ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

said fiyuzat
تقلب
سعید فیوضات

گئجه گؤردوگوم یوخولار یادیما دوشدوکجه تیر -تیر اسیرم. گودوکچونون سسی قالخدی:

–          چئویرین کاغازلاری!

کاغاز الیمده بایراق کیمین دالغالاندی. سورغولاری گؤزدن کئچیرتدیم. ائله چتین گلمه‌دی. تئز-تئز یازماغا باشلادیم. ریاضی فیزیک محصیلی اولاسان، جبر آنالیر اولا، نهایی امتحان اولا، گؤر نه اولار. اؤزوده کی ایکی هفته‌دن سونرا کنکور وئرمه‌لی اولاسان. بیرینجی سورغونون آرخاسینی ووردوم یئره؛ ایکینجیسینی ملر قویدوم؛ اوچونجوسونو ائله بارماقلاریمین آراسیندا اریتدیم. ایش قورتاردی. نفسیم یوموشالدی. امتحان کاغازینی چال چؤور ائله‌ییب دوردوم آیاغا. ائوه کیمین فیت چالا-چالا گئتدیم. هله گلن امتحانا ایکی-اوچ گون قالیردی. یئمه‌گیمی یئییب، بیر آز دینجه‌لیب، درسه باشلادیم. بؤیوک قارداشیم گلدی. ائوه کئچینجک دئدی:

–          هانی او سعید. من دیسکیندیم.

دئدیم:

–          بوردایام.

دئدی :

–          دوزونو دئنن، سن بو گون امتحاندا تقلب ائله‌ییبسن؟

مات قالیب دئدیم:

–          نه تقلبی؟ من کیلاسین بیرینجی محصیلی، تقلب هارا، من هارا؟!

مات قالیب فیکیرلشدی. دئدیم:

–          نه اولوب؟

دئدی:

–          گودوکچو معلیم‌لردن بیریسی گلیب منه دئدی قارداشینین تقلبینی توتدوم، آنجاق آدینی بیلینجک بوراخدیم.

دئدیم:

–          هئچ بئله بیر ایش اولماییب. به سن گؤرمورسن من سحردن آخشاماجک درسه باخیرام. تقلب یازانین بو قده‌ر درسه باخماغا احتیاجی اولار؟

قارداشیم دونوخا گئتدی. بیر آزدان دئدی:

–          دئییرم سعید بئله بیر ایش گؤرمز. نه بیلیم جاماعات لاپ قاتیب.

سونرا چیخیب گئتدی. اما بو فیکیر بئینیمدن چیخمادی. آخی او معلیم نه‌دن گره‌ک بو سؤزو سؤیله‌یه .آخی من هئچ اونو گؤرمه‌میشم کی. هاردان قونداریب بو هده‌رن –پده‌رنی.

فیکیریم یارییا بؤلوندو. یاری جانیم او تؤهمت‌ده قالدی. اما درسه باخماق بیر آز توختاقلیق وئردی منه. صاباحیسی گون گینه قارداشیم اوستومه گلیب، منه چیمخیردی:

–          نیه یالان دانیشیرسان؟ تقلب ائله‌ییبسن دئنن ائله میشم دا، نییه مندن گیزله‌دیرسن؟

آیاغا دوروب دئدیم:

–          من یالان دئمیرم، نییه گرک یالان دئیم کی، ایسته‌ییرسن گوناهسیز اولدوغوم یئرده دئیم گوناهلییام.

بیردن آتام یئتیشیب کئچدی اوتاغا:

–          نه های دیر؟ نه اولوب؟ نییه بئله سؤز گولشدیریرسیز؟

قارداشیم دئدی:

–          نه اولاجاق گودوکچی معلیم دئییب قارداشینین تقلبینی بوراخمیشام ، اؤزوده نهایی امتحانیندا. بو گون دئمیشم منیم قارداشیم تقلب ائله‌مه‌ییب؛ قاییدیب نه دئسه یاخشی‌دیر؟! دئییب، گل خالقا یاخشیلیق ائله، ائله گرک اونون تقلبینی توتایدیم، اؤزوده نهایی‌دا.

آتام دئدی:

–          بیرآز دؤزوملو اول، چوخ سؤز دئیرلر. گؤر آخی قارداشین نه دئییر!

قارداشیم یوموشالیب، دؤنوب منه دئدی:

–          یاخشی، ایشدیر اولوب دا؛ ائله بیل دوغوردان بو ایشی گؤروبسن. داها دانما. قوی بیزده دوغرونو بیلیب او کیشی‌دن تشکور ائله‌یک.

حیرصیم باغیرساغیمی کسدی. آیاغیمی یئره ووروب دئدیم:

–          نه ایسته‌ییرسیز؟ ایسته‌ییرسیز دوغرونو دانیب، سیزه یالان دئیَم؟ من تقلب زاد ائله‌مه‌میشم، نییه ایسته‌ییرسیز زوران-گوجن منیم بوینوما قویاسیز؟ بیردن آتام دئدی:

–          بئله اولماز، سنی او معللیمله اوزلشدیرسک اولار؟ دئدیم:

–          من وارام.

یولا دوشوب، گئتدیک او معللیمین مدرسه‌سینه.

منله آتام ائشیکده قالدیق. قارداشیم گئدیب معللیمی چاغیردی. اوزاقدان گلمک‌لرینی گؤروردوم. معللیم اللرینی اؤلچه-اؤلچه گلیردی. کوچه‌نین باشینا یئتیشیب، دئدی:

–          بس هانی او؟

قارداشیم منی گؤرستدی. معلیم منه باخیب مات قالدی. ثانیه‌لر اوزانماغا باشلادی.

قارداشیم منه باخدی. من ده دؤنوب آتاما باخدیم. آتام‌دا گولومسه‌یه- گولومسه‌یه بیر منه باخدی، بیر قارداشیما بیرده مات قالمیش معللیمه……….

 خزل آیی 92

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *