بهمن خونین جاویدان تا ابد زنده یاد شهیدان…
اوشاقلارین های- کویو بلندگودان خیشیلتی‌ایله چیخان آهنگه قاریشیب. آستانادا دایانییب اویان بویانا باخیب کئچیرم سالونا. اوشاقلار منی گؤرجک بیر‌نئچه‌سی قاچا- قاچا گلیب منی قومارالاییرلار: «خام معلم باخین- باخین –باخیز…» هاممی‌سی بیرآندا دانیشدیقلاری اوچون سؤزلرینی یاخشی آییرد ائلیه بیلمیرم؛ اللرینده بیرزادلاری گؤسته‌رمه‌لریندن باشا دوشورم ایشلرینه تائید ایسته‌ییرلر. «برکاننا -آی‌برکاننا. هه، هه، گؤزل اولوب» دییه- دییه سالونا گؤز دولاندیریرام.
هر بیری بیر یاندا چابالاییب، چالیشماق‌دادیرلار. بیر نئچه‌سی ایسه بالاجا اللری‌ایله بویوک روزنامه‌دیواری‌یه بیرزاد یاپیشدیریب یازیب- پوزماقدادیرلار. ایکیسی کاشی اوسته یوخ، سانکی فرش اوسته اوتوروبلار آرخئین باغداشلارینی قوروب قویوخ پوفله‌‌ییرلر. اوودلارینی شیشیرمکدن اوزلری پؤرتوشوب.
اوجا سسله دئیرم: «اوشاقلار اَل دَبردین بویون هر ایشی قوتارمالییق هاااا.» بیرلیکده جواب وئریرلر…
کئچیرم دفتره؛ خانم مدیرین قاش قاباغی بویون ده یئرینن گئدیر، ضبطین سسینی قیساراق دئیرم: «بلندگونون خیشیلتی‌سی یامان چوخالیب ایزنیزنه ضبطین خودون آلیرام.»
مدیر‌ایسه بویوک دفتری باغلاییب الینده‌کی خودکاری اوستونه قویوب. دئیر: «بویون بهمن‌ین 12سی دی سیز بو بالاجا مدرسه‌نی بزییب قوتاراممادیز.»
مدیر آیاغا قالخاراق آرتیریر: «من گئدیرم اداره‌یه سیز ده بویون هاردان‌دی بزح- دوزح ایشین قوتارین.»
«چوخ ایشیمیز قالمیر، خانم مودور سیز صاباح مدرسیه گیرنده مدرسه یوخ ائله بیل طوی تالارینا گیرجاخسیز.»
مدیر قاشلارینی چاتیب دئیر: «ائله ده آبارتمیین، گؤروم دا منی نئجه اداره‌نین دیلینه دوشوره‌سیز.»
گولومسه‌یه- گولومسه‌یه دئیرم: «قوخمیین سوز گلیشی دئدیم.»
کیفی‌می آسقی‌یا آسییب سالونا کئچنده مدیر دئییر: «هر نه ده کم کسریز اولسا دئیین بابایا آلسین.»
باشیملا یانیت‌لاییب کئچیرم سالونا. خیشیلتی سسی باتسا دا اوشاقلارین آری کیمی ویزیلتی‌لی سسلری دولور قولاقلاریما. اوشاقلار منی گؤرجک بیرده دؤوره‌له‌ییرلر. دئییرم: «اوشاقلار شلوغ ائله‌مه‌یین، نوبه‌ینن بیر‌به‌بیر هاممیزین ایشلرینی یوخلایاجایام.»
«خام معلم سن‌الله اول بیزه باخیز پرچم لری قشح بزه‌میشیخ؟»
پرچملره باخیرام: «ده‌ده وای! بولاری نییه بئله شیله- شوربا ائلیبسیز تئز اولون رَحلی کاغاذلاری پرچملرین آرالاریننان چیخاردین.»
قیزلارین بیری نردواندان یوخاری قالخیر. اوشاقلارا دئییرم: «بیریز بو نردواندان برک- برک یاپیشین.»
کئچیرم روزنامه‌دیوارینی حاضیرلایان اوشاقلارین یانلارینا. اوشاقلارین سورغولاری، شکایتلری یاغیش کیمی باشیما یاغیر. منسه روزنامه‌دیواری‌یه گؤز دولاندیریرکن بیردن بیره بسم‌الله‌ین بوش یئرینه گؤزوم ساتاشیر: «اوشاقلار هانی به بونون بسم‌الله-ی.»
مریم اَلینی قالدیریر: «خام اجازه، خام فامیل‌ده خوش خط تاببادیخ!»
مغنه‌سی‌نین اوچگن چنه‌سی قولاغی‌نین دیبینه کیمی چکیلیب، اونون گؤزل اوزو گولمه‌لی حالا دوشوب. گولومسه‌نه‌رک دئییرم: «قاچ دفتره، خانم مودور گئتمه‌میش قره ماژیکی آل گتیر بسم‌الله‌ی من یازیم.»
روزنامه‌لردن قوپاریب یاپیشدیریلان عکس‌لره، یازی خطالارینا، باخیب ایچیمده گولورم. گئچمیش رژیمین شاهی‌نین عکس‌لرینه قیرمیزی ماژیک‌له ضربدر علامتی چکیبلر؛ شعرلرین ده باشینا هر اویون گتیریب‌لر. بیر بیتینی قیز کورپوسونون عکسی‌نین ساغیندا یاشیل مدادینان، اوبیری بیتینی عکس‌ین سولوندا قیرمیزی مدادینان یازیبلار. شعرین قورتولوشوندا قره ماژیک‌له یازیبلار: «حبیب ساهر»
گوله-گوله دئییرم: «چکیلین من بسم الله‌نی یازیم سیز ده روزنامه‌دیوارینی دووارا آسین.»
بیردن بیره گؤزوم آشاغیداکی تاریخه ساتاشیر.
دئییرم: «اوشاقلار ۶۵ یوخ، ۱۳۶۵ یازیمالی‌ایدیز.»
مریم ماژیکی اوزومه کیمی اوزالدیب، دئییر: «خام معلم بویوون خام مودویدن آلدیم. خام اجازه من مغنه‌می چیخایدیم؟ کئشی قولاغیمی کسیر.»
ماژیکی آلیرام. مغنه‌سی‌نین کئشی‌نی شل ائلییب تئز باشینا سالماسینی تاکید ائلیرم.
روزنامه دیوارینین قالان یئرلرینه گؤز دولاندیریرام، گوله- گوله دئییرم: «اوشاقلار با مشاکرت یانی نمنه؟! اونو سیلین با مشارکت یازین!» اوشاقلارین بیریسی اَلینی قالدیریب: «خام اجازه! خام اولاری مریم یازیب اوزوده هامی‌سین‌دا غلط یازیب.»
دئییرم: «نئیله‌یه‌ک سیلیب تزشدندن یازارسیز.»
مریم پورتوب، یاناقلارینین پورتوشمه‌سی اوتانماسیندان دی یوخسا قویوخ پوفله‌مک‌دن، بیلمیرم.
بسم‌الله‌ی یازماق اوچون میز آرخاسیندا اوتوروب روزنامه‌دیوارینی اؤنومه چکیرم. دقتیمی توپلاییرام بسم‌الله‌ی خوش خط‌ایله یازیم، آمما ماجال اولمور. وضعیت قرمز آژیری چالینیر.
اوشاقلار آژیر سسینی ائشیتمک همن بیر- بیرلرینی ایته‌لیه- ایته‌لیه دلی سووجاسینا قاچیرلار. اؤز- اؤزومه دئییرم: «اَهَه، لعنته گله‌سن. آدامی ائله خفتن باسیر کی! »
مدرسه‌نین باباسی سالون قاپی‌سینین آغزیندا دایانیب، دئییر: «خانیم یئین اولون اوشاقلاری حیطه‌ساری یوللاندیرین.»
سونرا قاپینین اوبیری تایینی آچماغا چالیشیرکن اوز توتوب اوشاقلارا دئییر: «قورخمئین- قورخمئین آزجا سوووشسا وضعیت آغ اولار»
اوشاقلارسا بیر قلمه قیشقیریرلار. سسیم اونلارا چاتسین دییه باغیریرام: «اوشاقلار، قاچین حیطه، حیط‌ده دووارلارین تیمینده دالدالانین.»
اوشاقلارین بیریسی برکدن اَلیمدن یاپیشیب. قورخودان تیر-تیر اسیر. اَلینی یاپیشیب اونونلا بیرلیکده قاپی‌یا ساری قاچیریق.
«خام معلیم آخی منیم مغنه‌‌م قالدی.»
قولوندان چکیرم: «نئینه‌خ قاییداندا گؤتوررسن.»
ایچیمده گزیشن قورخونو ذهنیمدن آتماغا چالیشسام‌دا، اورگیم یئییندن دویونور. معلم‌لر کلاسلارداکی اوشاقلاری حیطه ساری یونله‌ندیریرلر.
سالون‌دا قاچارکن بیر آن گؤزوم نردوان باشیندا ایچین چالا- چالا آغلایان قیزا ساتاشیر، نردواندان برک- برک یاپیشیب قیچلارینی دا بیر- بیرینه یاپیشدیریب سیخیر. بو هایا-هایدا اونون شالوارینین آراسی‌نین ایسلاق اولدوغو گؤزومدن قاچمیر. قورخوسوندان، اوتانج ایله کیرییب قالیب نردوانین باشیندا. اَلیمدن یاپیشان قیزین اَلینی بوراخیب نردووانا چیخیرام. بیرتَهرینن قیزدان یاپیشیب اونو آشاغی یئندیریرم. طیاره‌نین کوشولتوسوندان یاخین اولدوغونو تخمین ویریرام. قورخودان وجودومو سویوق تر باسیر.
بابا حیرصله آچیلمایان قاپی تایینا بیر تپیک وورور: «اَده بورا باخ ائی بو بویدا قاپی دردیمیزه دیمه‌دی.»
سونرا قیشقیریر: « اوشاقلار بَه نیه بئله! ایته‌له‌مه‌یین آخی. سیره‌مینن کچین گئدین حیطه یئیین گئدسز طیاره‌نی ده گؤررسیز .»
معلم‌لرین بیر نئچه‌سی اوشاقلاردان اونجه حیطه چیخاماغا چالیشیرلار، اونلارین ایشینه دیشیم باغیرساغیمی کسیر.
باباحیرصله دئییر: «اَهه سیزده بو قاپی دان گئچه بیلمه‌دیز یئیین اولون.»
بیراز اونجه اَلینی بیراخدیغیم قیز یئنه اَلیمدن یاپیشیر. قیزلارین اَلیندن یاپیشیب هوله‌سر قاپی‌یا ساری قاچیرام. بابا قاپینین تیمینده دایانیب اوز اوزونه دئیینیر: «پَه اَتونان ایشه باخ اِی میراثا قالمیش قاپی آچیلسایدی…»
طیاره‌نین کوشولتوسیندان اونون سوزلرینی داها آییرد ائلیه بیلمیرم. قاپینین باشینداکی شیشه‌دن گؤیه باخیرام…
**
آیینیرام. گؤزلریم آجیشا-آجیشا دومانلی گؤیه باخیرام. کوشولتو قولاقلاریمی دلیر. زیلله‌نیرم گؤیه بلکه کوشولتوسو گلن طیاره‌نی گؤروم. گؤی دومانلیق‌دی، بیرزاد سئچمک اولمور. سویوق‌دان تیر-تیر تیتره‌ییرم. اَل آتیرام آجیشیب، سولانان گؤزلریمی سیلیم. ساغ اَلیم گلمیر. ائله‌بیل سویوق‌دان کئییب، به نیه سویوق‌دا بوردا یاتمیشام؟ نه‌قدر یاتمیشام؟ قالخیب اوتورسام زاوال‌دان چیخارام، اولوب بیته‌نی ده باشا دوشرم. قالخماق ایسته‌ییرم، قالخا بیلمیرم. سویوق‌دان بئل بوخونوم قورو آغاجا دونوب. ساغ اَلیم لاپ قورویوب هئچ ترپه‌نه‌سی یوخدو. تامسینیرام. توز- تورپاق دادیندان چیم‌چه‌شیب اؤسکورورم. قولاق‌لاریمداکی کوشولتودان سانکی طیاره دیبیمده‌دیر. چتین‌لیک‌له یان-یؤرمه باخماق ایسته‌ییرم، گوجنیرسم ده ساغ-سولوما دؤنه بیلمیرم. سول الیم‌له گؤزلریمی اوووشدورورام بلکه آیدین گؤروم. یئنه هر یان کاس، توزاناق‌لی دی. سول اَلیم‌له باشیمی ساغیما چئوریرم. گؤزوم اوزوناسینا دوزولموش قارالتی‌لارا دوشور. گؤره‌سن منی قارا باسیر!؟…
اؤسکورمک‌دن خیرتدگیم شیشیب سول اَلیم‌له ساغ قولومو اوغوشدورماق ایسته‌ییرم بلکه کئیی آچیلا آمما اَلیم بوشا گئدیر. ایچیمه قورخو دوشور. بیراز یوخاری چیگینیمه کیمی اَلیمی آپاریرام، اَلیم یئنه ده بوشا گئدیر. گؤزلریم قارالیر هئی‌دن دوشورم…
اوزو قویلو دوشموش حالدا، گؤزلریمی آچیرام. اونومده سَرله‌نیب یاتان بیرینی گؤروررم. قارا قیوریم ساچلارینی سریب یئره اوزانیب یاتیب.
«قالخ- قالخ گئت ائوینده یات» دئمک ایسته‌سم ده، دییه بیلمیرم آغزیم آچیلمیر. جانیما اوشوتمه گلیر. دیشلریم دیشیمه دییر. سورونه- سورونه یانینا گئتمک ایسته‌ییرم، بدنیم سورونمه‌ییر. زوال‌دان سَمَه آدام کیمی‌یم. سول اَلیمی اورا- بورا سورتورم. سورته- سورته اَلیمه بیر قول دَییر. سورویوب گتیریررم یاخینیما، اَلین اوستو سیریلیب. قان، بارماغینداکی اوزویو آلا بویویوب، اوزوک‌دن اؤز قولوم اولدوغونو آنلاییرام.
اوشاقلار هامیزین اللریز آغریماسین سیزین یاخشی نمره‌لریز منه بویوح هدیه‌دی. گلن ایلدن بئله‌نچی ایشلری گؤرمه‌یین.
اوشاقلارین بیریسی الی گؤیده دئدی: «خام معلم اجازه، خام مریم هدیه‌سین وئرمییب. اوتانیر دئییر هامینین قوطوسو یئکه‌دی منیم قوطوم جیققیلی‌دی.»
«مریم قیزیم گل یانیما. بیه‌‌م هدیه‌نین بویوک کیچیی وار؟»
مریم بالاجا اَلینی اوزالدیب بالاجا قوطونو وئردی. قوطودا ایسه ماوی قاشلی بیر اوزوک وار ایدی. اوزویو بارماغیما تاخیب اوشاقلارا گؤرسه‌دیب دئدیم: «به‌به، نه‌ده گؤزل هدیه‌دی. گؤرون نه‌ده یاراشدی.»
«خام معلم مشددن آلمیشام بیرین سیزه بیرین ده اؤزومه…»
زوران بیللاه قولو یاخینیما چکیرم، قولون اَلیندن یاپیشدیغیمدا، بالاجا الی اووجومون ایچینده ایتیر. اؤز اَلیم اولمادیغینی باشا دوشورم ایچیم گئچیب گؤزلریم قارالیر…
گؤزلریمی آچارکن ایشیق‌دان گؤزلریم قاماشیر. هریانی تار گؤروررم. اویان بویانا باخیرام هر یان آغ -آپباق دی. اولمایا اوچماق دایام؟ پاراوانین آرخاسیندان، قولاغیما گلن سسلره قولاق وئریرم.
بمباران مدرسه دخترانه زینبیه میانه توسط رژیم بعثی صدام که ۳۳ دانش آموز دختر را پرپر کرد و…
جهنم‌ده اولدوغومو آنلاییرام.
فروردین ۱۴۰۵
