اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

davud ahar
قار دنه‌لریله اویناییریق
داوود اهری

صبحانه‌دن سونرا پالتارلاریمی گئیدیم. پیلله‌لردن ائنر- ائنمز، آنام برک چاغیردی:

–          کتابخانایا ایسته‌ییرسن گئده‌سن کارتین یادیندان چیخماسین.

تعجّوبلندیم. بو باره‌ده اونا بیر سؤز دئمه‌میشدیم. آچیق آغیزایلا قاییتدیم. یادیما دوشدو کی کارتیمی گؤتورمگی اونوتموشام. کارتی گؤتوردوم، پیلله‌لردن ائندیم. آناما بیر سؤز دئمه‌دیم. ائودن چیخدیم ائشیگه.

الیمین اشاره‌سی ایله تاکسی دایاندی. سوروجو چیغیردی:

–          کتابخانایا ایسته ییرسن گئده‌سن، مین!

تعجّوبدن آز قالیردی بوینوز چیخاردام. یاواش قاپینی آچدیم و میندیم. آمما سوروجویه بیر سؤز دئمه‌دیم.

کیتابخانادا کی میزین دالیسیندا دورموش بیر گنج مسئول منی گؤرجک گولدو و دئدی:

–          چوخ خوش گلیبسیز. کارتیز لطفن. دکتر ژیواگونون کتابینی ایسته‌ییرسیز. بیر آز صبر ائله‌یین. الآن گتیره‌رم.

تعجّوبلو گؤزلرایله اونا باخدیم. کارتیمی وئردیم.جرأتیم یوخ ایدی سوروشام هارادان بیلمیشدی کی گلمیشم همان کتابی امانت آلام.

بیر نئچه دقیقه‌دن سونرا کتاب الینده قاییتدی. بؤیوک کارتدا بیر شئی‌لر یازدی و کتابی منه وئردی.

کتابخانادان ائشیگه چیخدیم. اؤز- اؤزومه دئدیم اولمایا ساحاتلارین عقربه‌لری بو گون عکسینه ایشله‌ییر و یا یئر گئتمک یولونو ده‌ییشیبدیر. روانی آداملار کیمی کتاب قولتوغومدا پییادا پارکا طرف یولا دوشدوم. ایسته‌ییردیم بیر آز‌دا یول گئده‌م. شهریمیزین یالقیز، همیشه قاپیسی باغلانمیش سینماسی‌نین قارشیسیندا بیر اسکی دوست کناریمدان کئچیردی. بیربیریمیزین اوزوموزه باخدیق. ال وئردیک. سلام علیکدن سونرا دئدی:

–          پارکا تشریف آپاریرسیز ، یولوزدان قویمویام.

تعجّوبله اوزونه باخدیم. اوندان آیریلدیم. قار باشلادی یاغماغا. قارین آغ دنه‌لری اوینایا- اوینایا اوستو باشیما اوتوروردو. بیر یولدان کئچن قارشیدان گلیردی. یاخینلیغیما یئتیشن کیمی، دایانیب و سوروشدو:

–          آقا ساحات نئچه دیر؟ وای باغیشلایین گره‌ک سیزدن بو سؤالی ائله‌مه‌یه ایدیم. سیز چوخداندیر داها ساحاتیز اولماییر.

یولوما داوام وئردیم. دؤرد یولون باشیندا بیر قوجا کیشی چرخ اوستونده لب‌لبی ساتیردی. ساری و قرمزی لب‌لبی‌لردن بوخار قالخیردی. اؤز- اؤزومه دئدیم یاخشی‌دیر کی یاریم کیلو دا لب لبی آلام. قوجا کیشی‌نین یاخینلیغینا یئتیشرکن قاه-قاه باشلادی گولمه‌یه و یاواش قولاغیما دئدی:

–          نییه یاریم کیلو؟ قوی بیر کیلو چکیم. لب‌لبی‌لریم ایستی و شیریندیر. نگران اولما فریزر تورباسینا قویاجاغام.

بیر کیلو لب‌لبی‌نین پولونو  وئردیم. فریزر تورباسی الیمده، کتاب‌‌ایسه قولتوغومدا، نهایت پارکا یئتیشدیم. اؤزومه دئدیم کاش بیر قزئته‌ده گتیره ایدیم کی نیمکت اوستونده قویوب اوتورایدیم.

بیر کیشی قزئته الینده کئچیردی. دؤندو، اوزون منه توتوب دئدی:

–          بلی. اؤزوز ایله قزئته گتیرمه‌ییبسیز. آلین، من اوخوموشام. ائله‌یه بیلرسیز نیمکت اوستونه سریب، اوستونده اوتوراسیز.

تعجّوبله قزئته‌نی آلدیم. تشکر ائله‌دیم.

بیر گنج قیز و اوغلان پارکی ترک ائدیردیلر. قیز اوغلانا دئدی:

–          دوزدور. اوجوردور. دوغرودان یئنی قرینه. ایش قورتاریبدیر…!

نیمکتده قزئته اوستونده اوتورموشدوم. قار آرام آرام یاغیردی. بیر قارقا گولونج حالتده قاریلداییردی. قالخدیم. بیر یولو سئچدیم کی تئز ائوه یئتیشم. قار هله یاغیردی.

***

قاپینی آچیب، پیلله‌لردن قالخدیم. آنام بیر خانیم ایلا دانیشیردی. ائشیتدیم کی دئییردی:

–          همان اسکی آتا- بابا سؤزو. اوره‌یین اوره‌یه یولو واردیر. ایندی داها دوغرودان یولو واردیر…!

گولوشلری‌نین سسی اوجالدی. قاییتدیم. پیلله‌لردن سرعتله ائنیردیم. آمما سانکی پیلله‌لرین سونو یوخ‌ایدی. کیتاب و فریزر تورباسین آتدیم. ائله پیلله‌لردن ائنیردیم. قیزیشمیشدیم. بیر- بیر پالتارلاریمی چیخاردیردیم. تر دابانیمدان سوزوردو. پیلله‌لره قورتاراجاق یوخ ایدی…

***

آنامین سسی منی اویاتدی. نفس نفس ووروردوم. عجیبه یوخو گؤرموشدوم. قالخدیم.

صبحانه‌دن سونرا پالتارلاریمی گئیدیم. پیلله‌لردن ائنر- ائنمز، آنام برک چاغیردی:

–          کتابخانایا ایسته‌ییرسن گئده‌سن کارتین یادیندان چیخماسین.

و من اصلن تعجّوبلنمه‌دیم.

تاکسی سوروجوسو، کیتابخانا مسئولو، اسکی دوست، یولدان کئچن، قوجا لب‌لبی ساتان، او کیشی کی قزئته الینده ایدی و او قیز و اوغلان کی ایندیجه پارکی ترک ائتدیلر، همان سؤزلری دئدیلر.

پارکدا نیمکت اوستونده ، قزئته اوستونده اوتورموشام. فریزر تورباسی بیر کیلو لب‌لبی ایله و دکتر ژیواگو کیتابی منیمله‌دیرلر .قار آرام آرام یاغیر.

بیر قارقا گولونج حالتینده قاریلداییر. یالنیز منیم ائوه قاییتماغا جرأتیم یوخدور. اختیارسیز آیاغا قالخیرام کی ائویمیزه تئز یئتیشن بیر یول سئچم. قار هله ده یاغیر…!

                                                                                اهر – 26 /11/80

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *