اوخوماق زامانی: 7 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: رقیه هاشم‌زاده (خان صنم)
ترجمه: رقیه هاشم‌زاده (خان صنم)
رقیه هاشم‌زاده (خان صنم)
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

بسته‌لنمه‌میش ماهنی
رقیه‌هاشم‌زاده(خان‌صنم)

_قیزااا! من نییه فیکیر وئرمه‌میشدیم. سنین غریبه سسین وار؛ گئتسن دوبلاژ ایشینه یاخشی آد قازانارسان. بوتون اینستاگرام سننن دانیشار: «شوک شوک! برد پیت‌ی سسلندیرن آدام کیم؟»…«اؤلکه‌میزده ایلک دفعه لئنوناردو دیکاپریونو بیر قادین سسلندیردی!…دی دی دی دین»
بو سؤزلری دئیرکن جیددیلیک‌له، اللرینی هاوادا اویناداراق جور به جور پوزلار وئریب، ادالار چیخاردیردی.
بیردن بیره اوچو ده پیققیلداییب گولوشدو. آرتیق، اولدوقلاری مکانین رئفلکس شوشه‌لری گوزگویه چئوریلمیشدی.
ملک ساعاتینا باخدی. ماسانین اوستوندن آلدیغی تورکجه کیتاب‌لاری الینه ییغاراق «اوشاقلار بتر یوبانمیشام، دورورسوز یا من گئدیم؟»دئدی.
اونسوز دا سئودادان خوشلاندیغینا و اونون انرژیک، صمیمی و سئویملی اولدوغونا باخمایاراق بئلنچی اوتوروم‌لاردان اوقدر ده حظّ آلمیردی. بونون نه‌دنینی بیر تک اؤزو بیلیردی آنجاق لازیمینجا ایداره ائدیر، صینیف‌داشلارینی یولا وئریردی.
سئودا، گؤزلرینی سوزه-سوزه یاستیدان:
-یاخجی دا یاخجی! سنی ده تعریفله‌دیک اؤزونن چیخدین، نه یوبانماسی هله اول آخشامدی. باخ‌ائ! دئییرم، ائوه خبر وئر بو گئجه بیزه گل، خوش کئچراااا.
بونو خاص بیر طرزله و چوخلو عیشوه‌یله دئییب، مارالا گؤز ووردو!
سسی دویسا دا، نیسگیل دولو قونور گؤزلری یان ماساداکی یاراشیقلی بی‌لره دیکیلمیشدی. اوره‌یینده آرزولار سولور، حسرت‌لر دوغولور، اومیدلر گؤمولوردو.
بیردن ماسانین آلتیندان قیچینا بیر شئی توخوندو.
– آخ
– هاردا سومسونور گؤزلرین قیز؟!
مارال چیمخیردی.
ملک اؤزونه گلیب: «سئودا جانی چوخ ایستیییرم آما، سحر سکگیزدن آخشاما کیمی درسیم وار. همی ده، چوخ یورقونام؛ یاتماسام ایته دؤنه‌رم واللاه!» دئدی. «اوووف» دئیه ، مارال بیرده سسلندی، سونرا «بیز قاپیلماغا حاضیریق مله‌ییم!» دئییب، اونا بیر اؤپوش آتدی.
یئنه دوداقلاریندان پیققیلتی‌لار دیغیرلاندی!
اوچ یئنی یولداش اؤز حال‌‌لاریندان ممنون گؤرونوردولر. ملک ساغوللاشیب کافی‌شاپی ترک ائتمک اوچون آیاغا قالخدی.
– هر حالدا کرایه قالدیغیمیز ائو یونی‌یه(University سؤزونون قیسالمیشی) یاخیندی. ناواخت ایسته‌سن گل؛ چوخ سئوینه‌ریک.
مارال الینده کی ناپئلئونی شیرنی‌سینه بیر دیش ووروب ایری گؤزلرینی اولدوغوندان داها دا چوخ آچدی. دولو آغیزلا قالین بیر «هیم» سسی چیخاریب، باشینی قالدیریب ائندیره‌رک سئودانین سؤزلرینی تصدیق‌له‌دی.
اونلاری اؤپوب «یاخجی، باخاریق» دئدی.
قاپیدان چیخان ملک اؤزونده دئییلدی. خورجونا بنزر چانتاسینی چینینه فیرلادیب گؤیه زیللندی. هاوا قارالسا دا گؤی اهلیندن تکم سئیرک چیراق یاندیران اولموشدو! بوینوندان آسلانان قولاق‌لیغی‌نین اوج‌لارینی یوخلاییب قولاغینا تاخدی. تلفنوندان سئودییی بیر ماهنی‌نی سئچدی، دینله‌یه‌رک یولا دوشدو .
اسلش شالواری، اسپورت باشماغی، بارماقلارینداکی آرابیر لئنت‌واری قارا اوزوک‌لری و قولاق‌لاری ساللانمیش فری سایز چارخانا کؤینه‌یی بیر یانا چییین‌لرینه دوشموش ساری شالی و سکگیز نومره‌یله ماشینلانمیش ساچلاری چئوره‌ده‌کی هر کسین دیققتینی چکیردی.
چوخدان آلیشدیغی ترس باخیشلارا اؤنم وئرمیر کیمی داورانسا دا اؤزونو اوزایدان گلمیش کیمی حیس ائدیر، ایچینده قاسیرغا قوپوردو.
آناسی‌نین، آتاسی‌نین، خالاسی‌‌نین، عمیسی‌‌نین، ائله‌جه ده بوتون قوهوم‌لاری‌نین آجی سؤزلرینی، قیناقلی باخیشلارینی خاطیرلاماغی، یئددی آرخا یاد اینسانلارا یئتمیش دفعه حاق قازاندیریب اونلاردان گولومسه‌یه‌رک کئچمه‌یینه سبب اولوردو. کیملییینی ایتیرمیش کیمی هئچ یاندا یئری یوخ‌ایدی.
سارای گؤرونوشلو ائو‌لرینین قاپیسیندا دایاندی. آچاری قاپییا سالار-سالماز ذهنینده فلاش‌بک وورولدو.
بارلی-باغچالی حیطین قاپیسیندان ایچه‌ری گیردی. قاپیدان بینایا قدر آزی یییرمی متیر آرا وارایدی.
بو آرادا حیرصیله قیرمیزی شالینی بوینوندان آچیب بیر طرفه، مانتویا بنزر اوست گئییمینی ده چیخاریب چانتا قاریشیق باشقا طرفه توللادی.
ژرمن سوی‌لو شابالید رنگلی ایت‌لری شیمشیر بیتگی‌لری‌نین آرخاسیندان چیخیب اونا هوروب میریلداندی.” هه سئباستیین ائله بی سن قالمیشدین” دئییب، بینانین یاخینلیغینداکی اوزمه حووضونون قیراغیندا چؤمبلدی.
سودا عکس اولونان مله‌یه خئیلک باخدی. اوندان ایره‌نیر یاخاسینی قورتارماق ایسته‌ییردی. ائله پارلی پالتارلی اؤزونو سویا ووردو. حووضون اوزونلوغونو نئچه‌ دفعه گئدیب قاییتدیقدان سونرا چیخیب آرخا قاتدا گونش آلتینا سریلدی. قاماشان گؤزلرینی تام آچا‌ بیلمیردی. کیرپیک‌لرینده‌کی سو دامجیلاری گونشین شعاع‌لاری آلتیندا آلماس کیمی پاریلداییر ذره-ذره محو اولوردو.
– نه‌دی بو انایین ایشلر؟ گئنه نولوب؟ کیم نه دئییب سنه؟
سوال‌ ائله‌ین ، بایاقدان پنجره‌ آرخاسیندان بوتون باش‌وئرن‌لری گؤروب، حیطه ائنن آناسی‌ایدی.
آیدین گؤره بیلسین دئیه گؤزلری‌نین بیرینی قییب او بیرینی آچدی. دیرسک‌لرینی یئره دایایارکن آناسی‌نین اوزونه باخدی.
– یانی سن بیلمیرسن؟
بارماق‌لارینی شاققیلدادا-شاققیلدادا: “منیم الیمنن نه گلیر آخی قیزیم! آللاه بئله‌ ایستییب” دئدی آناسی.
آجیقلی_آجیقلی آیاغا دوردو:
– آی ماما منی بوننان آرتیق ایت ائله‌مه! قیزیم! قیزیم! آللاه بئله یارادیب هه، آما سیز نییه او طرفلیک یوخ بو طرفلیک ائله‌دیز؟ سیز نییه گؤزله‌مه‌دیز من یئکه‌لم اؤزوم سئچه‌م؟ اصلا نییه هامیدان گیزلتدیز؟ مگر دئمیرسن آللاهین ایشیدی؟ به آللاهین ایشینه کیم نه دییه بیلردی؟ اون‌سکگیز ایلدی منیم روحومو اسیر ائلییبسیز. بسدی! دای یورولموشام. او مالی چوخ گونو قره دده‌مه دییرسن من فیکیرلریمی ائله‌میشم. زحمت اولماسا، مالینا ضرر دیمه‌سه دئدیییم پولو بویون تؤکسون حسابیما. صاباحدان بو ایشین دالیسین توتاجام. تصدیق‌دن جاوازدان، هر پوخ-پوسوردن لازیمدی هامیسین آلیب اؤزومو بو فلاکتدن قوتاراجام.
اونون دا ایجازه‌سینه احتیاجیم یوخدو. بورا کیمی من حیاتا مجبور اولموشام بوردان اویانا حیات منه مجبور اولسون!
اللرینی باشی‌نین آلتیندا چارپازلاییب آلا قارانلیق اوتاغین تاوانینا ماریتمیشدی. آخشام گؤروش‌لرینی گؤزدن کئچیریر، ان چوخ دا سئودانی و یاناغیندان آلدیغی تاثیری دوشونوردو. هردن دوداغی قیمیشیر، هردن گؤزلری دولوب داشیردی.
اؤزونو تانییان گوندن حایاتی پارادوکس‌لارلا دولو‌یدو. دوشمان تورپاغیندا آزمیش، سیلاح‌سیز عسگر کیمی‌ایدی. نه دورا بیلیردی نه قاچا بیلیردی. هریانی مینالانمیشدی. آناسیلا سون دارتیشمالاریندان ایل‌لر کئچمیشدی آما آتاسی هله‌ده آنلاییش گؤسترمیردی.
گؤزلری آغیرلادی. بارماقلاری اوجوندا اطرافی سئزه‌رک مطبخه کئچدی. داوا درمانا مخصوص اولان سیییرتمه‌نی ائهمالجا چکدی. الینه گله‌نی، ان چوخ دا یوخو داوالارینی ییغیب اتاغینا قاییتدی. ماسانین اوستوندن قلم کاغیذ گؤتوردو. نسه بیر ایکی جومله یازیب قلمی کاغاذین اوستونه بوراخدی. داوالاری اووجونا بوشالدیب توالته گیردی. آینادا اؤزونه باخدی. تام بیر درد توپلوسونو گؤردو. توالتین چیراغی چیرتیلدایاراق سؤنوب آنی‌دن یانیردی. “سن نییه جان وئریرسن”دئییب، بوش اولوب اولمادیغینی یوخلاماق ایسته‌دی آما اووجونو آچا بیلمه‌دی. آینایا ساری قاییتدی.
اوره‌یینده کی آلوولار یوکسه‌لیر، اوزوندن باشیندان چیخیردی. اونو اؤلدورمک ایسته‌میردی، ان آزی بو شکیلده. اووجونو آچیب رنگ‌به‌رنگ حب‌لره باخدی. نه دوشوندوسه الینده‌کیلری توالته بوشالدیب سیفونو چکدی. لامپانی یئرینده برکیدیب اوردان چیخدی. اوتاغین کونجونده‌کی اوزون آینادا اندامینی سوزدو. الینی شورتونا سالیب فیکیره‌گئتدی.
قارشی دیوارداکی شکیلده ‌،بروسلی، الینده‌کی “نانچیکو”یلا اؤزونو آینادان گؤزه سوخدو. سانکی اونو دؤیوشه چاغیریردی.
گولومسوندو. آغلامسیندی.سیندی…سیندی…
دیک آتیلیب درحال الینی شورتوندان چکدی. آناسی چیغیر-باغیرلا یورقانی اوستوندن چکمیشدی.
– مین دفعه دئمیشم دورمیاجاخسان او میراث تلفونون آلارمینی سؤندور. سحردن وورهای چالیر، دا باشیم شیشدی.
یوخومو گؤرموشدو؟ ساعاتا باخارکن ماسانین اوستون‌ ده گؤزدن کئچیرتدی. اون‌ایکی یاریم ایدی. قلمدن کاغاذدان اثر یوخ‌ایدی. ایکی درسی قاچیرمیشدی. صینیفده‌کی‌لر ایندی یاواش-یاواش سئلفه گیریردی.
“اولار یئمک‌لرینی یئیینجه دوش آلیب یئتیشه‌رم” دئیه دوشوندو. یاتاقدان ائندی. ایپینی دارتاراق زئبرا پرده‌نی یوخاری ییغیب، پنجره‌نی تای با تای آچدی. بادام آغاجی چیچک‌لری‌نین عطرینی هر طرفه یاییردی. قوللارینی ایکی یاندان سون درجه آچدی. عطیرلی هاوانی جییرلرینه سیزدیریب گرنشدی. سونرا بیر الی‌له خفیف یوموروق‌لاری سینه‌سینه دؤشه‌ییب کؤکس اؤتوردو.
صینیفه گیردیینده، سئودا ویدیو پروژئکتور پرده‌سینی آچاراق کنفرانسا حاضیرلانیردی. هر طرفده اوچ بئش نفر توپلاشیب، اوغلانلی- قیزلی دانیشیغا مشغول‌ایدیلار؛ آغیز دئیه‌نی قولاق ائشیتمیردی.
اوستاد هله گلمه‌میشدی. یئرینده ایله‌شیب تاریخ کیتابینی چانتاسیندان چیخارتدی. بیرینجی دفعه بو درسه ماراق گؤسته‌ریردی. عمومیتجه یا صینیفه گیرمز یا یاریدا بوراخیب بیر بهانه‌یله ترک ائدردی. سئودا، تریبون آرخاسیندا دوروب لپ‌تاپی‌‌ایله قورتدالانیردی. دوشوندو کی: او، بو یونیفورمون ایچینده بئله روس گؤزل‌لریندن سئچیلمزدی. اونو وصف ائتمه‌یه هر کلمه‌یه أل آتیر هئچ بیرینی لاییق گؤرموردو. یئنی و بیرچوخ کلمه‌لره احتیاج دویوردو. قوجاغیندا قیمیلدانان اورقانا و اونا قارشی اولان هئچ بیر حیسسینه باشقا رغبت‌لری کیمی گؤز یوما بیلمیردی. بونلاری،موطلق یاشاتماق ایسته‌ییردی.
“آننم آننم بن نه گون‌لر گؤردوم. آننم آننم بن نه آجیلار چکدیم.آننم آننم…”
سوکوت، ال‌لرینی هر کسین آغزینا یاماسادا بونو یاخشی باجارمادی. هر طرفدن بیر آتماجا سسی قووزاندی.
– جاناااااا!
– قیز! عاغیللی آدام دا آیفونا بو زنگی قوشار؟
– اووووفففف!
– جان ملک!
آناسینی جوابسیز قویا بیلمزدی.کوریدورا چیخیب تلفونو جاوابلادی.
– آلو. هه ماما؟
سس گلمه‌دی. باغلانتی کسیلمیشدی. سون آرامالاردان آناسی‌نین آدینی تاپیب اوستونه ووردو.”The person you have called can not be reached…” باغلانا بیلمه‌دی.
آنتئنی یوخدور دئیه دوشوندو. تلفونو ویبره مودونا قویوب صینیفه قاییتدی.
اوستادلا بیرگه قاپییا یئتیشیب ایچه‌ری گیردیلر. ایندی اؤز یئرینده شومشه کیمی اوتوروب، اؤنه دوغرو باخان آکوستیک کیرلی‌لییی یارادان سایکوپات‌لارین نفس سسی بئله دویولموردو.
اوستاد سئودایا “باشلا”دئدی. اونا باخماقدان دویمور یورولموردو. سیماسیندا هانسی‌سا بیر ملک گؤرور گؤزلرینده هئچ بسته‌لنمه‌میش بیر ماهنی‌نین یازیلمامیش سؤزلرینی اوخویوردو. اونو آیاق باسیلمامیش آدالار کیمی باکیره، آزاد سولار کیمی درین، تاریخده باسدیریلمیش خزینه‌لر کیمی زنگین، گؤروردو. سئودا او خزینه‌لردن دانیشیردی.
ساغ بودونو قیجیشدیران تیتره‌ییش اونو اؤزونه گتیردی. تلفونونو جیبیندن چیخاریب آناسیندان گلن مئساژی آچدی: “بابان نوخوشلویوب، تئز کرخانییا گل”
کیتابینی تلفونونو چانتاسینا آتیب ایذین آلمادان تلم-تله‌سیک صینیفدن چیخدی.
فابریک‌ین اوجسوز بوجاقسیز حیطینده آناسینی گؤردو. عاییله‌ وکیل‌لری ده گلمیشدی. آمبولانس و پلیس ماشین‌لاری دا وارایدی. اوست-باش‌لارینا پانبیق سوواشمیش ایشچی‌لر، باش‌لارینی یئره دیکمیشدی. بیری‌نین قوینونداکی ال‌لری او بیری‌نین باشماغی‌نین بورنونو بیر چینقیل اوزه‌رینده اویناتماسی، آغیر بیر حادیثه‌دن خبر وئریردی. آناسی اونو گؤرر-گؤرمز قاباغینا قاچیب قوجاقلادی. هؤنکور-هؤنکور آغلایان قادینی باغرینا باسیب اونا توختاق اولماغا چالیشیردی. جنازه‌نی قارا بیر کیسه ایچینده آمبولانسا داشیدیلار. پلیس مأمورلاری‌نین بیری گؤنده‌ریلن اورژانس دوکتوری له دانیشیردی.‌آناسینی یانینا آلیب قولونو اونون بئلینه دولادی. بیر نئچه آددیم آتیب اونلارا چاتدیلار. اؤلوم سببینی اؤیرنمک ایسته‌‌دییینده ایلک معاینه‌ده “اینفارکت” تشخیص وئریلدیینی دئدیلر.
ایچینده‌کی کدر، گؤزلری آلمایاجاق قدر آغیر و نهنگ ایدی.
آلمانیادا یاشایان قارداشی اؤزونو دفن مراسیمینه یئتیرمیشدی.
باشینی قالدیریب باداملاردان بیرینی بوداقدان اوزدو. ایکی بارماغیندا توتوب قولاغی‌نین دیبینده لاخلاتدی”هههه ایندی قینیندان چیخماغا حاضیرسان”دئییب قاققاناق چکدی.
بینایا دؤنوب اوتاغینا تپیلدی. ماسانین آرخاسیندا یئرله‌شرکن یازماغا باشلادی.
اون اون‌بیر یاشلاریمدا او بیری قیزلاردان فرقلی اولدوغومو آنلادیم. اورتا مکتبده بو داها دا آیدین شکیلده اؤزونو گؤستردی. توالتده گؤردویوم قانلی پد‌لر، آینا قاباغیندا قورخویلا هیجان قاریشیق ماتیک یاخمالار، مکتب دیشی اوغلان‌لارلا گیزلین گؤروشمه‌لر و نه‌لر نه‌لر کی من هئچ بیرینی بو یاشا کیمی تجربه ائله‌مه‌دیم. قولچاقلاریم هله ده ال‌دیمه‌میش قالیر آمما، اوره‌ییم ایسته‌دییی قدر توفنگ سیندیریب، توپلار ییرتدیم.
آنام اوشاق یاشلاریمدان بونو سئزسه ده منیم قیز اولدوغوما اینانیر، قیز کیمی یئتیشدیرمک ایسته‌‌میشدی. تام باشقالاشمیش بیر گؤوده‌ ایدیم. اون‌دؤرد یاشا کیمی ائله ده چتینلیک چکمیردیم آما، هر یاشا دولدوقجا، هر یئنی بیر فرقی کشف ائتدیکجه روحوم سیخیلماغا، و داریلماغا باشلاییردی. سانکی بو بدن اونون اوچون چوخ اینجه، چوخ داریسقال‌ایدی. ائوده تمامن بیر اوغلان کیمی دولانسام دا قاپیدان چیخینجا اویونچولوق باشلاییردی. آرادا بابامدان گیزلین آنامی قوروب آزمایشه گئتمه‌ییمیزی ایسته‌ییردیم. بونو باشارسام دا هئچ نه دییشمه‌دی. ترنس سکشووال اولدوغوم ایثباتلانمیشدی. بوتون سندلر و مدرک‌لره دایاناراق هشتاد فاییز اوغلان اولدوغوما رغمن، بابام جینسیت دییشمه‌ییمه مانع اولوردو. عمل اوچون میلیونلار پول احتیاج ایدی. باباما گؤره بو پول ائله ده چوخ دئییلدی آنجاق کونازلیغینا سالیب “وئرمیرم کی وئرمیرم” دئییردی.
ایندی آرادا هئچ بیر مانع یوخدو. بابامین دفن مراسیمنده قارداشیمی گؤردون. بوردایکن چوخ یاردیمی کئچدی. تک جانینا بوتون ایشلریمین دالیسجا قاچیب هامی‌سینی یولونا سالدی.سندن اونا چوخ دانیشمیشام. گؤزللیییندن. خانیملیغیندان. یئنی دوغولموش کؤرپه‌لر قدر حیات‌دان دولو و عینادلا داشی یاریب حیاتا باشلایان چیچک‌لر قدر اومیدلی اولدوغوندان. اوزون سوزون قیساسی، سنی دلیجه سئودییمدن.
ایندی گؤزله‌ییریک؛ او آلمانییا دا منی، من بورادا ویزامی.
ایمضا: ؟ (ملک)
کاغاذی بوکوب پاکاتا قویدو.
مملکتین سون اون ایلده گؤردویو آغیر قیش‌لاریندان بیری‌ایدی. تبریز هر زامانکیندان داها گؤزل، داها تمکینلی گؤرونوردو. قوجاق دولوسو چیچک‌له اونو دایاناجاقدا قارشیلایان آناسینی ائوه بوراخیب “من بیر ساعاتا قییده‌رم ” دئدی. دانیشماغا هله چوخ سؤزلری وار ایدی. آناسی الینی سئیرک ساققالینا چکیب” سنه قوربان اولوم قوورما سبزی پیشیره‌جییم تئز قیید” دئییب، ماشین گؤزدن ایتینجه دالیسیجا باخدی.
یولونون آغزیندا چیچک‌‌ساتان دوکانا دؤنوب قیرمیزی هلند رزلاریندان بیر باکس چینلتدی. بیلدیییی آدرسه دوغرو دورمادان، سوردو.
شاختا یاریم آچیق شوشه‌دن چیرپیلیب اوزونو قامچیلاییردی. اوره‌یینده کی یارالی سئرچه اوچماغا جان آتیر، اؤزونو او یان بو یانا چیرپیردی. سئودانین، اونو نئجه قارشیلایاجاغینا چوخ ماراغلی‌ایدی. بو تابلو قورخو آدلی بیر چرچیوه ده یئرلشمیشدی.
کوچه‌یه گیردی. قاپییا بیرآز قالان دایانیب کؤکسونده ییغیشان هاوانی بوراخیب، دردی. اؤنده‌ پارک اولان ماشیندا، ایکی قیز گؤردو. سئویشیردیلر. ” لزبین” سؤزجویونو یادداشیندان ائندیردی. درین بیر آه چکیب” نئیله‌مک، سیزده حیاتدان بئله لذت آلیرسیز” دئدی.
بیردن گؤزو قاپیدان چیخان قیزا ساتاشدی. مارال ایدی. همین ماشینین دال قاپیسینی آچیب اوتوردو. ماشین یولا دوشدو. بیر آن ایچینده دوز قولاغی‌نین دیبیندن کئچدیلر. اؤنده اوتوران‌لارین بیری سئوداایدی. تبریز بوز دؤورونه قاییدیردی…
سون

اشتراک گذاری در print
چاپ

یک پاسخ

  1. نئچه مدتدی تابو سسله نن موضوعلار حاقدا راحاتجاسینا صحبتلر گئدیر. بیر آنلامدا تابولیقدان چیخمادادیلار. ترنس ، لزبین ، هموسکشوال و…
    خان صنم ینده بو حکایه سی او دسته صحبتلردن بیری دیر. جامعه یه بونو آنلاتماق کی او انسالارین اوجور یارانماقدا هئچ گوناهلاری یوخدی و خلقتین هانسی ناسازلیقی سببکاردی، شوبهه سیز کی چوخ یاخشیدی. هئچ بیرآی ، قیرخ گون اولماز کی جوان بیر اوغلانی اوجور خلقتینه خاطیر طایفاسی جنوبدا اولدوردیلر. آنجاق حکایه نین سونوندا ،خان صنم بئله شوبهه یارادیر کی جمعیتین چوخودا دئمه سک ، گوزه چارپان درصدی ترنس جندر، لزبین…..دی. بودا دامین اوطرفیندن دوشمک اولور.
    بیرنکته نی ده دئییم.نیگار نوروزی نین «منی من ائدن »عنوانلی مطلبی یادیما دوشدی . حتی تورکیه دیلی آذربایجان دیلین متاثر ائله مه سین قیناییردی کی نه لازم یاخشی یرینه تامام دیه ک؟ حکایه نین اصلی شخصیتی نین حیات طرزین یا اجتماعی دورومو ن اوخوجویا آچیخلاماق قصدیله اولسادا ، یونی، اسلش، فری سایز…. کیمی کلمه لری بیر تورک دیلینده یازیلان نثرده ایشلتمک ، گرکسیزدی. خصوصیله خان صنمه کی تورک دیلینده زنگین سوزجوکلر خزینه سی وار.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

رقیه هاشم‌زاده (خان صنم)

رقیه هاشم‌زاده (خان صنم)

باشقا اثرلری