بوگون پنجشنبه 2 اردیبهشت 1400 ساعات 18:33
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

agdashli
قارا بایرام
ع. م. آغداشلي

 اوره‌یيندن هر شئی كئچيردي، بلكه بيرگون آنام اؤلدو؟ چتين آنلاردا آنا سيغيناجاغي تاپا بيلمه‌ین اوشاقلارين سارسيلديغينـين دفه‌لرله شاهيدي اولموشدو. خوصوصيله بایرام گونلرينده «یازيقلارين قارا بایرامي‌دير» سؤزونو چوخ ائشيتميشدي. جمعي بئش یاشي اولدوغونا باخمایاراق نئچه- نئچه آنانـين قارا تورپاق آلتـينا گئتديیيني گؤرموشدو. عادي‌جه سویوق دیمه‌دن ستلجم اولانـين، سيل توتانـين، یاخود اوشاق اوسته اؤلن آنالارين سایـي ان آزي ايگيرمي نفره چاتـيردي. یاخشي یاديندادير. پایيزين اوزون گئجه‌لري‌نين بيرينده دان یئري سؤكولر- سؤكولمز بير یوخو گؤردو:

«پاكيزه خالا كيچيك پئنجره‌لري‌نين شيشه‌سيني تاققيلداداراق آناسينـي سسله‌یيب دئدي: «رحيمه اوشاق اوسته اؤلوب، آروادلارين هاميسي گئدير، سن ده گليرسن‌سه تئز اول». وایـيش «اوشاق اوسته اؤلوب» سؤزونو ائشيتمك همن, یوخودان ديك آتـيليب آغلاماغا باشلادي. آناسي اونو باغرينا باسيب گؤزونون یاشينـي سيلدي. آناسي‌نـين ديري اولدوغونا هله ده اينانمایان وایـيش اليني اونون اوز- گؤزونده، بویون- بوغازيندا و دؤشونده گزديره‌رك ديري اولدوغوندان آرخایـين اولوب، آز قالا اريیيب جانـينا هوپاجاق قده‌ر آناسينا سيغيندي.

بئش- اون گون اوندان سونرا توحيدين رحمت‌ليك رحيمه‌نين اوغلو ايبيشه «ننه یامانـي» دئديگيني آناسينا دانـيشاندا آناسي اونا تاپشيراراق:

– «نابا، نابا، ائله سؤزلر آغزيندان چيخا، آناسيز اوشاغين قلبي سينـيق اولار. سودومو سنه حالال ائله‌مه‌رم». دئميشدي.

وایـيش یئرينه گيريب آناسينـين ايستي قوینوندا یاتاندا هله  یوخو آپارماميش موختليف فيكيرلرله ال‌به یاخا اولوردو: «بلكه منيم ده آنام بيزي دوغاندا…. یوخ, ديليم قوروسون، ائه كاش آنام مني اصلن دوغمایایدي…. اوندا بس آنامين بالاسي كيم اولاردي، هه؟ آللاها شوكور كي، آناما هئچ زاد اولمایـيب. آللاه ائله‌مه‌سين بير ده دوغا».

آناسي ايسه قوینونداكي وایـيش قلبي‌نين چيرپينتـي‌سيندان اونون هیجان كئچيرتديیيني دویور و پامبيقدان دا یومشاق اولان اليله اوشاغين بویون- بوغازينـي سيغاللایـير، اليني كوره‌یينه چكير و اوزونو اوزونه سؤیكه‌یرك اونا سونسوز ذؤوق آشيلایـيردي. او ايل یـئددي یاشينا چاتميش وایـيشي دا آتاسي اؤزو ايله شهره آپاراجاقدي. آخي اوشاقلار او یاشا چاتديقدان سونرا ايلده بير دفه، نؤوروز بایرامينا اوچ- دؤرد گون قالاندا آتالاري، عمي‌لري یاخود دا بؤیوك قارداشلاري ايله شهره گئديرديلر. اؤزوندن بؤیوك قارداشي كئچن ايل شهره گئتميشدي و شهرين نه اولدوغونو بيليردي. وایـيشا شهردن آغيز دولوسو دانـيشميشدي. حتّا ناغيللاردا دئیيلديیيني ده اؤز گؤردوكلرينه قاتـيب دئمك‌له وایـيشدا شهره نيسبت باشقا بير احوال- روحيیه یاراتميشدي. حامامدان خوشو گلمه‌سه ده پيسله‌مه‌ميشدي. پيسله‌سه‌یدي ده وایـيش اينانمایاجاقدي. آخي سودان كيمين آجيغي گلر؟

بایراما دوز اون یئددي گون قالميش وعده یـئلي اسن گوندن اعتيبارن گونلري سایماغا باشلادي. آتاسي‌نـين دئديیينه گؤره، آخير چرشنبه‌یه ايكي گون قالاندا شهره گئده‌جكديلر. بو ايلكي بایرام شنبه‌یه دوشوردو.

نهایت سود گونو گليب چاتدي و وایـيش بو گئجه‌ني زورلا دا اولسا سحره چيخارتدي. آناسي خوروزون ايلك بانـيندا اوره‌یينين باشيندان توتان خفيف بير سانجي‌دان یوخودان آیـيلدي. اوّل وایـيشا باش چكدي. اوشاغين دوداغي خفيفجه قاچير و شيرين یوخو، بلكه ده شهر یوخوسو گؤروردو. یورغانـي اوشاغين اوستونده بركيديب حیه‌طه چيخدي. سانجي خفيف ده اولسا آزالميردي. آی‌گونو اولدوغونو یقين ائديب فيكيره گئتدي. كيشيني اویاديب ماجرانـي دئمك ايسته‌دي. بيردن وایـيشين شهره گئتمك هوه‌سي یادينا دوشدو. اوشاغا قيیمادي، اوره‌یينين باشينـي بير آز اوووشدوروب، یاتاغا اوزاندي. نهایت دان یـئري سؤكولنده كيشيني اویاتدي. هر ايكيسي دستماز آليب ناماز قيلديلار. ناماز قورتارار- قورتارماز وایـيش ديك آتـيلدي. لاكين آتاسي‌نـين ائودن چيخماديغينـي گؤروب اؤزونو یاتميشليغا ووردو. آناسي نامازدان سونرا یاغدان، پئنديردن، یومورتادان و ساتـيلاسي نه وار ايديسه ايكي وئدره‌ده یـئرلشديريردي. بایرام آیـين- اویونونا لازيم اولان توربالاري دا خورجونون گؤزونه قویدو. وایـيشين اویاق اولدوغونو بيلمه‌ین آنا اونون باشينـين اوستونه گلدي. وایـيش اؤزونو هله ده یاتميشليغا وورموشدو. او، هميشه‌كي كيمي هم آناسي‌نـين اللرينين حرارتيني بویون- بوغازيندا دویماق، هم ده سيناماق ايسته‌یيردي. یعني كي، اونو شهره آپاريرلار، یوخسا، ايلده‌كي كيمي باشينـي آلداتماق ايسته‌یيرلر. اونون بو تدبيري آناسينـين گؤزوندن یایـينمادي و هاچاندان هاچانا گؤزلريني آچاندا اوزوندن اؤپوب دئدي:

– خبيث اویاقميشسان كي؟

– هه، ائله بيليرسيز دده‌م منسيز شهره گئده بيلر؟

آناسي بویونو اوخشادي:

– ماشاللا سن اؤزون كيشي‌سن ده‌ه‌ه‌.

– به نه‌ه‌ه‌ه‌. شهردن سنه یایليق آلاجاغام دا!

آرواد «بالامين كيشي بویونا آناسي قوربان»- دئیه وایـيشي یـئريندن قالديردي. ال- اوزونو یودو. پالتارينـي گئیينديردي و ارينه دؤندو:

– اوشاغين اؤز اینينه پئنجك- شالوار آلارسان.

اوره‌یينين باشيندان بو دفه داها گوجلو توتان سانجينـي گيزلي ساخلایا بيلمه‌دي. وایـيش آتاسيندان قاباق ديللندي:

– سنه نه اولدو آنا؟

آرواد كيشي‌نين ده سوآل دولو باخيشلارينا جاواب اولاراق كسكين ايفاده ايله دئدي:

– منه هئچ نه اولمایـيب.

سونرا كيشي‌یه آی‌گونو اولدوغونو بيلديره‌رك آرتـيردي:

– سيز یوبانمایـين. بؤیوشو یوللایارام، زولئیخا باجي‌نـي چاغـيرار، سيزليك بير ايش یوخدور.

دوغرودان دا اونلارليق هئچ بير ايش یوخ ايدي. مال- حئیوانا باخماقدان باشقا بوتون ايشلري آروادلار گؤره‌جكدي و كيشي‌نين شهره گئتمه‌سي داها دا اووسانایا دوشوردو. چونكي لازيم اولان دارچين، زنجفيل، ساري‌كؤك و سایيره‌ني آليب گتيره‌جكدي.

اونلار بئش اون نفرليك یولا دوشوب یـئكه‌ليني و گيلاندووو كئچديلر و گونش چيخار- چيخماز پوچئت یولونا یـئتيشديلر. وایـيشين بيرينجي دفه شهره گئتديیيني بيلن گول‌آغا اونا زارافات‌لا یاناشدي:

– بيليرسن ده‌ه‌ه‌. شهره بيرينجي دفه گئد‌ن آدام آغزينا سوموك گؤتورمه‌لي‌دير. یوخسا دوشر- دوشمزي اولار!

وایـيش دوشر- دوشمزين معناسينـي بيلميردي. گول‌آغا ايضاح ائده‌رك دئدي:

– یعني كي، بير داها شهره گله بيلمزسن!

بو، وایـيش اوچون هر نه‌دن چتين ايدي. «نه وار كي، آغزيما سوموك ده گؤتوره‌رم»- دئیه اؤز- اؤزونه دوشوندو. لاكين سومویو هارادان تاپاجاق و هاچان آغزينا آلاجاق سوآللاري جاواب‌سيز ايدي. آتاسيندان سوروشماغا دا اوزو گلميردي. هردن سوآل دولو باخيشلارلا گول‌آغایا باخيردي. گول‌آغا ايسه اؤزونو اویانا قویموردو.

نمين ماشينـي یول اوستونده ماشين گؤزله‌ین آداملاري گؤروب ساخلادي. وایـيش آتاسي ايله گوجنن ماشينا سوخولدو. ماشين یاريم ساعآتدان سونرا گيلان قاراجيندا دایاندي و سرنيشينلر ائنيب هره‌سي بير طرفه یوللانديلار. گول‌آغا اونلاردان آیريلاركن پيچيلتـي‌یا اوخشار سسله وایـيشا دئدي:

– ناراحات اولما، من هامي‌یا دئیه‌رم كي، وایـيش آغزينا سوموك گؤتورموشدو.

وایـيش دريندن نفس آليب آرخایـينلاشدي و گؤزلريندن ساچان اوشاق گولوشو ايله ممنون اولدوغونو بيلديردي.

هر شئیدن اوّل یاغي، پئنديري و یومورتالاري موشتري اولدوقلاري باققالا وئريب «ناغي» حامامينا گئتديلر. اون دؤرد یاشيندان بؤیوك یـئني یـئتمه‌لره، گنجلره و كيشي‌لره فيته و قتوه وئريليردي. سویونوب ايچري كئچديلر. بوخار آدامي بوغوردو. داها چوخ سابين كؤپویونه اوخشایان چيركاب قانووچالاردان آخيردي. سسلر كونبزده عكس-ي صدا تؤره‌دير و كيمين كيمه نه دئديیيني آوارماق اولموردو. آتاسي وایـيشا خبردارليق ائده‌رك «گؤزله سوروشوب یـيخيلمایاسان»- دئدي و اؤزو خزينه‌یه گيرديكدن سونرا اونو دا قالديريب آز قالا یانديراجاق ايستي سویا سالدي. وایـيش ايچيني چكدي و قيشقيرماسينـين قارشي‌سينـي گوجله آلدي.

حامامدان چيخديقدان سونرا یاغ- پئنديري وئرديكلري باققالا موراجيعت ائله‌ديلر. باققال «حئسابلاماغا واختـيم یوخدور»- دئیه بئش- اون تومن پول وئريب آرتـيردي:

– گينه لازيمسا پول وئريم؟ گئدين آلاجاغينـيزي آلين، گون‌اورتا چاغي حئسابلاشاريق.

وایـيش‌گيلين ايكينجي ايشي پئنجك- شالوار آلماق ايدي. «تزه مئیدان»ـا گئتديلر. آتاسي ساتـيجي‌یا موراجيعت ائده‌رك دئدي:

– اوشاغين اینينه پئنجك- شالوارين وار؟

اوشاق سؤزو وایـيشي بير آز نئجه دئیه‌رلر, قيجيقلانديرسا دا سسيني چيخارتمادي. آخي آتاسينا اعتيراضينـي هميشه آناسي‌نـين واسيطه‌سيله یـئتيريردي. بير ده كي، اونون اصل مقصدي اجرلي پئنجك- شالوار گئیمك ايدي. قوی اونو اوشاق حئساب ائله‌سينلر، یالنـيز آناسي‌نـين اونا كيشي دئمه‌سي كيفایت ائديردي. ساتـيجي «مالي نه اولسون؟»- دئیه سوروشدوقدا، آتاسي دئدي:

– نه اولاجاق. ميل- ميلي فاسنيیه.

ساتـيجي رفدن بير دست پئنجك- شالوار گتيريب بير باشي زورلا وایـيشين اینينه گئیديردي. پئنجه‌یين كيچيك اولدوغونو اؤزو ده بيلدي. آنجاق اوندان بؤیوك پئنجك وایـيشين ديزلريندن ده بير آز آشاغي دوشوردو. آتاسي پئنجه‌یين قوللارينـي اوچ دفه قاتلایـيب ساتـيجي‌یا دئدي:

– نه عئیبي وار، اوشاق بؤیویه‌جك ده‌ه‌ه… گلن ايل اینينه دوز قالار.

لاكين وایـيش چيیين‌لريني اویناداراق بو بویدا پئنجه‌یي گئیمه‌یه‌جه‌یيني بيلديردي. ساتـيجي ايسه موشتري‌ني ايتيرمه‌سين دئیه كيچيك نومره‌لي پئنجه‌یي اوشاغين اینينه گوجله كئچيريب اویان- بویانـينـي دارتماقلا هر تؤرله اولورسا اونلارا سوخوشدوردو.

وایـيش ائله اورداجا اجرلي پئنجك- شالواري گئیيب كؤهنه‌سيني توربایا قویوب قولتوغونا ووردو.

كيشي ائوه لازيم اولان قنددن، چایدان، چيت- ‌چؤله‌دن و بيرآز دا بایرام آیـين- اویونو و البتّه شام، هميشه‎جاوان بوداغي، بير ده كي، وایـيشا توپ‌تاراققا، چيرت-چيرت، اولدوزو فيشنگ و س. آليب، خورجونون گؤزلرينه دولدوردو و نمين ماشينـينا اوتوروب یولا دوشدولر.

اونلار گيلاندوودا ائنيب قالان یولو پيیادا گئتمه‌لي ايديلر. كندين اؤزونده‌جه سيسقا یاغيش باشلادي. هاوا ائله توتولموشدو كي، آچاجاغينا ذرّه‌جه اوميد یـئري قالميردي. یـئكه‌لي‌یه چاتاندا تاماميله ايسلانميشديلار. وایـيشين آیاقلاري قالوش آیاق‌قابي‌نـين ايچينده فيرچيلدایـير و هر آدديم آتاندا پالچيق قاريشيق سو آز قالا صيفتينه چيرپيليردي. پئنجه‌یين اوزو ايله آستاري‌نـين آراسينا قویولموش سيیه‌زي پارالاري قوپوب، قاباق جؤنگه‌لرينه یـيغيشميش و ايچي دولو توربا كيمي هر آدديم آتاندا ديزلرينه دیير و وایـيش ايسه دند وورولموش جؤنگه كيمي یـئريمه‌لي اولوردو. ايسلانميش فاسنيیه‌نين رنگي اوشاغين بویون- بوغازينـي تامام بویاميشدي.

ائولرينده ايكي- اوچ نفر آرواد وار ايدي. زولئیخا كؤرپه‌‌یه ايده كره اوددوروردو. گؤیچك بي‌بي اينك‌لري ساغيردي، آناسي ايسه یـئرين ايچينده اوزانميشدي.

وایـيشي گؤرن آنانـين سولغون دوداقلاري قاچدي و بوساغادا دایانان، پاپاغي بوغازينا كئچن و هله ده اوست- باشيندان سو سوزمه‌لنن و كؤرپه قوزو نيگرانچيليغي كئچيرن وایـيشين آز قالا چيرپيناراق كؤكسونو دليب چيخاجاق اوره‌یي بير آز ساكيت‌لشدي. بيردن پاپاغيني چيخاريب آناسينا طرف شوتودو و سویوقدان گؤیرميش دوداقلارينـي اونون سولغون یاناقلارينا سؤیكه‌دي. اوره‌یيندن بير دویغو كئچدي. او دویغوسونون نه اولدوغونو دوز قيرخ ايل سونرا آیدينلاشديرا بيلدي: «آنا اولمایاندان سونرا شهر نه‌دي، جنّتين اؤزو ده آداما یاپيشماز».

جمعي ايكي ساعآت بوندان اوّل فارغ اولموش آنا قالخيب اوتوردو. بالاسينـين ايسلانميش پالتارينـي اینيندن چيخاريب دیيشدي. یاش پالتاري سيخيب كورسو آلتـيندان تنديره آسلادي. اوشاغي اؤز یانـيندا یاتـيرديب، یایليغي ايله اوز- گؤزونو سيليب قوروتدو. بي‌بي‌سي وایـيشا یاخينلاشيب كؤنلونو آلماق اوچون «بي‌بي قوربان، جيققيلي باجين اولوب ائی، اؤزو ده لاپ قاغاسينا اوخشایـير»، دئدي. وایـيش سون درجه كسكين بير ايفاده ايله جاواب وئردي:

– نه باجي ايستي‌یم، نه قاغا!

زولئیخا خالا اؤزونه مخصوص ايفاده ايله و وایـيش باشا دوشمه‌‌سين دئیه بير باشي ايشاره ايله دئدي:

– گؤزو گؤتورمور، كؤرپه‌نين خوروشون چكير.

آمما بير وایـيش, بير ده آناسي بيليردي كي، او بو سؤزو یالنـيز آناسينـي ايتيرمك احتيماليندان دهشتلي بير كابوسدان چوخ قورخدوغوندان دئیير.

ائرته‌سي گون آنانـين وضعيیتي گؤزله‌نيلن كيمي اولمادي. آرواد هله ده قان ايتيريردي. بيشيريلن قویماق و خشيلدن ده یـئیه بيلميردي. آمما بوتون بونلارا باخمایاراق هله زولئیخا خالا گلمزدن اوّل یـئريندن دوردو، اوشاقلارينـين چای- چؤره‌یيني حاضيرلادي و حتّا وایـيش ناراحات اولماسين دئیه اونونلا بيرليكده، اوره‌یي آپارار- آپارماز بير- ايكي تيكه یـئدي. سونرا كورسونون آلتـيندا تنديره آسلانميش پئنجك- شالواري چيخاريب قيريشيغينـي آچدي و سليقه ايله بوكوب بایرام گونو گئیمك اوچون بوقچایا قویدو…

ايكي- اوچ گون عرضينده آروادلارين غیر-ي عادي گليش- گئديشي وایـيشي سون درجه نيگران ائتميشدي. آنانـين گرگين وضعیتيني دوشونن زولئیخا خالا و سود گونوندن اعتيبارن سحردن آخشاما كيمي وایـيش گيلده اولان گؤیچك بي‌بي كؤرپه‌نين چيله‌یه دوشمك احتيمالينـي اونوداراق اونو ائوه گلنلرين آیاغينا آپارمير و حتّا دوعاليقلي اولان آروادلارين بئله قيچينـين آراسيندان كئچيرميرديلر. بئله مقاملاردا ائوه، دیمه‌یه گلنلرين شن احوال- روحيیه ايله زاهي‌نـين اون‌سویوندان یاخود قيرخيندان دانـيشماغين یـئريني، اوميدسيز توركه‌داوا مذاكره‌سي آلميشدي. بو بحث‌لر بعضن قيزغينلاشاراق فكيرلرين چوخلوغو ايله گئنيش‌لنير و پایـيزدا سيغيرچينلارين اوچوشو كيمي معيّن بير نؤقطه‌یه دوغرو شوتویور. لاكين قونماق ايسته‌ديكلري یـئرين الوئريشلي اولماديغينـي دویان سيغيرچين دسته‌سينين یـئني‌دن یوكسه‌ليب، آخير كي، قونمالي اولدوقلارينـي دویاراق لوپا- لوپا گؤیون یاخاسيندان قيريليب یـئره دوشمه‌لري كيمي بحثين ده نتيجه‌سيز اولدوغونو دویان آروادلارين فيكيرلري هاچالانـير و آیري- آیري فيكيرلر ايره‌لي سورولوردو:

 «آللاه درد وئريب، درمان دا وئريب»

«آروادين قئیدينه قالان اولمایـيب, دوعا ساتـيبلار».

زولئیخا خالا اؤز وظيفه‌سيني دوزگون یـئرينه یـئتيرديیين ايضاح ائده‌رك دئدي:

«اوّل قاینار سو حاضيرلاديم، هامينـي ائودن چيخارتديم. اوشاق اولدوقدان سونرا دا باخ او شيش‌له ائوين دؤوره‌سينه جيزيق چكديم، زاهي‌نـين باشي آلتـينا دا لازيم اولان دميردن- زاددان قویموشام!».

«باخ رحمت‌ليك كالبا ننه، بئله زاهي‌لارا آغچا چوغانـي وئره‌ردي».

«یوخ، آرواد هوولایـيب».

 بونلارين هاميسينـي ائشيدن و اؤز وضعیتيني هامي‌دان یاخشي بيلن آنا ايسه آللاهدان بيرجه بو بایرامي مهلت وئرمه‌سيني ديله‌یيردي.

بایرامدان بير گون قاباق آنانـين دیمه‌یينه گلن آروادلار ائودن چيخاندا «آللاه شافاسين وئرسين»، دئسه‌لر ده اؤز دئديكلرينه ذرّه‌جه اينانميرديلار. بير- بيرلري ايله دانـيشاندا ايسه آنانـين هم گلين دؤورونو یاشاديغينـي، هم ده چولپالارينـي نظره آلاراق «آللاه باغيشلاسين، آپارسين» دئمه‌یه ده ديللري گلميردي.

بایرام گونو آرتـيق وایـيش گلنلرين هم سيستئمي، هم ده یـئريش قایدالاري دیيشميشدي. گلنلرين بير آیاغي گلير، بير آیاغي گلميردي. زاهي‌نـين اطرافينـي تامام یاشلي قادينلار آلميشدي. هامي سوم توتوب اوتورموشدو.

آنا سون آنلاريني یاشایـير، سون نفس‌لريني چكيردي. اوشاقلارين هاميسيني ائودن چيخارميشديلار و بایرام‌لاشماق اوچون معيّن ائولره اكميشديلر. وایـيشين فيكريني تاماميله یایـينديرماق اوچون حتّا بوقچانـي آچيب اجرلي پئنجك- شالوارينـي گئیينديرمك ايسته‌ديلر. لاكين یاغيش دیه‌ن پئنجك او قده‌ر یـيغيلميشدي كي، ‌گؤیچك بي‌بي قولتوقلارينـي سؤكسه ده اینينه اولمادي.

قورو نفس‌دن باشقا هئچ بير حركت ائده بيلمه‌ین آنانـين گؤزلري غیر-ي عادي اولاراق دولانـير، اطرافي نه اوچون‌سه سوزوردو. ديلي اولسایدي اوجادان باغيراراق « وایـيشيمي گتيرين» دئیه‌جكدي. لاكين دوداقلاري خفيفجه ترپنديسه ده هئچ بير سس ائشيديلمه‌دي. آخير كي، اونون بو غیر-ي عادي‌ليينين معناسينـي باشا دوشن اولدو. گؤیچك بي‌بي ائودن چيخاراق وایـيشي گتيردي. اونون اوزونو آنانـين دوداقلارينا یاخينلاشديردي و بالاسينـي سون دفه اولاراق اؤپه بيلديیيندن ممنون اولدوغونو و عئیني حالدا بئله حیاتا نيفرت ائتديیيني ايفاده ائدن سيرلي بير گولوشله دونیانـي دیيشدي.

بو فاجيعه‌ني وایـيشدان گيزلي ساخلایاراق اونو سورعتله ائودن چيخارتديلار.

آخشام چاغي وایـيش ائوه قایـيداندا گؤیچك بي‌بي‌نين كایيناتـي یاخيب- یانديران حوزن‌له آغي چكديیيني ائشيتدي:

داغلارا باخ داغلارا

شئه قوندو یارپاقلارا

آنانـي سوروشسالار

قاريشدي تورپاقلارا

وایـيش هؤنكورتو ايله آغلاماغا باشلادي و اؤز سسي اؤزونو اویاتدي.

طبيعتين شيلتاق قوینو خزردن قوپان مئه پارچالاري باغروو داغلاري‌نين اته‌یي ايله ساوالانا دوغرو شوتویوردو. جوتدن آچيب دوبارایا اؤتوردویو اؤكوزلر قورو تورپاق اوزه‌رينده آغزي مئهه طرف یاتـيب گؤوشه‌یيرديلر. قيرغينـين آمان‌سيز هوجومونا معروض قالان بير توراغای قالين تيكان كولونا سيغينـيردي. چیيرتكه‌ني نيشان آلان كرتينجك یـئره دوغرو شوتویوردو. ائله بو آنداجا اوغلو قارا آناسينـين اؤیره‌تديیي قایدایلا، «بيري مين اولسون، یورولمایاسان آتا، موشتولوغومو وئر، جيققيلي باجيم اولوب» دئدي.

یک پاسخ

  1. سلام. آغداشلی معلیمین بو دیرلی اثری منی بیر داها سئویندیردی. بومحتشم حئکایه جیگی اوخویاندان سونرا نثریمیزه داها دا ایناندیم . اونون بو اثریندن اؤیرندیم کی، آغیز ادبیاتیمیزین اینجه لیکلری هله ده چاغداش یازیلاریمیزدا اؤز وارلیغینی حقیقتا قورویانلارین یازیلاری نین قاباریق خصوصییه تلریندن دیر چوخ گؤزل دیر .ممکنسه منیم ایمیلیمی آغداشلی معلیمه چاتدیرین و اولسا اونون دا ایمیلینی منه چاتدیرین .تشکرلرله / ائل اوغلو / 91/11/18

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *