اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

بیردن- بیره
عمران صلاحی

بیر باهار گونو، بیر چیچک‎لی آغاجین آلتـیندا، لاله پارکـیندا، بیر کیشی ‎کی الینی کوتونون سول قولتوغونون جیبینه قویموشدور، نیمکتین اوستونده، بیر کیشی ایله کی نظره گلیردی تازا بازنیشسته اولوب دانـیشـیردی:

– دوز بویورورسوز، اقتصادی سیخینتی‎لار همیشه باعث اولوب آدام بعضی شئی‎لری زندگانلیق‎دا حذف ائله‎سین. آدام ائله‎یه بیلمز ات، چور‎ک و یاغ آلمایا، آمما ائله‎یه بیلر مثلن کیتابی اؤز برنامه‎سیندن حذف ائله‎یه. آدام خؤر‎ه‌ک یـئمه‎سه اؤلر، آمما اگر کیتاب اوخوماسا، اونا هئچ بیر شئی اولماز، تازا مومکون‎دور ترقّی‎ده ائله‎یه، خلاصه لازیم اولمایان شئی‎لرین حذفی آداما ضرر وورماز.

منیم بئش قـیزیم وار. دورد اوغلان هاواسینا دونـیایا گلیب‎لر. بئش‌ایل بوندان قاباق، اوّل‎کی قـیزیمی گره‎گ اره وئره‎یدیم. آمما جهیز آلماغا پولوم یوخ ‎ایدی. نه پس‌اندازیم  واریدی، نه ساتماق اوچون بیر درده دیه‎ن شئی. وام آلماغادا امکانـیم یوخ ‎ایدی. بیر گون بو پارک‎دا اوتورموشدوم روزنامه اوخویوردوم. گؤردوم بیر مناقصه آگهی‎سینده یازیب‎لار: «بؤیره‎ک آلـیریق».

اؤزومله فیکیرلشدیم کی، دونـیادا چوخ‎لاری بیر بؤیره‎ک‎له زندگانلـیق ائدیرلر. نییه بو آللاه وئرگی‎سی سرمایه‎دن استفاده ائله‎مه‎ییم.

بؤیره‎ک‎لریمین بیرینی ساتدیم، اول‎کی قـیزیمی ار ائوینه گؤند‎‎ردیم. بیر ایل‎دن سونرا ایکینجی قـیزیم ارلیک اولموشدور. یـئنه هامان پولسوزلوق‌ایدی و هامان چتین‎لیک‎لر. منیم آبیریم واریدی، ائله‎یه بیلمز‌ایدیم ایکینجی قـیزیمی جهیزسیز ار ائوینه گؤنده‎‎رم. یـئنه‎ بیر گون بو نیمکتین اوستونده اوتوردوم و بدنین آیری یـئرلرینه فیکیرلشدیم. البته او یـئرلره‎کی جوت ایدی. مثلن گؤزلریمه. اؤزوم‎له دئدیم ایکی گؤزو نئیله‎ییرم. مگر گؤرمه‎لی شئی‎‌ده وار؟ نییه بو قات- قاریشـیق دونـیانـی ایکی برابر گؤروم و ایکی برابر عذاب چکیم. هر نه روزنامه‎لرین آگهی‎سینه باخدیم، گؤردوم گؤز آلان یوخ‎دور. اؤزوم بیر آگهی وئردیم، روزنامه‎لرین بیرینده چاپ ائله‎دیلر. بیر گون‎دن سونرا مشتری تاپیلدی، ایکینجی قـیزیم‌دا اره گئتدی. ایندی گؤزلریمین بیری شوشه‎دن‎دیر.

بیر ایل‎دن سونرا اوچونجو قـیزیمین نووبتی ایدی. هامی قاپیلار اوزومه باغلی‌ایدی. بیلمیردیم نئیله‎یم. آز قالـیردی باغریم چارتلایا. قولاق‎لاریما فیکیرلشدیم. دئدیم اونلارین بیرین ساتارام، آمما کیم قولاق آلاجاق‌ایدی؟ چوخ مایوس پارک‎دا اوتورموشدوم، روزنامه‎نی ورق‎له‎ییردیم، گؤردوم آگهی صحیفه‎سینده یازیبلار: «بدنین هر یـئرین آلـیریق» ائله‎بیل دونـیانـی منه وئرمیشدیلر. تلفون ووردوم سوروشوردم قولاق‌‎دا آلـیرسیز؟

دئدی‎لر: بیر نفر اونلارین موسسه‎سینه مراجعه ائله‎ییب، دئییر کی، قولاق‎لاری‎نـین بیرین بیر داوادا الدن وئریب، ایندی ائله‎یه‎ بیلمیر قولاق‎سیز کیتاب اوخویا. سوروشدوم قولاغـین نه ربطی‎ وار کیتاب اوخوماغا؟ دئدی‎لر: مشتری قولاغـی بوندان اؤتورو ایسته‎ییر کی عینکی‎نین دسته‎سین قویا اونون اوستونه. تئز معامله باشا چاتدی. اوچونجو قـیزیم ‌دا ار ائوینه گئتدی. ایندی توک‎لریمی اوزاتمیشام، تؤکموشم باشـیمین اویان- بویانـینا، بیلینمیر بیر قولاغـیم یوخدور.

بیر ایل‎دن سونرا دؤردونجو قـیزیمین نؤوبتی‌ایدی. اومیدیمی لاپ الدن وئرمیشیدیم. آمما دوز هامان وقت هامان موسسه‎دن من‎له تماس توتدولار کی، فوری بیر سول اله احتیاج‎لاری وار. سئوینجک اولدوم. داهی سوروشمادیم نه اوچون ایسته‎ییرلر. تئز گئتدیم بیماریستانا، سول الیمی وئردیم، اونون پولو ایله دؤردونجو قـیزی ‎دا اره وئردیم. یاخچی ال ایدی. بیر بارماغـی سینمیشدی، آمما یاخچی ایشله‎ییردی. او تاریخدن بویانا اوزویومو ساغ الیمین بارماغـینا تاخمیشام و ایندی مشتری منیم الیم‎له نه ایش‎لر گؤرور- آللاه بیلیر.

بیر ایل‎دن سونرا گره‌ک آخیر قـیزیمی اره وئره‎یدیم. یـئنه هامان پولسوزلوق ایدی و هامان گرفتارچیلـیق. گلدیم بوردا بو گؤلون قـیراغـیندا اوتوردوم و بدنیمین آیری یـئرلرینه فیکیرلشدیم. آیاغـی ساتماق اولماز ایدی. ماشـین آیناسیز و قاپی‎سیز یولا گئده بیلر، آمما تکرسیز یوخ. بورنومو‌دا اولمازدی ساتام، اوندا قیافه‎می الدن وئره‎ردیم. دیلیمی‎ ده آلمیردیلار، دئییردیلر چوخ ایتی‎دیر. بیر دیله احتیاج‎لاری وار ایدی کی، یالاندان تعریف ائله‎سین.

بیلمیرسیز نه مکافات ایله آخیر قیزیمی اره وئردیم. او گئتدی ائو- ائشیگی‎نین باشـینا.آمما ایندی من اؤزوم ائودن آوارا اولموشام. آروادیم منی ائوه یول وئرمیر و ‎دئییر من داهی نه اومیدله سن ایله یاشایـیم؟!!

اشتراک گذاری در print
چاپ

یک پاسخ

  1. سلام
    عمران صلاحی رحمتلیگی چوخ سئویرم. یازیلاریندان همده فایدا آپاریرام همده گؤزل حس لر آلیرام.
    بو حیکایه سینی اؤنجه اوخوموشدوم ، اما ایندی بیرداها گؤردویومده یئنه اوخویوب لذت آلدیم.
    تشککورلر

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *