا قورو سامان‌دان باشقا بیر زاد یئمهین آت‌لار گونو- گوندن آریق‌لایـیب بیر دری، بیر سوموک اولموشدولار.
بیر گئجه، قارانلیقدا، ایکی سرباز ترلانین باشینا نوختا ووروب تویلهدن چیخاریب آپاردیلار. بئلینه یهر عوضینه پالان قویوب، اوستونه اوزون لوله کیمی آغیر دمیرلر چاتیب، ایپله باغلایـیب داغین داشلیق یوللاریندا اوزو یوخاری سوردولر. یولداش‌لاریندان آیریلان ترلانین یورغونلوغو بیر یاندا قالسین، تکلیکدن یامان داریخیردی. بیلمیردی نئیلهسین، یولو باشینا آلیب گئدیردی. سیلدیریم بیر قایانین باشینا چاتاندا هاوا ایشیق‌لانمیشدی، داغین هر ایکی طرفینده یاشیل اوتلاق‌لار، یاراشیقلی کندلر، کندلرین کوچهلرینده گلیب گئدهنلر گورونمهیه باشلامیشدی. ترلانین دوغما کندی یادینا دوشدو… بیر آن اوزونو کندده سؤیودلرین آلتیـندا ایلخینین آراسیندا ائیوازلا بیرلیکده گوردو. ائیواز اونون قویروغونو گولدستهسی کیمی یـیغیب باغلایـیب، یاللارینی هورموشدو، تزهجه آنادان اولموش دایچالارین اویناماغینی گوره‌ن ترلان، هارادا اولدوغونو اونوتموشدو. ائله بو آندا سینهسینده آری سانجان کیمی بیر آغری حیس ائتدی. سونرادا آغرییان یئردن قان آخماغا باشلادی. گئتدیکجه گؤزلری قارالدی، آیاق اوستده دورا بیلمهییب، قایالارین اوستونه یـیخیلدی. اوزاقلاردان گلن شاققا-شاق سسی یاواشیدیقجا قوزقونلار باشی‌نین اوستونده دولانیردیلار. نه یازیق کی، ترلان بیر داها دوغما کندینه قایـیدیب قاراباغ آت‌لاری تورهمهسیندن اولان قولانلارین یاریشیندا اشتراک ائتمهیهجکدی.
یک پاسخ
سلام/ چوخ گؤزل/ اللرینیزه ساغلیق