قارقا
داوود اهری
حيطده دورموشام. حووضون ايچينده كي، تهرانين آزادليق بورجو كيمي، قاردان دوزه‌لتديگيم بورجا باخيرام. بورجون اوستونده خيرداجا آغاجلاردان بير قوش يوواسي دوزلديب و اونون ايچينه ايكي يومورتا كيمي، آغ داش قويموشام. دونن گئجه آي ايشيغيندا، حيطده بورجون دؤرونده قدم ووروردوم. عجب بورجون گؤزه‌ل آخار-باخاري وار ايدي.
بير آلا قارقا دامين اوستونده دوروب و گؤزله‌يير كي من گئده‌م و او گله، او يومورتالاري سينديريب يئيه!
اوشاقليقدا علي‌گيلين‌ده ائولري بيزيم كوچه‌ده ايدي. بير بؤيوك حيطي و اونون ايچينده اوجا قلمه آغاجلاري وار ايدي. ائولرينين هم بيزيم كوچه‌يه و هم ده قونشو كوچه‌يه قاپيسي وار ايدي. علي حيطده بير كيچيك و اوفاق اتاق دوزلتميشدي و من چوخ افسوس يئيه‌رديم كي نييه بيزيم ده او جور حيطيميز يوخدور تا من ده بير اتاق دوزلديب و اورادا اوينايام.
بير گون، گون اورتادان سونرا علي گلدي منيم سوراغيما و دئدي:
– حيطيميزه ايكي آلا قارقا بالاسي دوشوبدور. گل اونلاري سن توت، بيريسي سنين، بيريسي ده منيم.
گئتديك ائولرينه. بير نئچه اوشاق‌دا بيزيم ايله گلديلر. بالاجا آلا قارقالارين آتا و آناسي چوخ سس سالميشديلار. من ياخينلاشديم بيريسيني توتام كي بيردن بيره بير ديمديك باشيما ده‌يدي و باشيم قانادي. علي دئدي:
– اليوه بير آغاج آل و باشووا توولا.
او ايشي ده گؤردوم. آمما تا ايكي آلا قارقا بالالاريني توتام، باشيم اوچ يئردن، آلا قارقالارين ديمديكلري ايله قاناميشدي.
گئتديك كوچه‌يه. آلا قارقالارين بيريسيني علي‌يه وئرديم و او بيريسيني ده اوشاقلار ايلا گؤتوروب، كوچه‌نين باشيندا، كيچيك چايين كنارينداكي ميدانا گئتديك. ائله بالاجا قارقا ايلا اويناييرديق كي گؤردوك رضا الينده، قابدا بير آز نفت و كبريت يئتيشدي و دئدي:
– آي اوشاقلار! قارا قارقالار عاشورا گونو امام حسينه سو آپاراندا، آلا قارقالار قويماييبلار. اينديجه اونو نفت ايله يانديراجاغام.
هر نه دئديك سؤزوموزه باخمادي. بالاجا قارقانين اوستونه نفت تؤكوب و كبريتي چكدي…!
هاميميز ناراحات اولدوق آمما او گولوردي.
او گوندن هر زامان كي ايسته ييرديم ائودن چيخيب و مدرسه‌يه گئده‌م، بير آلا قارقا كي كوچه‌نين باشيندا ، برق تيري‌نين باشيندا دايانميشدي، مني گؤرجك اوستومه يويوروب و ايسته‌ييردي كي ديمديگي ايله باشيما وورسون. دوز بير هفته يه ياخين بو ايش تكرار اولدو.
سونرالار بوي آتيب بؤيودوك. حرب زاماني من ده عسگرليگه گئتديم، رضا دا. من گلديم آمما رضا اسير توتولوب و نئچه ايلدن سونرا شهريميزه قاييتدي.
من و علي ده قونشو كوچه ده بير گؤزه ل قيزي سئويرديك. او قيز دا بير باشقاسينا اره گئتدي.
دامداكي آلا قارقايا و حيطده كي آزادليق بورجونا باخيرام. گئديرم اوتاغا و آتوشگه‌دن گؤرورم: آلا قارقا اوچوب گلير، بورجون اوستونه قونور، بير او طرفه، بير ده بو طرفه باخير و ديمديگي ايله يومورتالارا وورور! آمما بوش يئره.
يورولوب ، اوچور و گئدير…!
***
بير قيش گونو خياواندان كئچيرديم. ديشيم برك آغري‌ييردي. او گؤزه‌ل قيز، چوخدان آنا اولوب، قوجاغيندا بير اوشاق، داواخانادا بير صندل اوستونده اوتورموشدي. ايگيرمي ايلدن سونرا اونو يئنه ده گؤرموشدوم. اونا خاطر علي ايله آز دالاشماميشديق!
اهر- 12/2/77